SAMAHANG PAMPAROKYA: Cofradia dela Nuestra Señora de Consolacion y Correa

Pamana ng mga prayleng Agustino,

samahan ng mga laykong aktibo sa debosyon
suot-suot ang correa na tanda'y panata
sa pagdulog sa gawain ni Maria.

Kasaysayan ng “Cofradia de la Nuestra Señora de Consolacion y Correa” at Kanyang mga Ari-Arian

(1650-1700)

   Naitatag sa Parokya ni Santiago Apostol ng Paombong ang kapatiran ng Cofradia de la Nuestra Señora de Consolacion y Correa ng mga prayleng Agustino, sa mga maginoo ng bayan na kung tawagin ay mga DIPUTADOS AT AGUSTINAS.

Upang makiita ang ilang larawan ng Cofradia at malaman ang tungkol sa debosyon sa Mahal na Birhen, tignan lamang ang link na ito.

   Buwan ng Setyembre, taong 1700, ang imahen o larawan ng Nuestra Señora de Consolacion y Correa na yari sa garing ang mukha at ang mga kamay nito ay galing sa Espanya. Simula sa nabanggit tna aon, ang kapatiran ay nagsumikap na magkaroon ng mga ari-arian upang sila’y magkaroon ng magagamit sa kanilang mga gugulin.

Ang iprinuprusisyong imahen ng Nuestra Señora de Consolacion y Correa na nasa Parokya ni Santiago Apostol sa Paombong, Bulakan. Ito ang isang natatanging debosyon ng mga isang samahang layko na iniwan ng mga prayleng Agustino sa lugar.

1700-1780

   Ang kauna-unahang pag-aari ng Cofradia ay ang 125 hektaryang sasahan na nabili kay Don Juan Capulong, kauna-unahang Hermano Mayor. Noong taong 1779, pinatibayan nina Don Pedro Galvez, Hermano Mayor, Don Juan Suanco de Guzman, nanunungkulang Gobernadorcillo sa bayan, at si Don Sebastian Garcia na escribano, ang pagkabili ng lupang ari-arian ni Don Juan Capulong at kanyang mga tagapagmana, sapagkat ang unang kasulatan ay kinain ng anay sa kaban ng Cofradia.

1780-1895

   Nagkaroon ng mga donasyong mga sasahan at bukid at ang mga iba'y nabili sa kanilang mga kapatid sa Cofradia. Taong 1895 ang mga ari-ariang lupa ay pinatubuan ni Padre Francisco Renado y Rodriguez, sa pangalan ng Cofradia Nuestra Señora Dela Correa. Ito ay binubuo ng 180 hektaryang sasahan (ngayon ay palaisdaan), 20 hektaryang palayan at apat na hektaryang sasahan sa ilalim ng pamamahala ng mga Diputados at Agustinas sa pamumuno ng Hermano Mayor.

1895-1914

   Nagkaroon ng pag-aalsa ang mga Pilipino laban sa mga Kastila kaya’t itinago ng Hermano Mayor ang mga kasulatan at titulo ng mga lupang ari-arian ng mga Cofradia. Noong taong 1914, sa pamumuno ng Arsobispo Jeremias J. Harty ay muling pinatituluhan ang mga lupa sa ilalim ng administrador o pamamahala ng Kura Paroko. Nang sumiklab ang Ikalawang Digmaang Pandaigdig, ang mga titulo ng lupa ay hiniling ng Arsobispo Rufino J. Santos, D.D. upang itago at nang mapag-ingatan sa ilalim ng Kura Padre Pedro Ignacio at patuloy din ang pamamahala ng Kura at pagtanggap ng kaukulang buwis at sila ang nagdedeposito sa Obras Pias.

Si San Agustin ng Hippo, patron ng mga prayleng Agustino at siyang biniyayaan kasama ng ina niyang si Sta. Monica na mabigyan ng correa ng Mahal na Birhen. Simula noon ang Orden ng mga Agustino (OSA) na ang namamahala sa pagpapalakas ng debosyong ito.

Mga Agustinas (1971)

Gng. Agripina G. Reyes Pangulo

Gng. Maria Udith Sera Josef Pang. Pangulo

Gng. Purificacion E. Gonzales Ingat Yaman

Bb. Victoria Villanueva Kalihim

Pamunuan (1971)

G. Benjamin Flores Pangulo

G. Jose G. Marasigan Pan. Pangulo

G. Conrado T. Alfaro Ingat-Yaman

G. Domingo A. Reyes Kalihim

Pamunuan (2010 hanggang kasalukuyan)

Gng. Zenaida Delos Reyes Pangulo

Gng. Visitacion E. Reyes Pang. Pangulo

Bb. Teresita B. Calayag Kalihim

Gng. Eugenia C. Pascual Ingat Yaman / Councelor

Gng. Nida V. Basaysay Councelor / Liturgy

Gng. Cresencia C. Lindayag Councelor / Formation

Msgr. Epitacio V. Castro Makadiwang Patnugot

   Patuloy ang pagpupulong ng Cofradia ng Nuestra Señora de Consolacion y Correa tuwing unang Linggo ng buwan matapos ang Misa tuwing ika-6:00 ng umaga. Tinatalakay dito ang landas ng buhay ni San Agustin, at kung paano sa sariling pamamaraan ng mga kasaping layko ay maisagawa at maisabuhay ang gampanin ng Nuestra Señora Consolacion y Correa.

Dumadalo ang pamunuan sa quarterly meeting ng CNSCC sa Marilao kung saan kasalukuyang nakadestino ang Makadiwang Patnugot ay si Rdo. P. Francis Cortez III, OSA (Third Order). Nakikiisa ang CNSCC Paombong Unit sa mga gampanin sa San Agustin Church & Shrine sa Intramuros, Manila tuwing ika-apat ng Setyembre sa Kapistahan ng Nuestra Señora Consolacion y Correa at sumasama sa Grand Marian Procession tuwing unang Linggo ng Disyembre.

   Nuestra Señora Consolacion y Correa….Patnubayan Mo po kami!

Photo Courtesy: Paul John R. Palumbarit (Parokya ni Santiago Apostol)

Page 3 of 5

Please press Older Posts for Page 4.