PANITIKAN/LITERARY: Simbang Gabi

Mula sa Editor: Isang magandang tradisyon ng Simbahang Katolika sa Pilipinas ang Simbang Gabi, isang natatanging nobenaryo sa karangalan ng parating ng Diyos Anak na si Hesus at pati na rin sa paglilihi ng Mahal na Birheng Maria. Isang pagpapakita ng tradisyong ito na ginagawa sa mga parokya sa Hagonoy ang tulang ito.

SIMBANG GABI

Hangin ay mahalumigmig

Tubig, kahit walang yelo'y malamig

Sa balana'y nagpapahiwatig

Kapaskuha'y nasa paligid.

Buong mundo'y nagdiriwang

Pagsapit nitong araw at buwan

Dakilang petsa ng kapanganakan

ni Kristong Bunyi at Hirang.

Madlang Hagonoeño, hindi babayaang

Pagsilang ng Anak ng Maykapal

Humayo at dumatal

Nang ganuon lamang.

Kaugaliang iniwi at inalagaan

Ng sangka-kristiyanuhan

Pinagyaman nitong ating bayan

Simbang gabing pinagpupuyatan.

Ito, ayon sa kasaysayan

Pagbibigay-pagkakataon ng kastilang kaparian

Sa mananampalatayang tanan

Makapagsimba bago tumungo sa kabukiran,

o tumugpa sa karagatan.

Pasasalamat sa patuloy na biyaya

Kaalinsabay ng paghingi ng awa

Basbas sa huli at aning masagana

Bunga ng pagsisikhay at pagtitiyaga. 

Ayon pa sa ipinamanang bilin

Sa pagsisiyam na walang liban

Asahang matutupad at kakamtin

Itinaas sa Diyos na kahilingan.

Mula nuon hanggang ngayon,

Laging hintay, ganitong okayon.

Gabi pa'y handa na ang kauotan

Hinihintay, alarma ng kalikasan.

"Tik-tilaok!", tili ng manok - ang inaabangan

Hudyat ng pagbangon, pagbibihis ng agaran

Upang mauna sa simbahan

Baka maubusan ng upuan.

Maliwanag sa daan

Masinag pa ang buwan

Sama-sama, pamilya at barkadahan

Naglalakad, walang patid ang kuwentuhan.

Patyo ng simbahan

Naglalagablab sa ilaw na kawan-kawan

Nag-aanyaya sa buong bayan

"Halina at tayo'y magdiwang."

Di mawawaglit sa isipan

Bibingka't puto bumbong, may libreng mainit na tsaa

Mabibili paglabas, matapos ang misa

Sa agahan, mag-anak, ito'y pagsasaluhan.

Banal na Misa ay buhay

Awitin ay masasayang tunay

Ginigising pananampalatayang wari'y maibay

Upang manumbalik, sigla ng malay,

Damdaming nagpanibago,

Sigla ang baon paglabas ng simbahan

Tila bagong tao

Pagdating sa tahanan.

Lundo ng nobenaryo

Kasiyahang todo-todo

Isang Misa de Aguinaldo

Pagpupuri sa Mahal na Kristo.

Photo Courtesy: John Andrew C. Libao

                       Pambansang Dambana at Parokya ni Sta. Ana

                       Sto. Niño, Hagonoy, Bulakan

Page 6 of 6

Please press Older Posts for the October Special Issue.