MINISTERYO: Extraordinary Ministers of Holy Communion/Eucharistic Lay Ministers

Isang natatanging samahan ng mga tagapagdulot,

tungkulin ay ihatid si Kristo sa Banal na Eukaristiya 
sa bawat sulok ng parokya at tumulong sa
Banal na Pagdiriwang

   Ang parokya ng Sta.Cruz sa bayan ng Paombong ay matatagpuan sa isang mala-islang lugar na may kalayuan sa bayan. Ang lugar na ito ay maituturing na lugar na pinagpala sapagkat ito ay napiling maging isang pangmisyong parokya ng Diyosesis.

Mga kasapi ng LM na masugid na nagbabantay sa Santissimo Sacramento habang iprinuprusisyon sa ilog.

  Isla itong maituturing sapagkat ito ay naliligid ng katubigan, mga sasahan na pinagkukunan ng tuba at suka, gayundin ng pawid at mga bakawang na nagsisilbing pangitlugan ng mga isda. Pangingisda ang pangunahing ikinabubuhay ng mga tao rito. Ilan sa kanilang mga gawain ay pamamaklad, pagtatalaba at pamamalaisdaan.

   Hindi pa man nagbubukang-liwayway ay gising na at abala na ang mga tao upang may maipakain sila sa kanilang pamilya. Sa kabila ng kaabalahanang ito ay may panahon pa rin sila sa pagsisimba at pakikibahagi sa mga gawaing pansimbahan. Marahil ito na rin ang nagbunsod sa mga kura paroko ng parokya mula kina Rdo. P. Joselito Cruz, Rdo. P. Jimmy Malanum, Rdo. P. Jun Manalo, Rdo. P. Benny Justiniano, Rdo. P. Angel Santiago, Rdo. P. Carlo Soro, Rdo. P. Ron Cristobal at ng kasalukuyang kura ng parokya na si Rdo. P. Leopoldo Evangelista III upang gawin at bigyang-katuparan ang isa sa mga aral ng ating Panginoon sa kanyang mga Apostol na “Halina, mamalakaya kayo ng tao”. Mula sa mga katagang ito nagsimula silang mangalap ng mga taong kanilang makakatuwang sa pagpapalaganap ng aral ng Diyos. Hinimok nila at binigyan ng pagkakataon ang mga kalalakihan sa lugar na makibahagi at maging lingkod ng Diyos sa pamamagitan ng pagiging mga Lay Ministers. Ang nasabing organisasyon ay binigyang pangalan ng kura at nakilala sa tawag na EXTRAORDINARY MINISTERS OF THE HOLY COMMUNION. Ang kalalakihang napiling maglingkod ay mula sa iba’t-ibang katayuan sa buhay.

Ang pagbabantay ng mga LM sa pagpunta ng Santissimo Sacramento hanggang sa Simbahang Parokya ng Sta. Cruz.

   Ang ilan sa kanila ay namamalaisdaan, mamamaklad, bangkero at mga bantay palaisdaan. Isang napakalaking hamon ito para sa kanila sapagkat malaki ang kaibahan ng gampanin nila sa uri ng pamumuhay na kanilang kinagawian. Ito ay isang malaking patunay na kahit sino ay maaaring tawagin ng Panginoon at maglingkod sa kanya nang pasubali, sapagkat ang tumatalima ay pinagpapala.

Photo Courtesy: Rosalie C. San Juan (Parokyang Misyon ng Sta. Cruz)