LITANYA NG MAHAL NA BIRHEN: VIRGO PRAEDICANDA (Birheng dapat Ipabantog)

Mater Ecclesiae
G. Kim Pimentel

Virgo Praedicanda

Ang BIRHEN kong MAKALANGIT na lipos ng kabunyian,

sa apat nitong mundo'y dapat ipangaral;

Siya'y VIRGO PRAEDICANDA, at sa buong daigdigan

ang dakilang Puri Niya'y nararapat na isigaw;

sa altar na dalanginan Siya'y dapat na itanghal

at purihin sa pulpito't ipagdiwang sa Simbahan;

bawa't tao, bawa't nayon, bawa't bansa, bawa't bayan,

kailangang itong Birhe'y ipagbantog at igalang!

---o0o---

Kaya ngayon ay nagkalat sa palibot ng daigdig

ang Simbahang di mabilang na handog sa Birheng ibig;

ang altar sa Birheng Ina sa simbaha'y itinirik

at larawang magagara ang sa Kanya'y inihawig;

bawat buwan ay may pistang “pagdiriwang na marikit

na sa Kanyang karangala'y pabubunying ubod-tamis;”

dinadasal ang Rosaryo, kalmen Niya'y nasa-dibdib

at medalyang dala-dala ay sagisag ng pag-ibig.

---o0o---

Papaano itong Birhe'y pinagyaman ni Bathala,

binalot ng karangalang di-malirip at dakila;

kaya dapat ipabantog... ipagbunyian sa madla

itong Birheng tuwa't aliw sa libis ng dusa't luha;

pagkat bawat pagpupuri sa Birhen kong masanghaya

ay papuri't pagbubunyi sa Anak na kanyang mutya;

ang debosyon sa Birhen kong pintuho ng laksa-laksa

ay laging kinalulugdan ni Jesus na natutuwa.

---o0o---

Ang pagalang na ganito at hayagang pagbubunyi

ay sangayon sa katwira't pananalig nitong budhi;

sa lahat ng mga bansa ay palasak na ugali

na ang Birheng Ina nati'y dakilain nang palagi;

ang Simbahang siyang Inang “nagtuturong walang-mali”

“Birheng dapat Ipagbantog” kung sa Birhe'y magtaguri;

Siya rin ang humalang “lahat daw ng mga lipi,

Mapalad na tatawagin siyang Ina na napili.”

---o0o---

Ang PAGSAMBA'Y pamahayag ng Pananampalataya

sa Dios nating Panginoong kataastaasang Ama;

hinihayag ang tiwalang “merong hindi nakikita

na daigdig na di-abot ng mahinang mga mata;”

para manding isang sumbat sa maraming taong iba,

na akala itong mundo'y paraiso at langit na;

ang pagsamba'y nagmumulat “tayo'y dapat kumilala

sa Maykapal at sa buhay sa kabilang walang hanggan.”

---o0o---

Ang pagalang at pintuhong hayagan sa mga Banal

ay PAGSAMBA ng Sakilang Panginoon at Maykapal;

pagkat silang mga SANTO kaya lamang naging banal

ay dahilan sa biyayang kay Bathala ay nakamtan;

sila'y taong tulad nating may buto at lupang-laman,

may hilig ding masasama at may tuksong kinalaban;

ngunit sila ay bayaning... kasalana'y tinalikdan

sa tulong ng Panginoong inibig na walang hanggan.

---o0o---

Kung “sila” ay pintuhuin at sundan ang mga yapak

ay Diyos ang sinasamba't tuwiran kong nililiyag;

kaya nga sa pag-dakila sa Birhen kong mapamihag,

Diyos nating iniibig ang bantog na sumisikat;

kaya tuwing ibabantog itong Birheng sakdal dilag,

nababantog ANG PAGIBIG sa kanya sa Diyos Anak;

ang PAGIBIG ng Diyos Ama sa “anak na Birheng tapat”

at ng Espritu Santo sa Esposang mabusilak.

---o0o---

Sa Banal na Paghahandog sa altar ng Santa Misa,

lalo tayong buong dingal sa Maygawa'y sumasamba;

Misa'y handog natin sa Dios, ngunit ito kay Maria

ay tampok ng pagl'walhati't pagdarangal na masaya;

Kanyang Anak na sa Misa ay ang “Pari at biktima,”

kaya naman ang Birheng ko'y kaugnay sa pagmimisa;

kaya tuwing sa dambana'y merong Paring Nagmimisa,

binabantog natin doon itong ATING BIRHENG INA!