KULTURA | CULTURE: Apostol San Pablo… Huwaran ng Pananampalataya: Ang Binunying Pagdiriwang ng Pagbabalik-Loob

     “Apostol San Pablo… Haligi ng Simbahan… Huwaran ng Pananampalataya” ang siyang naging tema ng pagdiriwang ng Dakilang Kapistahan ng Pagbabalik-loob ni San Pablo Apostol na ipinagdiwang sa Barangay San Pablo, isa sa nga pinakabatang barangay ng Bayang Hagonoy na sakop naman ng Parokya ng Ina ng Laging Saklolo. Ang dakilang okasyong nabanggit at ipinagdiwang noong Enero 25 taong 2013.

     Si Apostol San Pablo bilang isa sa dalawang itinuturing na haligi ng Simbahan kahanay ni San Pedro ay isa sa iilang mga banal sa Simbahan na may dalawang kapistahan . Ang isa ay ang kapistahan ng kanyang pagiging martir na ipinagdiriwang tuwing Hunyo 29 at ang paggunita sa kanyang pagbabalik- loob na ipinagdiriwang nga tuwing ika-25 araw ng Enero. Dito ginugunita ang pagtawag ng Panginoong Jesu-Kristo sa kanya upang maging tagapagpalaganap ng Mabuting Balita ng kaligtasan. Bagaman noong una , si San Pablo ay nakilala bilang taga-usig ng mga unang Kristiyano, matapos ang pagtawag ng Panginoon sa daan ng Damasco, siya ay naging masigasig sa pagpapalaganap ng mga aral ni Kristo. Kung saan nakilala siya sa pangangaral sa mga Gentil o yung mga mananampalataya ng mga paganong kaugalian. Dito nakilala siya bilang apostol sa mga Gentil. Sa turo na ito sumentro ang mga homilya sa bawat nobenaryo bilang paghahanda sa kapistahan. Binigyan diin ni Rdo. P. Norberto F. Ventura, Kura Paroko ng Parokya ng Ina ng Laging Saklolo na bagaman huling nakilala ni Pablo si Jesus, kaakibat ang bigat ng kanyang kasalanan sa pag-usig sa unang Simbahan, siya ang pinakanagpagal sa alin mang alagad upang ipalaganap ang pananampalatayang Kristyano. Ayon kay P. Ventura, ang gating mga kahinaan ay napapalitan ng ating mga gawain at pagsusumikap na maging banal at upang masunod ang mga kautusan.

Pinangunahan ni Rdo. P. Norberto F. Ventura, Kura Paroko ng Parokya ng Ina ng Laging Saklolo ang misa para sa Fiesta Mayor ng Visita ni San Pablo Apostol sa San Pablo, Hagonoy.

     Sinimulan ang nobenaryo noong ika-16 ng Enero kung saan ang mga mananampalataya sa Barangay San Pablo at nagpamalas ng suporta sa ginagawang parangal sa patron ng lugar sa dami ng bilang ng tao dumadalo sa misa na di-nagmamaliw kahit pa araw-araw ang pagdiriwang ng Eukaristiya. Ang maalab na pakikiisa ng mga taga San Pablo ay sumasalamin ng panimulang hakbang tungo sa pagbabalik sa mapagmahal na kanlungan ng Diyos.

     Nakiisa rin ang koro ng Sub-Pastoral Council ng San Pablo sa pamamagitan ng paglikha ng awit na na alay sa pagbabalik ng patron. Ang mga liriko ng awit ay tumutukoy sa kasaysayan ng pagtawag kay San Pablo at kung paano siya nagpagal upang ipalaganap ang mga aral ni Kristo,. Tinatalakay din ng awit kung paano tinuturuan tayo si San Pablo kung paano magkaroon ng maalab na pananampalataya sa Maykapal. Nasasaad din sa awit kung paano si San Pablo ay naging huwaran at gabay sa wastong at tapat na pananampalataya na pinapatunayan ng kanyang pagiging maalam dito kung saan kanyang isinulat ang ilang mga sulat at aral sa mga unang simbahang Kristyano sa Corinto, Filipos, Antioquia at iba pa. Isinasamo din sa awit kung paano hinihiling ang paggabay at pamamagitan ni San Pablo upang mailapit ang tao sa Diyos. Ayon sa sumulat ng awit, ang komposisyon ay awit isang awit pang-komunyon. Dagdag pa nito ang susunod na awit na lilikhain ay pambungad na awit hanggang mabuo ang mga koleksyon ng awit na laan para kay San Pablo na kikilalanin bilang Misa San Pablo.

     Minabuti ng Sub-Pastoral Council ng San Pablo na magkaroon ng tema bilang siyang magiging gabay ng pagdiriwang upang maiangkop ito sa Tema ng Taon ng Pananampalataya na ideneklara ni Pope Emeritus Benedict XVI.

Press this link for the Music Video presentation found on Faebook.

HIMNO SAN PABLO

Titik ni: Jun R. Acuña

Tinig mula sa:

Awit para kay San Pedro Calungsod

Rdo. P. Manoling Francisco, S.J. 


Kinanta ng:

Redemptoris Mater Chorale

Ang Opisyal na Koro ng 

Parokya ng Ina ng Laging Saklolo

Sa’yo’y pagpupgay, handog nami’t alay,

Santong pintakasi, Patron naming mahal

Huwarang tangi, Haligi ng Simbahan,

Magiting na Apostol ng kay Kristong aral.

Tinawag ka ng Diyos sa Damascong daan,

Liwanag ni Kristo’y iyong nasaksihan

Pag-ibig, loob ng Diyos kay Ananias nalaman,

Pagbabalik-loob mo’y sa Diyos inialay.

Koro:

San Pablo Apostol, kami’y ipamagitan,

San Pablo Apostol, kami’y ilapit mo

Sa Diyos na kaliwanagan

Iyong pinamansag aral ng kaligtasan,

Ipanalaganp sa mundo ang Simbahan

Sa pagpupunyagi, mga Gentil inaralan,

sa pananampalataya, kami iyong gabayan.

Di ka nasindak sa lupit at dahas

Na dulot ng bangis ng kaaway ng Simbahan

Pananampalataya mo, sinubok siniyasat,

Pagpapatotoo mo’y pag-aalay ng buhay

Koda:

San Pablo Apostol isa kang huwaran

Ng pananampalataya at panindigan,

Susundan namin ikaw sa iyong pamamahayag,

Kami nawa’y matulad sa iyong kabanalan.

Photo and Video Courtesy: Jun R. Acuña 

                                          Parish of Ina ng Laging Saklolo