PANIMULANG ARTIKULO: PALIWANAG SA PAGBABASA NG SIPING ITO

PALIWANAG SA PAGBABASA NG SIPING ITO

   Nabuo ang siping ito upang ipakilala ang iba't ibang mga samahang pansimbahan na umiiral sa Bikarya ni Sta. Ana na binubuo ng siyam (9) na parokya sa Diyosesis ng Malolos. Mula dito ating makikita na iba't iba rin ang uri ng samahang pansimbahan base sa lawak ng sakop, sa gawaing apostolado at sa edad ng mga kasapi. Nais ipaliwanag dito ang mga paraan upang maunawaan ang mga uri ng samahan. Ang mga sumusunod na artikulo sa siping ito ay nakaayon sa pagsasaayos na ibinigay ng Pandiyosesis na Konseho ng mga Layko. Hinati ang bawat samahan at grupo sa limang bahagi.

I. Mga Samahan:

a. Mga Samahang Kinikilala (Mandated Organizations)

   Ang mga samahang ito ay binuo sa espisipikong gampanin na pinili ng kasapian bilang debosyon at apostolado para sa kapakanan ng Inang Simbahan. Lahat ng mga ito ay kasangayunan at dekreto mula sa iba't ibang Santo Papa sa mga nagdaang panahon at may pananagutan na tumulong sa bawat parokya. Sakop ng mga samahang ito ang iba't ibang mga parokya kaya naman maaari rin maging trans-parochial ang ganitong mga samahan.

b. Mga Samahang Pamparokya (Parochial Organizations)

   Ang mga samahang ito ay mga nakabase sa parokya at naitatag din sa loob ng parokya para sa isang natatanging gampanin. Maaari itong maging isang samahan na naglalayong paigtingin ang isang debosyon sa loob ng parokya o maaari itong maging isang kapatiran, cofradia o hermandad na nagtataguyod sa mga kapistahan o sa mga gawaing ispiritwal sa parokya.

II. Mga Samahang Programa (Programs)

   Ang mga samahang ito ay mga programang panghubog na itinatag para sa isang gampanin sa parokya na may kinalaman sa pagtuturo o sa ebanghelisasyon para sa ikauunlad ng mga parokyano sa pananampalataya. Maaari may lawak sa mga ito ang isang diyosesis at hinihikayat na maitatag sa bawat parokya.

III. Mga Samahang Kilusan (Movements)

   Ang mga samahang ito ay mga bunga ng mga paglulunsad ng mas masigla at mas karismatikong paraan ng paghuhubog at ebenghelisasyon sa pananampalataya. Mula dito lumalabas ang iba't ibang uri ng karanasan ng pakikipagkita sa Panginoong Jesukristo mula sa pagtalima ng bawa mananampalataya sa naganap na pagkakataon. Mayroong iba't ibang gawain ang mga kilusan tulad ng pagadalaw sa bahay-bahay o kaya naman ay may bihilya o sama-samang pananalangin bilang uri ng pagpapalakas ng tawag sa bokasyong Katoliko.

IV. Mga Ministeryo (Ministries)

   Ang mga samahang ito ay binubuo ng mga grupo ng may kinalaman sa mga gawain sa liturhiya. Kasama sa kaniang mga gampanin ang pagtulong sa mga bahagi ng Banal na Misa at pagtulong din sa mga mananampalataya sa loob ng mga pagdiriwang sa parokya.

V. Mga Sangguniang Tanging-uri (Sui generis Councils)

   Ang mga samahang ito ay kinabubuuan ng Sangguniang Pastoral at mga komisyon ng bawat parokya. Sangayon sa Batas ng Simbahan, tungkulin ng mga ito na “pag-aralan at pagdesisyunan ang iba't ibang mga bagay na may kinalaman sa gawaing pastoral at magmungkahi para sa ikayayaman ng isang partikular na Simbahan.” (Can. 511) Mula sa kalipunang ito gumagawa nga mga plano ang bawat Kura Paroko para sa kapakanan ng kanyang parokya.

   Mula po dito na magkaroon po kayo ng makabuluhan at kapaki-pakinabang na pagbabasa ng siping ito.