LITANYA NG MAHAL NA BIRHEN: MATER CHRISTI (Ina ni Kristo)

Nuestra Señora delas Islas Filipinas
G. Ramon Panganiban

Mater Christi

Si Maria'y INA,... si KRISTO ang Anak,

MAG-INANG kay palad,... kaiba sa lahat;

KRISTO ang sumilang sa sang-maliwanag,

May pahid na langis na sa Langit buhat;

KRISTO: Guro, Hari... Pari Siyang ganap,

Na sa mundong ito'y manaog at sukat;

Kaya MATER CHRISTI ang Kanyang pamagat,

INA KA NI KRISTO... O Birheng marilag!

---o0o---

Ang taong may diwa at pusong nilalang,

Madalas sa dilim bulag na mabuwal;

Puso'y nalalason sa hunghang na asal

At nasubasob sa mali ring aral;

Kaya itong Kristong karunungang – lantay,

Sumilang na Gurong sa mundo'y patnubay;

Ibinabandila ay katotohanan

At ang hinihawi'y dilang kamalian.

---o0o---

Siya ang nagturo nang daan sa Langit

na puno ng dusa at mga panganib;

ang IGLESYANG TUNAY kanyang itinitindig,

upang magpatuloy ang misyong marikit;

ang PAPA'y ginawang “infalibeng” tikis,

nang hindi mamaling Guro ng daigdig;

si Kristo ang tanglaw sa puso at isip,

ang Anak ng Birheng Inang matangkilik.

---o0o---

Si KRISTO AY HARING... walang kamatayan,

na sa puso't diwa nakikiluyaw;

at krus ang Kanyang tronong ginintuan;

ang setro ay pakong tumagos sa laman,

pagka't Siya'y Haring dala'y katubusan;

Hari ng pag-ibig sa Sangkatauhan,

kaharian Niya'y grasya't kabanalan.

---o0o---

Ang utos ng Hari'y tuparin ang lahat,

na sa pangangaral ay Kanyang inyatas;

halimbawa Niya'y bakasing maingat;

sapagkat sa buhay Siya'y ating landas;

---o0o---

Maamo ang loob, mababang-di-hamak

ang PUSO NI KRISTONG Hari ng pagliyag;

Kaya itong Ina'y Reyna namang wagas

na sa Kristong Hari nagmana nang lahat.

---o0o---

Si KRISTO ay PARI sa Langit at Lupa,

tungkuli'y maghandog sa Amang Bathala;

Sa krus iniyalay... dugo, laman,... diwa,

sa ikatutubos ng taong timawa;

sa Misa ninais... ito'y manariwa,

kaya araw-araw Misa'y ginagawa;

ang ibig sabihin ng KRISTONG salita,

Siya'y Guro, Hari at Paring dakila.

---o0o---

Ang Ina ni Kristo'y natalamsikan din

nang giting at bisa ng Kanyang tungkulin;

pagka't Siya'y INANG sa tao'y magiliw,

nagsa-guro Siyang turo'y walang maliw;

ang linis ng puso na walang kahambing

ay aral na parang talang nagniningning;

ang bait at sipag, kilos, asal, hinhin,

… kabanalang wagas na dapat kopyahin.

---o0o---

Si Maria'y Reyna ng anghel sa langit,

ng Santo at Santa,... ng buong daigdig;

naghahari Siya sa grasyang matamis

na sa bawat anak ay inilalawit;

makapangyarihan Siyang taga-sungkit

NANG AWA NG DIYOS na dapat makamit;

bilang Reyna natin ang bilin at nais:

putulin ang salang sa Bunso'y mapait!

---o0o---

Sa mundong madilim at ubod nang saklap,

ang Mag-Inang Kristo'y pag-asa at lunas;

ang taong sa yabang at muhi'y nasadlak,

dapat manunumbalik kay Kristong Mesiyas;

si KRISTO'T ANG BIRHEN,... kilalani'y dapat,

na Guro at Pari... at Hari ng lahat;

sa kanyang pagsunod sa BIRHENG busilak,

itong sawing mundo lamang maliligtas.