PROGRAMA: Parish Renewal Experience (PREX)

Isang samahang nagpapakilala, 

sa ganda ng buhay sa loob ng Simbahan.

Bilang mga katuwang sa ebanghelisasyon,
nakatuon sa pagyabong ng pananampalataya.

   Ang PREX ay isang organisasyong pansimbahan na naglalayon na mas lalong mapalawig ang pananampalataya ng mga tao sa pamamagitan ng mga pa-klase at iba’t ibang gawaing pansimbahan. Isa sa kanilang gawain bilang mga kasapi ng PREX ay ang kanilang taltong araw na pa-klase na kinapapalooban ng sampung panayam at iba pang gawaing ispiritwal tulad ng pagbabantay sa Santissimo Sacramento.

   Sa bawat pagtatapos ng isang PREX batch na ginaganap tuwing gabi, sasalubungin ang mga magsisipagtapos ng kani-kanilang pamiliya at ng mga kaibigan na may dalang mga bulaklak at mahihigpit na yakap. Sa kanilang pagtatapos ay magiging miyembro na sila ng isang bagong pamilya ang kanilang mga “kuya” at ”ate” ang kanilang PREX family.

   Ang Parish Renewal Experience o PREX ay sinimulan dito sa Parokya ni Sta. Elena Emperatriz ni Rdo. P. Celso Fernando noong 2001. Nagsimula ito nang ang mga lingkod simbahan ng iba't ibang organisasyon ng parokya ay pinadalo sa seminar ng PREX sa Visita ng Sta. Lucia, Calumpit, Bulacan, Ito ay sa pangunguna ng mga facilitator ng PREX na mga taga-Tondo, Maynila at Calumpit. Naka- tatlong batch muna ang napa-graduate ng parokya bago nakapagsimula ang grupo ng outreach program. Noong Pebrero 2002, nagsimula ang unang pa-klase o seminar ng PREX dito sa parokya, sa pagtutulungan ng PREX Tondo, Calumpit at ng tatlong batch ng parokya at sa kapahintulutan ng Kura Paroko noon. Sa ngayon, ang PREX sa Parokya ng Sta. Elena ay umiiral sa loob ng 12 taon at sampung buwan.

 Sa kasalukuyan, patuloy na naghihikayat ng mga mananampalataya sa ating simbahan sa ngayon ay nakapagsagawa na ng 37 na batch ng pa-klase at patuloy pang lumalaki ang kanilang samahan. Mula sa kanilang mga kasapi, nabuo ang sumusunod na panayam:

Q: Nagtagal na po ang samahang pansimbahan sa loob ng12 taon at 10 buwan. Ano po ang masasabi ninyong sikretong taglay sa patuloy na pag-iral ng inyong samahan?

A: Ang pananampalataya natin sa Panginoon. Nang magsimula ang PREX dito, madami ang dumalo sa seminar, mga taga- iba't ibang parokya, sa kadahilanang tayo ang naunang Prex dito sa bayan ng Hagonoy. Masigla, masaya at nagkakaisa ang lahat sa Parokya sa bawat pa-klase o seminar ng Prex. Suportado tayo ng mga PREX ng Tondo, Calumpit, maging nang mga taga-Paombong at Malolos ay nagiging tagapanayam din natin sa mga seminar.. Ika nga, isang pamilya ang PREX, nagmamahalan, nagsusunuran, nagkakaisa at kung minsan meron ding mga tampuhan at ndi pagkakaunawaan sa mga maliliit na bagay..

Q: Paano po ba napapalakas ng mga hamon ang patuloy na pagtawag ng paglilingkod na buhat ng debosyon para sa inyong apostolado sa Simbahan?

A: Kapag ang pananampalataya natin sa Panginoon ay tunay at tapat, kahit anong hamon at pagsubok ay nakakayanan. Ang paglilingkod ay bukal sa puso, mahirap maglingkod ng napipilitan ka lamang o gusto mo lamang mapuri ka ng iba o maging sikat. Kung gusto nating makapaglingkod sa Diyos, dapat matuto tayong sumunod. Dahil sa pagsunod natin sa mga aral at utos ng Diyos, magagampanan natin ito ng maayos, masaya at magaan ang ating kalooban kahit ika nga hirap ang katawan magkaminsan.

Q: Sa inyong palagay, patuloy nga po ba ang pagyabong o unti-unti pong nalalanta ang iba sa inyong kapisanan? Anu-ano po bang mga hakbang ang inyong pinagsusumikapang gawin sa pagtugon dito?

A: Sa bawat organisasyon o samahang pansimbahan, may panahong masigla at nagkakaisa ang lahat ng mga kasapi sa pagtugon sa mga gawain ng samahan. May panahon din nman na nanlalamig din. Sa ngayon, masasabi kong medyo nanlalamig, dahil na din siguro sa maraming kadahilanan tulad ng mga iba't ibang klaseng pagsubok sa buhay natin ngayon. Noong July 19, 2014, nagdaos kami ng PREX GENERAL ASSEMBLY sa Parokya ng Sta. Elena na ang tema ay "MAGKAISA at MAGPANIBAGO". Ito ay sa kapahintulutan at pakikiisa ng ating Kura Paroko na si Fr. Jaime Malanum, upang muling mapasigla ang PREX FAMILY ng Parokya.

At sa pagtitipon ay napagkaisahan na magkaroon kmi ng regular Prayer Meeting tuwing unang Linggo ng buwan, 4-5pm sa Parokya ng Sta. Elena, sa pangunguna ng ating Kura Paroko na si P. Jaime Malanum. Tuwing Friday ay may Bible Sharing kami sa bawat bahay ng mga kasapi ng PREX.

Q: Sa inyo pong karanasan, ano po bang meron sa ispiritwalidad, apostolado at gawain ng samahang inyong kinabibilangan na nagpapalakas sa inyong pananampalataya at paglilingkod sa Simbahan?

A: Pagpapanibago at pagtuklas natin sa tunay na kahulugan ng Pananampalataya upang matagpuan natin ang pagiging masaya, mapagmahal at mapagmalasakit na Katoliko. Dahil ang Parokya ay binubuo ng mga parokyano o pamilya na nagmamahalan, nagkakaisa at nag-uunawaan sa bawat isa.

Q: Ano pong mensahe ang inyong maibibigay para sa inyong kapwa-kasapi sa inyong samahan pati na rin sa mga kabataan na nagnanais maging aktibo sa paglilingkod sa Simbahan?

A: Nawa huwag tayong manlamig sa ating pananampalataya sa Diyos kahit tayo ay dumadaan sa mga pagsubok o unos ng buhay. Siya lamang ang ating sandigan at hinding hindi Niya tayo pababayaan kaylanman. Sa ating paglilingkod sa Simbahan at sa ating kapwa, lagi nating isaisip na ang paglilingkod ay may kasamang pagsunod. Tulad ng ating Mahal na Ina, ang Birheng Maria, siya ay naglingkod at sumunod sa kalooban ng Diyos.. Nawa matularan natin ang ating Mahal na Ina sa pagiging masunurin at mabuting lingkod ng Diyos.

Isang koponan ng PREX Family sa Parokya ni Sta. Elena Emperatriz sa Hagonoy kasama ang mga facilitators.

Photo Courtesy: Marvin M. Magbitang (Parokya ni Sta. Elena Emperatriz)