KULTURA: Mabuhay ang Kristong Hari!: Ang Pagdiriwang para sa Panginoong Jesu-Kristo sa Parokya ng Ina ng Laging Saklolo

     Ipinag-utos ni Papa Pio XI ang pagtatalaga na sa tuwing huling linggo ng Oktubre ang Kristong Hari. Samantalang nagtakda naman ng panibagong araw ng kapistahan ng Kristong Hari si Pope Paul VI noong 1969 na sa huling Linggo ng pang liturhiyang kalendaryo ng simbahan o tuwing huling linggo ng Nobyembre. Ngunit ano nga ba ang kahalagahan ng Kristong Hari? Ang Kristong hari ay ang kapistahan ng pag-anyaya upang gawing sentro si Hesus ng ating buhay. Sinasabi din dito ang paglagay nasa gitna si Hesus at Siya ang dapat unahin bago ang iba.

Unang Istasyon ng Prusisyon ng Kristong Hari: Visita ni San Isidro Labrador (San Isidro II, Paombong, Bulakan)

Ang panalangin sa harap ng Banal na Sakramento sa visita sa prusisyon ng Kristong Hari. Mapapansin si Rdo. P. Carlo S. Soro, ang bagong Kura Paroko na nananalangin sa kanan kasama si Sem. Kendrick Ivan B. Panganiban, Publication Director ng pahayagang ito.

  Noong ika-15 ng Nobyembre 2013, araw ng Biyernes sinimulan ang misa nobenaryo para sa kapistahan ng kristong hari. Ginanap ang misa nobenaryo sa Parokya ng Ina ng Laging Saklolo sa pangunguna ng ating bagong Kura Paroko na si Rdo. P. Carlo S. Soro. Ang misa nobenaryo ay isinasagawa tuwing ika-6 ng gabi at 9 na araw bago ang Dakilang Kapistahan ng Kristong Hari.

Ikalawang Istasyon ng Prusisyon ng Kristong Hari: Daan tungo sa Visita ng Mahal na Birhen ng Lourdes (Abulalas, Hagonoy, Bulakan)

  Noong ika-23 ng Nobyembre, araw ng Sabado naganap ang Bisperas ng Kristong Hari. Isinagawa ang paghahanda para sa kapistahan. Sama-samang naglinis at nagdisenyo ng ating parokya ang mga lingkod ng simbahan. Nakiisa dito ang ilang kabataan o ang PCY ng Ina ng Laging Saklolo. Nakiisa din ang Redemptorist Mater Chorale sa pag-aayos, matapos tumulong sila ay nagsagawa ng pagsasanay bilang paghahanda sa kapistahan. Samantalang nakiisa din ang ating Kura Paroko sa paglilinis at pag-aayos at matapos niang tumulong sa paglilinis, siya ay nakiisa sa paghahanda at nagturo sa grand choir ng parokya.

Ikatlong Istasyon ng Prusisyon ng Kristong Hari: Visita ni San Pedro Apostol (San Pedro, Hagonoy, Bulakan)

Ika-apat na Istasyon ng Prusisyon ng Kristong Hari: Daan tungo sa Visita ni San Pablo Apostol (San Pablo, Hagonoy, Bulakan)

   Isinagawa ang Banal na Misa para sa Bisperas ng Kristong Hari sa ganap na ika-6 ng gabi. Pagkatapos ng misa para sa Bisperas ng Kristong Hari, Inilibot at Itinanghal ang banal na sakramento sa parokya. Samantalang habang nakatanghal ang banal na sakramento ang sambayanan ay nagsasagawa ng isang oras na pagbabantay habang nagsasagawa ng banal na oras.

Patungo sa Parokya ng Ina ng Laging Saklolo, ang ika-lima at huling istasyon ng Prusisyon ng Kristong Hari.

    Noong ika-24 ng Nobyembre taong 2013 naganap ang Dakilang Kapistahan ng Kristong Hari. Maraming tao ang nakiisa sa naturang kapistahan upang magbigay puri at magbigay parangal kay Kristo na ating Hari. Lahat ng taong nakiisa sa prusisyon ay nagsuot ng puting damit upang magbigay galang sa ating Kristong Hari. Ang prusisyon ay pinangunahan ng ating Kura Paroko na si Rdo. P. Carlo S. Soro habang buhat niya ang Banal na Sakramento. Ang prusisyon ay nagmula sa parokya patungo sa Kapilya ni San Isidro Labrador sa San Isidro II, Paombong. Sumunod naman ay tumungo sa Abulalas, sa Kapilya ni San Pedro Apostol, sa San Pablo at matapos ay bumalik sa ating Parokya ng Ina ng Laging Saklolo. Matapos ang tatlong oras na prusisyon ay sinimulan naman ang Banal na Misa. 

Ang pagdiriwang ng Banal na Misa sa pangunguna ni Rdo. P. Carlo S. Soro, Kura Paroko ng Parokya ng Ina ng Laging Saklolo.

     Ang naturang kapistahan ay matagumpay na naisagawa at tanda ng pagpupugay sa Panginoon na binigyang-pansin ni P. Soro sa kanyang homilya. Tunay nga na sa pagdiriwang na ito, ating sambit ang pagsigaw ng ating Kura Paroko, “Mabuhay ang Kristong Hari! Mabuhay ang Kristong Hari! Mabuhay ang Kristong Hari!”

Photo Courtesy: Maricel M. Robles and Ivea P. Domingo

                             Parokya ng Ina ng Laging Saklolo 
                            San Pedro, Hagonoy, Bulakan