NATATANGING KAPUTOL: Masiglang Pagdiriwang ng Kristong Hari sa Parokyang Misyon ng Sta. Cruz

Sa pasimula ng isang bagong panunungkulan,

parokya'y nagbunyi't nagdiwang,
bilang pasasalamat kay Kristong Hari na 
Kabanal-banalan.

   “Si Kristo’y hari ng sanlibutan Siya’y ating parangalan”, Isang naiibang pagdiriwang ang ginanap sa pangmisyong parokya ng Sta. Cruz sa bayan ng Paombong, upang bigyang-daan ang maringal na kapistahan ng Kristong Hari na malayo sa dating kinagawain ng mga taga-roon. Ang nasabing pagdiriwang ay kadalasang ginagawa lamang sa palibot ng nayon habang ang mga tao ay naglalakad sa kalsada, ngunit nitong nakaraang ika – 23 ng Nobyembre, 2014, ayon na rin sa napagkasunduan ng mga likod ng simbahan sa nakaraan nilang pagpupulong sa pangunguna na Kura Paroko na si Rdo. P. Leopoldo Evangelista III na gawin ang pagdiriwang sa pamamagitan ng isang “fluvial procession” o pagoda.

   Kaya’t noong mismong araw ng Kapistahan ng Kristong Hari ay sinimulan ito sa Sitio Balut, isa sa mga karatig barangay na nasasakupan ng parokya. Mag-iika-isa ng hapon ng lumunsad ang mga taong lulan ng kanilang Bangka upang makiisa, samantalang sa kasko naman isinakay ang Banal na Santisimo kasama ang kura paroko na si Rdo. P. Leopoldo Evangelista III at ng iba pang mga tao.

Ang naganap na Dakilang Kapistahan ng Kristong Hari sa Sta. Cruz, Paombong sa pangunguna ng bagong Kura Paroko, Rdo. P. Leopoldo Evangelista III.

   Nakatutuwang pagmasdan na Makita ang mga taong higit ang pananampalataya sa poong lumikha na lulan ng maliliit na Bangka habang lumiligid at nagpapaikut-ikot sa kasko, taglay ang pananalig at pag-asa na sila ay pagkalooban ng mga biyayang kanilang hinihiling. Sa kabila nito ang nakapapasong init ng araw na tirik na tirik noong oras na iyon ay hindi naging hadlang upang itigil ang kanilang ginagawang pakikiisa sa pagdiriwang. Halos magiika-5:00 na ng hapon nang dumating ang Banal na Santisimo na mismong parokya. Dito ay sinalubong ito ng mga tao ng hindi nagkaroon ng pagkakataong makasama sa isinagawang pagoda. Sa pagkakataong ito ay inilibot ang Banal na Santisimo sa palibot ng nayon habang nakasunod ang maraming tao. Sa kabila ng nakapapagod na oras na iyon ay hindi nabanaag sa muhka ng mga tao ang labis na pagod. Pagkatapos ng isinagawang prusisyon ay isinunod ang Banal na Misa bilang pagpaparanagal kay Kristong Hari. Ito ay pinangungunahan ng Kura Paroko ng lugar. Sa kanyang homily ay binigyang-diin ang ilang bagay tulad na lamang ng tungkulin at gampanin ng isang hari, na kung saan ito ang isang kinikilalang pinakamakapangyarihan at maimpluwensya sa lugar na kanyang nasasakupan, nagsusuot ng magagarang kasuotan, nakukuha ang mga bagay na ninanais at pinaglilingkuran ng mga tao, taliwas o kabalintunaan ng pagiging hari ni Kristo sapagkat si Kristo ang haring namuhay nang aba at nag-alay ng kanyang buhay para sa sanlibutan.

Ang pagsalubong ng ilang kasapi ng Sangguniang Pastoral ng parokya sa nasabing pagdiriwang.

   Sa kaligitnaan ng pagdiriwang ng Banal na Misa ay ginanap ang pormal na pagkilala sa mga Lay Ministers na magiging katuwang ng pari sa pagdiriwang ng misa at ng iba pang gawaing pangsimbahan. Tunay na masarap sa pakiramdam at nakatataba ng puso na ang mga taong nabibilang sa grupong ito ay sadyang mapalad sapagkat nagkaroon sila ng pagkakataong maglingkod sa Hari ng Sanlibutan!

Photo Courtesy: Rosalie C. San Juan (Parokyang Misyong ng Sta. Cruz)