SAMAHANG PAMPAROKYA: Samahan ng mga Camarero ng mga Banal ng Sto. Rosario

Isang samahang nagsumikap
upang bumuo ng isang panata,

upang ipakilala ang mga Banal ng Sto. Rosario
mga huwarang tutularan sa habang panahon.

Si Maria ang huwaran ng mga layko na naghihikayat na tayo'y maging banal sa pamumuhay katulad ng mga Banal ng Sto. Rosario na natagpuan ang kaligtasan sa kanilang pagdedebosyon sa mga Mahal na Birhen ng Sto. Rosario.

   Pinasimulan ang prusisyon ni Maria at ng mga Banal ng Sto. Rosario sa Parokya ng Nuestra Señora del Santissimo Rosario noong 2011. Ito ay pinasimulan sa panunungkulan ni Rdo. P. Quirico L. Cruz bilang paggunit at pagbibigay-galang sa mga santong nagkaroon ng malaking debosyon sa Mahal na Birhen ng Sto. Rosario.

  

   Bago pa man ito pormal na napasimulan ay napag-usapan na magkaroon ng pagdiriwang sa paggunita sa mga santong deboto sa Mahal na Birhen ng Sto. Rosario. Nauna dito ang pagsama nina Sto. Domingo de Guzman at Sta. Catalina de Siena sa maringal na pagpruprusisyon sa kapistahan ng parokya tuwing buwan ng Oktubre. Ang dalawang santong ito ang orihinal na kasama sa imahen ni Maria bilang Birhen ng Pompeii sa Italya na orihinal na imahen ng Nuestra Señora del Santissimo Rosario.

Ang ilan sa mga imahen na kasama sa taunang prusisyon sa karangalan ng mga Banal ng Sto. Rosario.

   Sa simula ng pagdiriwang, nagkaroon ng ideyang tulad ng pagdiriwang sa prusisyon sa ngalan ng Nuestra Señora del Santissimo Rosario de La Naval de Manila sa Lungsod ng Quezon na hawak ng mga Dominikano. Mula dito, nabansagan ang Sto. Rosario bilang “La Naval de Hagonoy” buhat napasimulang pagdiriwang na ito. Mula sa pagdiriwang din na ito nabuo ang samahan ng mga tagapangalaga ng iba't ibang mga santong deboto. Ngunit hindi ginamit ang tag-uring ito sa mismong birhen dahil ang Nuestra Señora del Santissimo Rosario de Hagonoy ang nananatiling imaheng patrona sa parokya sapagkat nasa parokya na ito simula pa noong ika-18 siglo na kaloob ng Pamilya Raymundo ng Sta. Cruz, Hagonoy. Ang Virgen Festejada na ito ang siyang naging imaheng itinatampok simula nang ginanap ang pagdiriwang.

Ilan sa mga pangunahing imahen na iprinuprusisyon tuwing Prusisyon ng mga Banal ng Sto. Rosario: si Papa San Juan Pablo II (itaas) na siyang Papa ng Sto. Rosario at si San Jose, ang Esposo ni Maria.

   Noong binubuo ang konseptong ito, 10 camarero ang nangako na magtataguyod sa nasabing pagdiriwang. Mula sa tatlong imahen ng Mahal na Ina, Sto. Domingo de Guzman at Sta. Catalina de Siena, nadagdagan ito hanggang sa dumami ang mga imaheng tulad nina San Lorenzo Ruiz de Manila, Papa San Juan Pablo II at San Francisco de Asis. Mula sa sampung imahen, nagkaroon na ng 26 na imahen na sumama sa pagdiriwang na ito sa mga darating na taon ayon kay G. Erwin G. Capati, Pangulo ng samahan.

   Nawa'y tulad ng mga Banal ng Sto. Rosario patuloy na maging kabahagi tayong mga layko at maging mga huwaran ng isa't isa at mag-akayan sa landasin ng pagiging sambayanang laging nananalig sa Panginoong ating Diyos.

Photo Courtesy: John Andrew C. Libao (Pambansang Dambana at Parokya ni Sta. Ana) at El Gideon G. Raymundo (Parokya ng Nuestra Señora del Santissimo Rosario)

Video Courtesy: Pamparokyang Komisyon ng Pamamahayag (Parokya ng Nuestra Señora del Santissimo Rosario)