KULTURA | CULTURE: BUNYING STO. NIÑO: Ilang Pagninilay sa Debosyon sa Haring Sanggol

     Angat na angat sa ating mga Pilipino ang kapistahang ito, ang pagdiriwang ng Kapistahan ng Sto. Niño. Maraming bayan at lugar ang nakikiisa sa pagdiriwang na ito. Tulad ng Lungsod ng Cebu, kilalang-kilala sila sa kanilang pagdiriwang ng kapistahan ng Sto. Niño na kung tawagin nila ay Sinulog Festival. Ngunit sa kapistahan ng Sto. Niño dito sa ating bansang Pilipinas, may ipinapaalala sa atin na dalawang bagay: (1.) minsa’y naging bata ang Panginoong Jesus, at (2.) ang pagdating sa atin ng pananampalatayang Kristiyano sa ating bansa.

   Hindi lang sa Lungsod ng Cebu nagkaroon ng kapistahan o sa ibang lugar at bayan, nakiisa rin ang Parokya ng Nuestra Señora del Santissimo Rosario sa pagdiriwang ng Kapistahan ng Sto. Niño. Ganap na ika-7:30 ng umaga idinaos ang Banal na Misa sa pangunguna ng ama ng paropkya na si Rdo. P. Quirico L. Cruz. Ayon sa kanyang homilya “Napakadakila ng kapistahang ito dahil sa pagdating ng Imahen ng Sto. Niño sa Cebu naganap ang kaluwalhatian ng Diyos sa bansang Pilipinas at dito naganap ang unang pagbibinyag."

     Pagkatapos ng Banal na Misa, isinunod ang maringal na prusisyon sa karangalan ng Sto. Niño. Napakaraming bata ang sumunod sa prusisyon at makikita sa kanilang mga mukha ang kasiyahan sa kanilang mga dala-dalang imahen ng Sto. Niño. Isa rin sa nagpatingkad ng Banal na Prusisyon ang mga batang nagati-atihan - “Pit Señor” ang kanilang mga isinisigaw kasabay ng kanilang pag-indak. Napakasaya at naging makabuluhan ang naging pagdiriwang ng kapistahan ng Sto. Niño sa Parokya ng Nuestra Señora del Santissimo Rosario. Kailanman ay hindi na maiaalis sa ating mga Pilipino ang ganitong pagdiriwang ng Kapistahan ng Sto. Niño. “PIT SEÑOR”

BUNYING STO. NIÑO, Kaawaan Mo Kami!

Photo Courtesy: Ma. Theresa G. Perona
                          Parish of Nuestra Señora del Santissimo
                          Rosario