KULTURA: Pistang Dagat para kay San Martin: Isang Pagpaparangal ng mga Mananampalataya ng Pugad

     Si San Martin ng Porres ay isinilang noong ika-9 ng Disyembre, taong 1579 sa Lima, Peru sa Timong Amerika. Mula sa pagiging isang maitim na alipin, isa siya sa mga naging unang santo mula sa Timong Amerika. Siya rin naman ay kilala bilang isa sa mga pinakasikat sa mga Dominikong Santo. Siya ay nakilala sa mga kahanga-hanga niyang panggagamot sa mga maysakit, lalo na sa mga bata. Namatay noong ika-3 ng Nobyembre sa kanyang sinilangang bansa. Iyon din ang araw ng kanyang kapistahan na ipinagdiriwang ng Simbahang Katolika taun-taon.

Ang parola ng bayan ng Hagonoy, Bulakan kung saan ginaganap ang Pistang Dagat sa karangalan ni San Martin de Porres.

     Sa Parokya ni Sta. Elena sa Hagonoy, sa dakong Isla ng Pugad ,mahigit na sa apatnapung taong nang ipinagdiriwang ang kapistahan na ito San Martin. Espesyal at naiiba ang pista na ito sapagkat ito ay “Pista sa Dagat” o kaya naman ay “Pistang Dagat.” Ayon sa matandang kuwento, taong 1970 noong ito ay pinasimulan ng mga Misyonerong Madre na nagmula pa sa Pakistan. Sa pangunguna ni Sr. Ofcillion at mga kasama pinasimulan ito sa isla ng Pugad dahil noong panahong iyon ay masyadong hitik at sagana ang kabuhayan sa dagat, maging sa ilog ng Hagonoy. Kaya naisipan ng mga Misyonerong Madre na magdiwang ng pistang pasasalamat sa karagatan para sa karangalan ni San Martin ng Porres. Simula noon hindi naputol at naging tradisyon na ang kapistahan sa dagat.

Ang pagsama-sama ng mga bangka na may sakay na mga mananampalataya ng Pugad at mga kapwa-barrio na sakop ng Parokya ni Sta. Elena Emperatriz na naghahanda para sa Banal na Misa.

Dinala ang imahen ni Apo Elena sa bangka upang makasama sa pagdiriwang ng Pistang Dagat
sa isla ng Pugad, Hagonoy.

     Nito lamang ika-6 ng Nobyembre sa ganap na ika-2:00 n.h. ay muling ipinagdiwang ang Pistang Dagat. Sa halip na ika-3 ng Nobyembre, isinagawa ito noong ika-6 ng Nobyembre araw ng Sabado ang dahilan ay itinapat ng araw ng Misa sa Isla. Habang nagtitipon ang mga bangka inumpisahan ito sa simpleng pagoda habang inaantay ang iba pang mga dadalo nag-iikot ikot ang mga bangka sa bukana ng dagat na tila nag iimbita pa ng mga bangka. Naki-isa ang iba’t ibang samahan, ang Isla ng Tibaguin, Brgy. Sagrada Familia, pati na ang mga taga-Sta. Elena, lalo na ang buong suporta ng buong Isla ng Pugad. Matapos ang pagoda nagtipon ang mga bangka malapit sa Parola ng Isla, para doon mismo isagawa ang Banal na Misa. Ang lahat ng patron na sakop ng Parokya ni Sta. Elena, ay nakasakay sa isang sudsod na bangka na nagsilbing Altar. Nakaikot sa sudsod ang maraming mga bangka. Ang Banal na Misa ay pinangunahan ng dating kura paroko na si Rdo. P. Efren G. Basco. Sa kanyang homilya binigyan niya ng diin na ipanalangin naming ang mga taga Tacloban at ang iba pang sinalanta ng Bagyong Yolanda. Dahil noong araw na iyon ay kasalukuyang dinaranas ng mga ito ang pananalasa ng Bagyon na siyang pinaka malakas na bagyo sa buong mundo. Sinabi din ni P. Basco na dapat kaming magpasalamat dahil hindi natin naranasan ang ganoong kalamidad. Lalo na ang mga biyayang aming natatanggap lalo na sa dagat mga biyayang galing sa Panginoon. Kahit na malakas ang hangin at may alon, pinagpala kami dahil makulimlim man ay hindi umulan. At naging matagumpay ang pagdiriwang ng kapistahan. 

Ang bangka kung saan nakahanda ang imahen ni San Martin de Porres, gayun din naman kasama ang altar ng pagdiriwang.

    Natapos ito sa payak na salu-salo sa mga bangka. Sadyang dito ipinapakita na sa lahat ng biyayang tinanggap ng mga taga-Hagonoy, ito ay walang iba kundi ang katubigan na kung saan hinihingi lagi ng mga anak ng Pugad ang pagpipintikasi ni San Martin de Porres.

San Martin de Porres, Ipanalangin mo kami!

Photo Courtesy: Marvin M. Magbitang

                             Parokya ni Sta. Elena Emperatriz

                             Sta. Elena, Hagonoy, Bulakan