KULTURA: STO. DOMINGO DE GUZMAN: Ikalawang Patron ng Parokya ng Nuestra Señora del Santissimo Rosario

Tungkol sa Santo

   Si Sto. Domingo, kilala rin bilang Domingo de Guzman at Domingo Felix de Guzman, ay ipinanganak sa Caleruega sa Espanya noong 1170. Ang kanyang mga magulang ay sina Felix de Guzman at Juana de Aza. Siya ay isang Kastilang relihiyoso at banal na nagtatag ng (Lat: Ordo Praedictorum - Order of Preachers o O.P.), o mas kilalang mga DOMINIKANO. Itinatag ni Santo Domingo ang orden na ito noong 1215, kasama ang anim na taga-sunod. At sa taon ding ito, nagsadya siya na may isang kasama sa Roma upang hingin ang pagsangayon at bendisyon ng Santo Papa Inocencio III. Enero 1217 nang mabigyan ng “written authority” mula sa bagong Papa Honorio III at naitatag orden ng mga Dominikano.

   Ang paglaganap ng pagdarasal ng santo rosaryo na isang “MARIAN DEVOTION”, ay ipinatutungkol nang dahil sa mga pangangaral ni Santo Domingo. Sa paglipas ng mga siglo, ang ROSARYO ang naging puso ng mga paring Dominikano. Sabi nga ni Papa Pio XI :

“The Rosary of Mary is the principle and foundation on which the very Order of Saint Dominic rests for making perfect the life of its members and obtaining the salvation of others”.

Si Santo Domingo ay ang pinagpakitaan ng Mahal na Birhen ng Santo Rosario, at sinabi nito sa kanya "Sa Pamamagitan ng rosaryo at eskapularyo, Ililigtas ko ang Mundo."

   Sa paglipas ng mga taon, ang mga Dominikano ang may mahalagang naiambag sa pagpapalaganap ng pagdarasal ng santo rosaryo at pagbibigay-diin sa paniniwala ng mga Katoliko sa kapangyarihan ng rosaryo. Si Santo Domingo ay namatay noong Agosto 6, 1221 sa Bologna, Italya. Taong 1234 ang taon ng kanyang Kanonisasyon. Ang Araw ng kanyang Kapistahan ay tuwing Agosto 8. Siya ay kinikilalang Patron ng mga Astronomo.

Pagdiriwang ng Parokya

   At bilang paggunita sa kanyang Kadakilaan na iniambag sa Inang Simbahan, ginunita sa Parokya ng Nuestra Señora del Santissimo Rosario ang kanyang Kapistahan. Bilang tagapagpalaganap ng debosyon ng pagrorosaryo, minarapat na gawin si Sto. Domingo bilang isa sa mga pangalawang patron ng parokya. Kasama ni Sto. Domingo si Sta. Catalina ng Siena na nagdiriwang naman tuwing ika-29 ng Mayo bilang mga pangunahing tagapagpalaganap ng debosyon.

   Ginanap sa parokya noong ika-6:00 ng umaga ang Banal na Misa sa pangunguna ni Rdo. P. Quirico L. Cruz, ama ng parokya, at isa sa kanyang binigyang diin sa kanyang homilya, ang pagiging dakila ni Sto. Domingo de Guzman na isa sa kinikilalang nagpalaganap ng debosyon sa pagdarasal ng Sto. Rosaryo, dahil na rin ang patron ng parokya ay ang Birhen ng Sto. Rosario, kaya napakadakila ng lapistahang ito para sa Sambayanan ng Diyos. Banal na Misa lamang ang ginanap at di na nagkaroon ng Banal na Prusisyon sa kadahilanang malaki na ang tubig sa ganung oras, kaya binigyang pugay na lamang si Sto. Domingo de Guzman sa pagdiriwang ng Banal na Misa.

STO. DOMINGO DE GUZMAN, IPANALANGIN MO KAMI!

Photo Courtesy: Elena V. Macapagal (Parish of N.S. del Santissimo Rosario)