SAMAHANG KINIKILALA: Mother Butler Mission Guild

Pagtugon sa isang natatanging gampanin,

na tumulong at makiisa sa pagsasayos ng Simbahan
upang dakilain ang Diyos sa pagdiriwang.

   Ayon sa aklat ni Rdo. Msgr. Jose B. Aguinaldo, P.A. na 400 Bantayog ng Simbahan, dalawang uri ng samahang Mother Butler Mission Guild (MBMG) ang umiiral noon sa Parokya ni Sta. Ana. Ang lokal na samahan ng MBMG ay naitayo noong 1970 na sinimulan nina Salud Martinez – Pangulo, Viring Villanueva – Pangalawang Pangulo, Nene Carpio – Kalihim at Miling Esguera – Ingat-yaman. Kasapi nila noon sina Leonora Flores, Felising Agulto, Rosa Daguman, Monica Cruz, Valeriana Cabrera, Cleofas Calayag at Lolay Umali. Ang pangalawang grupo naman na Sta. Ana Mother Butler Mission Guild, na umusbong sa orihinal na samahang itinatag ni Mo. Marie Joseph Butler, RSHM na naglayong tumulong sa magtaguyod sa mga mahihirap na parokya at pagtulong sa mga pagsasaayos sa mga kagamitan ng simbahan, ay naitatag noong 1978 sa bisa ng kautusan ng Obispo ng Malolos. Isinugo ng Kura Paroko noon na si Msgr. Aguinaldo bilang delegato sa pulong para sa opisyal na pagtatatag ng MBMG si Gng. Remedios Bernal at mula dito nagsama ang luma at bagong samahan. Naging pamunuan ang mga sumusunod: Leonor Soco – Pangulo, Remedios Bernal – Pangalwang Pangulo, Norma Roque – Kalihim at Amalia Castro – Ingat-yaman.

Mga kasapi ng MBMG na tumutulong magbigay ng kasulya at estola sa mga pari noong Ika-22 anibersaryo ng pagiging Pambansang Dambana ng Simbahang Parokya ni Sta. Ana.

   Mula doon lumago ang mga kababaihang nagnanais na maglingkod para makatulong sa Simbahan. Ito ang tahanan ng Diyos na ninanais naming tulungan sa pamamagitan ng matiyagang pagpapaganda sa altar, paglilinis sa sanktuwaryo at sa sakristiya at pagaayos ng simbahan. Dito makikita na layunin ng MBMG na maglingkod sa simbahan sa pamamagitan ng sakripisyo para sa ikaaayos nga mga pagdiriwang ng Simbahan. Isa itong misyon ng kawanggawa at pagiging bukas-palad na nagiging inspirasyong ng bawat kasapi ng MBMG tuwing nagkakaroon ng palinis sa simbahan o pagbibigay sa mga nangangailangan. Malaki ang nagiging gampanin ng MBMG sa parokya lalo na samga malakihang pagdiriwang. Bilang isang Bayang Levitico, maraming anak-Hagonoy na pari ang umuuwi sa bayan lalo na tuwing kapistahan ni Apo Ana. Sa gayong mga pagkakataon masugid na ipinaghahanda ng mga kasapi ng MBMG ang mga kasuotang isusuot ng mga pari mula kasulya hanggang estola at pagliligpit ng mga ito matapos ang Banal na Misa.

Ilang kasapi ng MBMG at mga katekista na nananalangin sa harap ng imahen ni San Pedro Calungsod de Cebu sa harap ng simbahan.

   Sa ganitong mga pagkakataon, lubos kaming nagtitiwala sa lahat ng biyaya ng Diyos sa harap ng pagiging “nasa likod” ng lahat ng nangyayari. Sa gawain naming sa MBMG, isang malaking bagay ang makapag-alay ng sarili at kung anong mayroon ka. Kasama sa mga layunin namin ito na makikita sa pagnanais na makapagpundar ng mga kasulya at estola para sa mga pagdiriwang. Sa lahat ng mga ito, kapansin-pansin na sa mga simpleng gawain, makikita na nagiging malakas ang pananampalataya at mas nagnanais ang kasapi na maglingkod sa Diyos ang laykong kasapi ng MBMG sa pamamagitan ng pagdamay sa paglilinis sa simbahan.

Photo Courtesy: Arvin Kim M. Lopez (Pambansang Dambana ni Sta. Ana) at Sem. Kendrick Ivan B. Panganiban (Publication Director)