PANITIKAN | LITERARY: PAGTINGIN SA AKDANG HAGONOEÑO: Banal na Triduo: Ang Tatlong Araw na Pagdiriwang ng Pagpapakasakit at Pagkabuhay ng Panginoon - Rdo. Msgr. Andres Santos Valera, H.P., S.L.L.

Presentasyon:

“Mga kapatid ko sa pananampalataya sumapit na naman tayo sa panahon ng Semana Santa o Mahal na Araw. Sa mga araw na ito, ginugunita ang pinakamahalagang pangyayari sa kasaysayan ng kaligtasan: ang pagpapakasakit, pagkamatay at muling pagkabuhay ng ating Panginoong Jesu-Kristo.” (Valera, Banal na Triduo 1).

“Sa mga araw na ito, ating inaalala ang matagumpay na misyon ni Hesukristo na ibinigay sa Kanya ng Ama: ang misyon na iligtas ang lahat ng tao sa pamamagitan ng Misteryo ng Paskuwa. Sa kanyang pagkamatay ay winasak Niya ang kamatayan at sa kanyang pagkabuhay ay ibinalik sa atin ang buhay.” (Valera, 3).

    Abala ang mga Katoliko sa panahon ng mga mahal na araw (Semana Santa) na ito upang magpaka-banal at makapag-nilay nilay sa buhay. Itinuturing ng maraming Katoliko ang Semana Santa bilang mga pinaka-banal na araw sa loob ng isang taon. Ilan lamang sa mga gawain tuwing panahong ito ay ang mga sumusunod: Misa sa Huling Hapunan, Bisita Iglesya, Banal na Oras, Pagbasa ng Pasyon, Daan ng Krus, Seremonya ng Pitong Huling Wika, Prusisyon sa Mahal na Araw at Salubong.

Si Msgr. Andres Santos Valera na may-
akda ng librong ito ay tubong
San Jose, Hagonoy, Bulakan. Siya
ang kasalukuyang rektor ng Seminaryo
Mayor ng Inmaculada Concepcion sa
Guiguinto, Bulakan at Bikaryo Heneral
ng Diyosesis ng Malolos.

Mga Reaksyon:

     Totoo, marami ngang mga gawi ang mga Katoliko tuwing Semana Santa lalo na dito sa Pilipinas. Ngunit totoo ring kulang sa paggabay ang mga tao ukol rito. Sa aspetong ito, malaki ang naiambag ng ating kababayang si Rdo. Msgr. Andres S. Valera, H.P., S.L.L. Sa pamamagitan ng kanyang aklat na Banal na Triduo: Ang Tatlong Araw na Pagdiriwang ng Pagpapakasakit at Pagkabuhay ng Panginoon, binibigyan niya tayo ng gabay kung paano nga ba dapat ipagdiwang at isagawa ang mga gawain sa Mahal na Araw. Ang maganda rito, hindi lamang ito gabay para sa mga layko ngunit ito ri’y isang gabay para sa mga pari.

     Kumpleto ang nasabing aklat mula sa Pagdiriwang ng Huwebes Santo hanggang sa mga gawain sa Linggo ng Pasko ng Muling Pagkabuhay. Isinasaad rin sa libro kung ano ang mga dapat na ihanda sa bawat pagdiriwang. Mayroon ring mga mungkahi at natatamang paraan para sa mas makabuluhang pagdiriwang. Kumpleto rin ito sa mga pagbasa at awitin na angkop sa mga pagdiriwang. Ang mga awitin ay may nota pang kasama para sa mga tumutugtog.

     Catechetical ang dating ng libro kung kaya matututo talaga ang babasa nito. Sa bawat simula ng bawat Mahal na Araw, mayroong maikling catechesis ang may-akda upang lubusang maintindihan ng isang mananampalataya ang halaga ng araw na yaon. Gayundin naman na sapagkat dalubhasa sa liturhiya ang may-akda, kumpleto ang aklat sa mga dapat na gawin (kung kailan kailangang tumayo, umupo, lumuhod, tumahimik, atbp) at mayaman ito sa mga aral tungkol sa mga liturhiya ng Mahal na Araw.

