LITANYA NG MAHAL NA BIRHEN: MATER AMABILIS (Inang Kaibig-ibig)

Mary, Mediatrix of All Grace

Mater Amabilis

Kaibig-ibig na hindi malirip

ang Diyos ng ating sumusukong Langit;

kabutihan Niya'y walang kahulilip

na batobalani ng ating pag-ibig;

kasunod ng Diyos, matimyas na labis

ang INA NG VERBONG walang kasing tamis;

sa dilang nilalang ang Birheng mabait,

walang kasing-rikit at kaibig-ibig;

Ikaw po ang Ina, Mater Amabilis,

tampulan ng aming pusong umiibig

---o0o---

Sa dilang nilikha'y ganap na magaling

at ungos sa lahat itong Inang Birhen;

kaya siya'y mahal nitong Diyos natin,

na higit sa lahat ng lalang na tambing;

buti, ganda, grasya't yamang kayang kamtin,

nabuhos na lahat sa Inang magiliw;

kaibig-ibig po kayong walang maliw,

ang Inyong kariktan ay walang kahambing;

ito ang hiwagang ninilaynilayin

sa tula ng anak ninyong mapaglambing.

---o0o---

Ang ganda po ninyo'y walang makatulad,

higit pa sa buwang reyna sa magdamag;

kayo'y kagandahang... pintor ang may haplas

at ang pintor ninyo'y Diyos nating liyag;

Diyos na Maylikha ng bundok at gubat,

ng magandang parang halama't bulaklak;

ang Lumalang niyong ilog, sapa, dagat,

ang Siyang lumalang sa Inyo pong dilag;

kaya't ang ganda po ninyo'y mapamihag,

di-kayang tanggihan ng pusong nabihag.

---o0o---

Pinaganda kayo sa dilang nilalang,

pagkat Reyna kayo ng Sandaigdigan;

sa Lumang Panahon kayo'y nalarawan

sa Reynang si Judit na sa ganda'y buwan;

punong Holofernes ng lupang kaaway,

sa tabak na dala'y kanyang niyurakan;

inyadya ang tao sa ka-alipinan,

sa mundo ang dulot... grasya't kaligtasan.

---o0o---

Ang Reynang si Ester ay kaakit-akit,

larawan ng Birhen na kaibig-ibig;

sa ganda ng reyna ang haring may-galit

lubhang napayapa't nasubhan ang ngitngit;

naligtas ang kanyang bayang tinangkilik

sa dusa't siphayo, hirap at ligalig;

ang Birhen kong Ina sa karikta'y higit,

sininta ng Hari't Diyos ng Pag-ibig;

hinirang po siyang Ina niyang ibig

at Reyna ng kanyang Kahariang Langit.

---o0o---

Wika ni San Andres – bantayog si Maria,

nililok ng Diyos na Maylikhang Ama

magandang “estatwang” walang makapara,

na kahanga-hangang animo ay “diosa.”

walang makaparis... ani Bernardita,

ang ganda ng Birhen, kahit sa estampa.

Anang Tatlong bata doon sa Fatima, -

“BABAENG MAGANDA ang aming nakita”;

ang guhit ng pintor ay di-makagaya

sa kariktang iwi ng magandang Ina.

---o0o---

Sa kagandahan po ng magandang Birhen,

ganda ng kaluluwa'y lalong nagniningning;

busilak na puso, banal na damdamin,

kariktang sariwa ng diwang mahinhin;

walang batagkayong kilos-kabilanin,

sa yumi ay walang kasalanang lihim

bukang-liwayway na banaag sa dilim,

sing-ganda ng buwan at talang maningning;

nakakakilabot na hukbong magiting,

na ang binabaka'y kaaway na lagim.

---o0o---

Ang Diyos sa Kanyang kagalingang wagas,

dapat na ibigin nang lalo sa lahat,

datapwa't si Mariang “magandang bulaklak”,

sa kanyang karikta'y dapat sa pagliyag;

higit pa sa anghel at santong sumikat,

ang Birhe'y mahalin nang lalong di-hamak;

tayo'y mga anak na sa Kanya'y bihag,

masuyo sa Kanyang Inang sakdal timyas;

kaibig-ibig nga siyang walang kupas,

na takbuhan natin sa lahat ng oras.

---o0o---

Bilang pagmamahal ay gawing salamin

ang ganda ng asal nitong Inang birhen;

sa araw at gabi Rosaryo'y pagiliw;

ang pista ng Ina'y ipagsaya natin

at ang kanyang dangal ay awit-awitin;

Mater Amabilis, mahal ka sa akin,

ang pag-ibig ko po'y walang pagmamaliw;

ang pag-ibig pong ito'y inyong pag-alabin,

upang sumambula na bulkang pagiliw.

Page 3 of 8

Please press Older Posts for Page 4.