PAOMBONG CULTURAL SECTION: Dakilang Kapistahan ng Katawan at Dugo ni Kristo: Pagdiriwang sa Parokya ni Santiago Apostol

   Nasaksihan ng lahat ng mananampalataya ng Paombong ang pagdiriwang ng Dakilang Kapistahan ng “Corpus Christi” o ang Katawan at Dugo ni Kristo. Dito itinanghal at binantayan ng iba’t ibang samahang pang-simbahan at mananampalataya ang Santisimo Sakramento sa altar. Kahit na malayo ang lakarin na tatahakin hindi ito alintana ng bawat isa lalo’t higit ang aming ginagalang at masipag na kura paroko na si Rdo. P. Prospero Tenorio na nagpakita at nagpamalas ng tunay na kahalagahan ng pagdiriwang ng Corpus Christi.

  Bawat tao na makakita at madaanan ng Santisimo Sakramento ay yumuyuko at nagbibigay galang tanda ng tunay na kabanalan ng Diyos. Bawat isa ay inaanyayahan na panibaguhin ang pagpapahalaga sa Banal na Eukaristiya. Ang pagkaing nagdudulot sa atin ng lakas para sa ating paglalakbay tungo sa kasaganahan ng buhay na walang hanggan. Sa bawat pakikiisa natin sa pagdiriwang ng Eukaristiya, nakikisalo tayo sa buong sambayanan ng Diyos sa pagsariwa sa pag-aalay ng Buhay ng Panginoong Jesus. At sa bawat pakikinabang natin sa Kanyang Katawan at Dugo sa Banal na Komunyon – ang Panginoong Jesus mismo ang ating tinatanggap, sa anyo ng Ostiya. Siya ang lakas na dumadaloy sa ating buong pagkatao, kaya winika ni Jesus sa kanyang mga alagad “Kayo ang magbigay sa kanila ng makakain,” panawagan din ito para sa atin na maging mulat sa pangangailangan ng ating kapwa. Tayo ay binahaginan ng Panginoon ng Kanyang mga biyaya at pagpapala, kaya dapat din nating ibahagi ang mga pagpapalang ito sa iba. Ang Eukaristiya ay hindi lamang inimbento ng simbahan o ng mga namumuno rito. Ito ay itinagubilin ni Kristo sa Kanyang mga alagad noong maganap ang pagsasalo-salo sa huling hapunan bago pahirapan at ipako sa krus si Jesus. Sinabi Niya. “Gawin ninyo ito sa pag-alaala sa akin.”

   Sa banal na Misa, naniniwala tayong ang tinapay at alak ay nagiging katawan at dugo ni Kristo ngunit sila sa anyo ng tinapay at alak ito ay tinatawag na “Transubstantiation”. Sa pamamagitan ng Eukaristiya ninais ni Kristo na manatili siyang kasama natin, hindi lamang upang Siya’y ating alalahanin. Ito ang tinatawag na “real presence” ni Kristo sa Eukaristiya. Pinapakita lamang ng mga mananampalataya ng Paombong na hindi mawawala ang kanilang tunay na pananampalataya. Buhay na buhay na naipakita ng mga mananampalataya ng Paombong ang kanilang masidhing debosyon at naipakita nila ang kanilang tunay na pananampalataya sa simpleng pamamaraan. Matanda at bata ay nagalak sapagkat naranasan nila ang pag-ibig na hatid ni Kristo sa Eukaristiya.

Photo Courtesy: Rev. Fr. Prospero V. Tenorio (Parish of Santiago Apostol)

Page 2 of 5

Please press Older Posts for Page 3.