    Mayroon ring mga gawain na ibinigay sa atin ang may-akda upang may magawa tayo sa mga araw na akala nati’y walang magagawa. Isang magandang halimbawa ang Sabado Santo. Para sa karamihan, dapat ay walang gawin dahil patay si Kristo ngunit nasa aklat na puwede naman tayong magdasal ng Panalanging Pang-Umaga. May kasama pa itong pagninilay ukol sa “Pananaog ng Ating Panginoong Jesu-Kristo sa Kinaroroonan ng mga Yumao” na hango sa Office of the Readings.

    Mayroon ring mga idinagdag ang may-akda na lalong makapagpapayaman sa gawain natin tuwing mga Mahal na Araw. Mayroon itong mga tagubilin sa pagbasa ng Pasyon, gabay sa Prusisyon sa Mahal na Araw, Hanay ng mga Imahen sa Prusisyon ng Mahal na Araw at Gabay sa Prusisyon ng Paglilibing

     Sa kabuuan, tunay na maganda ang aklat na naisulat ni Rdo. Msgr. Andres S. Valera, H.P., S.L.L. Kumpleto ito sa mga gawain sa Semana Santa tulad ng aking mga nabanggit. Nagbibigay ito ng aral na makapagpapalalim pa ng ating pananampalataya. Sa pamamagitan ng aklat na ito, nawa’y makita ng bawat mananampalatayang babasa nito ang ganda at yaman ng Mahal na Araw sa pananampalatayang Katoliko.

Ang ikatlong pag-iimprenta ng libro ni Msgr. Valera
na ginamit noong nakaraang pagdiriwang
ng Banal na Triduo. Larawan ni:
Sem. Rex Andrian E. Polintan.

Pagninilay:

     Tunay ngang ang mga Mahal na Araw ay puno ng pagmamahal, pagmamahal ng Diyos sa atin sa pamamagitan ng kanyang pagpapakasakit, pagkamatay at muling pagkabuhay tayo’y iniligtas Niya at pagmamahal nating mga tao sa Diyos na sa pamamagitan ng pag-alaala natin sa mga araw na ito, hindi natin kinalilimutan ang kabutihang ginawa Niya para sa sangkatauhan.

     Kung ang Diyos ay mahal tayo marapat lamang na suklian natin ito ng pagmamahal rin sa pamamagitan ng pananampalataya…tunay na pananampalataya. Sakto naman dahil sa pagdiriwang natin ng mga Mahal na Araw, ipinagdiriwang rin ng Simbahang Katolika ang “Taon ng Pananampalataya”.

     Ang aklat na Banal na Triduo ay isang mabisang tulong at gabay na kung saan mas mapapalalim natin ang ating pagmamahal sa Diyos at pagkaka-unawa sa Mahal na Araw. Kapag mas naunawaan na natin ang kahalagahan ng mga araw na ito, tiyak ako na mas lalalim pa ang ating pananampalataya sa Diyos na nag-alay ng buhay para sa atin.

Kaya naman, binabati ko si Rdo. Msgr. Andres S. Valera, H.P., S.L.L. sa kanyang kasigasigan na mailimbag ang nasabing aklat at makapag-dulot ng maraming aral para sa ating mga Katoliko.

Tungkol sa Nagsulat: Si Sem. Niño Jomel H. de Leon ay tubong Sta. Maria, Bulakan. Ang kanyang ama na si Dr. Napoleon de Leon ay tubo namang San Jose, Hagonoy, Bulakan kaya naman si Sem. Niño ay may lahing Hagonoeño. Kasalukuyan siyang nag-aaral sa Immaculate Conception Major Seminary - Graduate School of Theology sa Tabe, Guiguinto, Bulakan at kasama na sa hanay ng mga seminarista na may lahing Hagonoeño.

Photo Courtesy: Sem. Rex Andrian E. Polintan
                            Immaculate Conception Major Seminary
                           Graduate School of Theology
                           Tabe, Guiguinto, Bulacan