LITANYA NG MAHAL NA BIRHEN: MATER BONI CONSILII (Ina ng Mabuting Kahatulan)

Nuestra Señora de la Salette
G. Nelson Cruz

Mater Boni Consilii

Sa lipunang ginigimbal ng ugong ng pagtatalo,

nasisindak ang madilim na isip ng mga tao;

salungata'y walang habas, marami ang basag-ulo,

manlalabo ang isipan at sa isyu'y nalilito;

maulap ang tinatahak na landasing tinutungo,

na tila ba maliligaw sa laot ng mga gulo;

sa ganitong kalagaya'y ISANG INANG MATALINO

na dapat na pumagitna't mabigay ng gintong payo.

---o0o---

Isang INANG bawat wika'y sulo't tanglaw ng isipan,

bawa't pasya'y karunungan at mabuting kahatulan;

isang INANG pantas manding may payo ng katarungan

sa sinumang naaapi't sapupo ng agam-agam;

Iyan po ang INA NATIN NG MABUTING KAHATULAN,

na sa buhay na magusot may matatag na patnubay;

sa libo mang suliranin nitong bayan at simbahan,

INA siyang sa balana'y may hatol na kagalingan.

---o0o---

Ang birhen kong pintakasi'y binatbat ang pag-iisip

sa kislap ng karunungang inihulog ng Langit;

Siya'y Ina ng Mesiyas na sinugo ng Pag-ibig

at Anghel ng kanyang diwa ang “binatang pagtitiis

ay sangla ng katubusan ni Jesus sa taong ganid;”

ang hatol ng Amang Diyos ay nasakyan Niyang labis,

na hatol ng karunungang dapat sundin ng daigdig.

---o0o---

Nilimi sa kanyang puso't sinimpan sa kanyang loob

ang hatorl ng katarungang mahabagin nitong Diyos;

“- sa palalo'y inilipat ang kababaan-ng-loob,

sa suwali ang tinumbas ay mabait na pagsunod;

sa malaswang mga sala ay hirap na walang tuos

ang bayad na ibinuwis ng Bathalang Manunubos;

sa ganito itong tao'y pinagsisi Niyang lubos,

pinagtika't pinagbanal sangayon sa mga Utos.

---o0o---

…

Sa pagsunod kay Bathala nitong Inang Mariang Birhen,

ang suwail na si Eva'y nalantikan nang mariin;

Si Eva po ay nakinig sa tukso ng mainggitin,

kasawai't kamatayan ang nakamit na malagin;

ang Birhen po ay nakinig sa “payo ng Poon natin”,

katubusa't kamatayan ay natamng maluningning;

kaya INANG sa parangal si Maria po'y ating sunin,

tagapayo Siyang mutya, taga-akay na butihin.

---o0o---

…

Ang pag-ibig daw sa Diyos at Banal na Pagkatakot

ay dunong na walang hanggang may dulot na tuwa't tugod;

ito, anya, ang panlaban sa hibo ng sansinukob,

kalasag at kaligtasan sa tukso mang walang lagot;

kaya, giliw na katoto, pakinggan ang Inang irog,

sa anumang sulirani'y sa Birhen ka manikluhod,

halimbawang iniwana'y pangaral mong isaloob

at sundin ang Kanyang payo na bulong sa iyong loob.