PROGRAMA: Pandiyosesis na Sentro ng Katekesis (PASKA)

Isang samahang inatasan, 

na maging masugid na tagapagturo sa Simbahan.

Bilang mga natatanging tagapagpahayag ng doktrina,
nakatuon sa mga parokyano sa pananampalataya.

   Ang PASKA ay isang kilusang pansimbahan na nasa ilalim ng Komisyon ng Paghubog ng Diyosesis ng Malolos, ayon sa Balangkas ng Organisasyong Pandiyosesis na pinagtibay ni Lubhang Kgg. Cirilo R. Almario, Jr. D.D., Obispo ng Malolos at ng Kapulungan ng mga Pari noong Pebrero 1974, halos 37 na taon na ngayon ang nakaraan nang isusog noon ng Senado ng Kaparian ang pagkakaroon ng pangkalahatang mangangasiwa sa apostoladong katekesis sa Diyosesis. Ito ay upang higit na mapagbuti at mapatatag ang pagtuturo ng pananampalataya. Ang dating Katulong na Obispo ng Malolos, Lubhang Kgg. Ricardo Vidal,D.D. ang siyang naging kauna-unahang Makdiwang Patnugot. Makaraan ang tatlong (3) taon, nalipat ang posisyong ito kay Rdo. P. Aurelio Joaquin na kung saan ang pangkalahatang sentrong pampangasiwang kateketikal ay tinawag na “PASKA” (PANDIYOSESIS NA SENTRO NG KATEKESIS) at naitalaga ang Disyembre 20,1974 bilang opisyal na araw ng pagkakatatag.

Ang pagbabasbas ng mga kasapi ng Pandiyosesis na Sentro ng Katekesis o PASKA na nasa Parokya ni Sta. Elena Emperatriz sa pangunguna ng Kura Paroko, Rdo. P. Jaime B. Malanum.

   Ang mga unang taon ng PASKA ay lubhang naging mabunga at maunlad kaysa inaasahan lalo pa nga at ito ay nagsisimula pa lamang sa pagpapalakas. Kasalukuyan itong nasa pangangalaga ng Komisyon ng Paghubog sa pangunguna ni Rdo. P. Prospero V. Tenorio. Mayroon din itong sariling Makadiwang Patnugot sa katauhan ni Rdo. P. Angelito Caliwag. Kasama din naman sa mga tumutulong sa samahang ito ay ang Religious Catechists of Mary (RCM) na isang kongregasyon ng mga madre sa Diyosesis na itinalagang tumulong sa mga katekista.

Ilang kasapi ng PASKA-Sta. Elena noong pagbisita ng opisyal na imahen ni San Pedro Calungsod de Cebu, Patron ng mga Katekista sa Parokya ng Inmaculada Concepcion-Katedral at Basilika Minore sa Lungsod ng Malolos.

Ang pagbisita ng mga kasapi ng PASKA-Sta. Elena sa isa sa mga unang katekista ng parokya.

   Sa Parokya ni Sta. Elena, taong 1997 nang magkaroon ng ganitong samahan magpasa-hanggang ngayon ito ay buhay. Sa kasalukuyan may roon dalawamput-lima (25) silang miyembro, sa parokya at sa mga visita, labing walo (18) taong gulang ang pinakabata at animnapu’t lima (65) taong gulang ang pinaka matanda. Pinamunuan ng samahan ang iba’t-ibang mga gawain sa parokya tulad ng Unang Komunyon, Grade 3 and Parents Recollection, Fund Raising para sa kanilang pondo, Dental Mission at marami pang iba. Tuwing ikatlong Linggo ng buwan araw ng Miyerkules ang kanilang pulong at tuwing Martes naman ang araw ng kanilang pagtuturo sa ganap na hapon.

Panayam sa PASKA-Sta. Elena

Si Gng. Cynthia Dagohoy-Alcanzaren ang Pangulo ng PASKA-Sta. Elena. Siya ay asawa ni Rogelio Alcanzaren, isang laykong ministro at kapatid ni Rdo. P. Herminio Victoria Dagohoy, O.P. na paring anak-Hagonoy at kasalukuyang Rector Magnificus ng Pamantasan ni Sto. Tomas, Maynila.

Q: Nagtagal na po ang samahang pansimbahan sa loob ng 17 taon. Ano po ang masasabi ninyong sikretong taglay sa patuloy na pag-iral ng inyong samahan?

A: Ang PASKA sa Parokya ni Sta. Elena ay nagsimula noong taong 1997, ito ay humigit kumulang labing pitong taon na nga. Ang dahilan kung bakit patuloy ang pag-iral ng samahan ay dahil sa mga batang nangangailangan ng kaalamang espiritwal, mga batang nakikinig sa aming mga turo. Ang mga bata ang sikretong taglay at inspirasyon ng bawat mga katekista, sila ang nagbibigay lakas para patuloy kaming maglingkod.

Q: Paano po ba napapalakas ng mga hamon ang patuloy na pagtawag ng paglilingkod na buhay ng debosyon para sa inyong apostolado sa Simbahan?

A: Ang mga hamon ang nagsisilbi at nagbibigay ng kalakasan sa patuloy na pagtawag ng paglilingkod.

Q: Sa inyong palagay, patuloy nga po ba ang pagyabong o unti-unti pong nalalanta ang iba sa inyong kapisanan? Anu-ano po bang mga hakbang ang inyong pinagsusumikapang gawin sa pagtugon dito?

A: Sa aking palagay hindi lahat ng Katekista ay patuloy sa pagyabong o paglilingkod. May iba na ang katwiran ay alam na yon kaya hindi na dumadalo sa pagsasanay. Ang ilan naman ang dahilan ay may edad na sila. Pero mas nakalalamangang ang katekistang gustong pagyabungin ang kaalaman. Hindi natin masasklawan ang isipan at damdamin ng ibang mga kasapi. Patuloy ang aming paanyaya sa kanila upang paunlarin at linangin ang kanilang kaisipan at kakayahan.

Q: Sa inyo pong karanasan, ano po bang meron sa ispiritwalidad, apostolado at gawain ng samahang inyong kinabibilangan na nagpapalakas sa inyong pananampalataya at paglilingkod sa Simbahan?

A: Ang patuloy na paghubog ng kagandahang asal ng mga bata, pag-aaral, pakikinig at ang magbahagi ng Salita ng Diyos.

Q: Ano pong mensahe ang inyong maibibigay para sa inyong kapwa-kasapi sa inyong samahan pati na rin sa mga kabataan na nagnanais maging aktibo sa paglilingkod sa Simbahan?

A: Ang dapat nating pakatandaan ang una nating dapat pag-aralan upang maging isang mabuting lingkod ay ang pagiging maunawain, maging matyaga at maglingkod ng walang hinihinging kapalit.

Ang opisyal na larawan ng PASKA-Sta. Elena kasama ang Kura Paroko na si Rdo. P. Jaime B. Malanum at mga tagapayo mula sa Religious Catechists of Mary (RCM).

Photo Courtesy: Marvin M. Magbitang (Parokya ni Sta. Elena Emperatriz)