KULTURA | CULTURE: Ang Pagdiriwang ng mga Taga-Marulao para sa Sto. Nino, ang Batang Tagapagligtas

     Kilala ang imahen ng Sto. Nino bilang imahen ng Panginoong Jesus sa kanyang anyong kabataan.

   Ang unang imahen ng Santo Nino sa Pilipinas ay binigay ni Ferdinand Magellan kay Reyna Humaymay noong ika 14 ng Abil, 1521, sa Cebu na siya ring araw ng unang pagbibinyag sa mga Pilipino. Si Papa Innocente XIII ang nag-utos na ipagdiwang ito tuwing ikatlong Linggo ng Enero bilang pangkalahatang kapistahan ng Banal na Sanggol para sa Simbahan ng Pilipinas noong ika-18 siglo.

Ang mga kabataan ng Parokya ni Sta. Elena Emperatris na buhay na nagsasalarawan ng Ati-atihan, isang sayaw para sa mga kapistahan na ginagawa sa kabisayanan. Pagpaparangal ito ng mga taga-roon sa luwalhati ng Banal na Sanggol.

     Simula nuo’y kumalat at lumaganap ang debosyon sa Sto. Niño. Hanggang sa makarating ito sa mga karatig bayan hanggang sa makarating sa Bayan ng Hagunoy at nagkaroon ito ng isang munting bisita malapit sa kabayanan ng Hagonoy, na kung tutuusi'y bahagi pa rin ng barrio na ipinangalan sa Sto. Niño na siyang sentro ng bayan ng Hagonoy. Hindi matatawaran ang debosyon ng mga Katolikong Pilipino, pati na rin naman ng mga Hagonoeño sa Sto. Niño. Karamihan sa mga tahanan ng mga taga-rito, tulad din sa ibang mga lugar ay may imahen ng Kristong Sanggol. Dito sa Parokya ni Sta. Elena Emperatris, nagdiwang ng kapistahan para sa karangalan ng Batang Manunubos tuwing araw ng Linggo, Enero 20, 2013 tulad ng naaayon sa kalendaryo ng mga pagdiriwang ng Simbahan sa Pilipinas. Kasama ang mga magulang ng mga bata sa barrio ay nagsipagsimba sila. Dalangin ng kanilang ama at ina na basbasan ang kanilang mga anak, maging huwaran at maging modelo ng kanilang mga anak ang Sto. Niño. Puno ang simbahan hanggang sa patio.

 Pinangunahan ang pagdiriwang ng Hermana Mayor, si Gng. Helena Marie Gabrielle Feliciano at ng kanyang pamilya. Nuong bisperas nagkaurong ng dapit sa ganap na ika-5 ng hapon. Dinapit ng mag-asawang Jose at Maria ang batang Hesus sa tahanan ng Hermano patungo sa Simbahan.

    Nuong umaga naman, araw ng kinapistahan, walang humpay ang pagpapasyo ng banda ng musiko na sinalisihan pa ng isang mobile truck sa saliw ng tugtog ng sinulog kaya’t damang dama ang saya ng pista. Sa ganap na ika-9:30 ng umaga ay ginanap ang Banal na Misa para sa karangalan ng Sto. Niño. Sa pangunguna ng Kura Paroko ng Sta. Elena, si Fr. Efren G. Basco at ng pamilya ng hermana. Sa dami ng mga batang nagsimba ay halos puno na ang simbahan. Binasbasan ng Kura ang lahat ng mga batang naroroon. Isinimba ng mga ina ang kanilang mga anak upang idalangin na sa bawat araw na daraan ay bigyan ng mahabang buhay , ilayo sa ang mga bata sa sakit at sakuna. Matapos ang Banal na misa ay sinundan ito ng isang Maringal na Prusisyon kung saan ito ay pinangunahan ng isang ati-atihan sinundan ng seryales, estandarte, mga abay, ang hermana at ang imahen ng Sto. Niño at ang banda ng musiko. Masaya ang araw ng kapistahan. Matapos ng prusisyon, nagsalu-salo ang barrio sa tanghalian na sinundan pa ng palaro para sa mga bata.

     Tunay ngang malalim ang pananampalataya at paniniwala ng mga taga-Marulao sa batang manunubos at tagapagligtas. Matapos nito, isang taon nanaman ang lilipas at isa pang bagong taon ang darating. At sa bawat darating na taon ay muling ipagdiriwang naming mga taga- Marulao ang pista at karangalan ng Señor Sto. Niño.

Viva Sta. Elena de Hagonoy!!!

Viva Sta. Ana de Hagonoy!!!

Viva Señor Sto. Niño de Hagonoy!!!


Photo Courtesy: Marvin M. Magbitang
                          Parish of St. Helena the Empress

Page 1 of 5

Please press Older Posts for Page 2.