LITANYA NG MAHAL NA BIRHEN: REGINA SINE LABE CONCEPTA (Reynang Ipinaglihing Walang Salang Orihinal)

Nuestra Señora dela Alegria
G. Ronald M. Santos

Regina Sine Labe Concepta

Sa  bunton  ng  mga  tao  at  nilikha  sa  daigdig

ang  Birhen  ay  bukod-tanging  naging  REYNANG  sakdal-linis;

kakaiba  sa  lahat  ng  nilalang  ng  Poong  ibig,

pagka't  Siya'y itinampok  sa  dambana  nitong  Langit;

sa  sala  ni  NUNONG  ADAN  ay  nagmana  tayong  tikis,

tayong  lahat  ng  nilalang  ay  sumilang  na  may  dungis;

nguni't  itong   Reynang  Birhen,  sapul  nuong  unang  saglit,

siya'y  puno  ng   biyaya,  pinaglihing  walang-batik.

-----o-----

Siya'y  hirang  ni   Bathala,  naging  Ina  ng  Mesiyas

kaya  sa  salot  ng  sala'y  di  nahawa't  iniyiwas;

alang-alang  sa  kay  Jesus,  Anak  Niyang  iyaanak,

kaya  gayong  sa  biyaya'y  pinabanal  at  binatbat;

asa  mo  ba'y  isang  arka  na  sa  baha  ay  naligtas,

nang  gunawin  ng  Dios  Ama  itong  mundong  talipandas;

ang  lahat  ay  nangamatay  sa  pagbahang  walang  hunab,

ang  hindi  lang  naparamay  ay  si  Noe  at  mag-anak.

-----o-----

Ang  katulad  ni  Mariya  ay  ang  sigang  nasa  ilang,

na  nakita  ni  Moises  --  nagdiringas  na  natanaw;

nag-aapoy,  nguni't  hindi  nasusunog  ang  halaman,

ganyan  po  Ang  Birheng  Reyna, . . . sa  sala  ay  nakaigpaw;

kahit  Siya'y  tao  lamang,  pinaglihi't  isinilang,

sa  sunog  ng  salang  mana  ay  naligtas, . . . di  nadamay;

iisa  lang  siyang  Reyna  sa  buong  sangkatauhan,

iisa  lang  siyang  taong  "walang  dungis-kasalanan".

-----o-----

Yaong  Ina  ng  ANAK  na  tutubos  sa  mga  sala,

nararapat  maging  banal  at  malinis  na  talaga;

kung  si  Adan  at  si  Eba, . . . nang  likhaing  unang-una,

sakdal-linis,  lubhang  banal, . . . wala  kahit  munting  mantsa;

bakit  naman  itong  Birheng  nahirang  na  maging  INA

ng  Dios  Anak  na  isisilang, . . . hahayaang  merong  sala?

di  ba  pangit  S'ya'y  isilang  ng  may-dungis  Niyang  Ina?

O,  kay  Pangit!  pagka't  Siya'y  sasakop  sa  mga  sala.

-----o-----

Hinding-hindi  nararapat  na  ang  Ina'y  madungisan

ng  pangit  na  kasalanang  namana  kay  Eba't  Adan;

si  Jesus  ay  mabubuo  sa  dugo  at  kanyang  laman,

na   di  dapat  merong  mantsa  na  sasangkap  sa  katawan;

Esposa  ng  Diwang  Banal  ay  di  dapat  na  magtaglay,

nang  tanda  ng  kaalp'nan  ng  pangit  na  kasalanan;

kaya  nga  ba  ang  ginawa'y  itong  Mariang  Inang  Mahal,

sapul  nuong  ipaglihi'y  walang  dungis  na  kinapal.

-----o-----

Dinurog  ng  kanyang  paa  yaong  ulo  ni  Satanas,

pagka't  Siya'y  di  nalason  ng  kamandag  niyang  ingat;

pinagyaman  ng  biyaya,  binuntunan  ng  pahiyas,

itinampok  na  sa  grasya'y  punong-puno't  kumikislap;

papaano'y  Reyna  Siyang  sa  grasya  ay  walang  kupas,

wala  siyang  pangalawa  sa  banal  na  naging  palad;

ang  lahat  ng  kayamanang  sa  Langit  ay  nakatambak,

ibinuntong  palamuti  sa  INA  po  ng  Mesiyas.

-----o-----

Si  Mariya  ay  "First  Lady"  ng  buong  sangkalangitan,

na  higit  sa  dilang  hari  at  reyna  ng  sinukuban;

sinaplutan  Siyang  Reyna  ng  saplot  ng  kabanalan,

binalot  ng  madlang  ginto  ng  yaman  ng  kaligtasan;

Ave  maria,  gratia  plena, -- O  Reyna  ng  kalinisan,

hulugan  ng  Iyong  awa  ang  maruming  daigdigan;

limusan  ng  iyong  grasya't  busilak  na  karangalan,

itong  mundong  tila  dagat  ng  maruming  mga  asal.

Page 8 of 8

Please see Vol. 2, Issue 2, August 2013 for other articles.