LITANYA NG MAHAL NA BIRHEN: VIRGO FIDELIS (Birhen Matibay sa Loob ang Magling)

Nuestra Señora dela Alegria
G. Paulo Perez

Virgo Fidelis

Ang damdaming naghahari sa puso ng aking Birhen ay puspusang katapatan sa tadhana ng tungkulin; ang tibay ng kanyang loob sa pagyakap sa magaling ay tibay na hindi kayang kahit saglit ay supilin; matapat na mamamatay, kahit sa krus ay ibitin, maligayang magtitiis,--- huwag lamang na magtaksil; sa kwintas ng karangalang nasa dibdib nitong Birhen, katapatan Niya’y rosas, sa korona ay bituin.

---o0o---

Ang uri ng bawat tao ay alipin ng Maykapal, bawat isa’y may tungkuling itinakdang gagampanan; ang biyaya’t pagpapala na anaki’y kayamanan, ibinigay ni Bathalang gugulim sa kabanalan; hindi dapat na ibaon katulad ng “Serve nequam,” kundi dapat pagtubuing isang libo’t isang daan; pagamit na yamang ito ang alipi’y susubukan, ditto siya malalantad, kung may iwing katapatan.

---o0o---

Sa tapat na paglilingkod ang “mababang Birheng Ina” ay uliran ng sinumang pinagpalang kaluluwa; ito’y ating masusuri sa pangako at panatang isinumpang tutuparin nang binyagan nuong una; gayundin sa paglilingkod sa Pananampalataya at sa sumapang binitawan sa Voto ng Relihyosa; sa dalawang paksang ito katapoatan ni Maria ay nais kong magluningning . . . parang Tala sa umaga.

---o0o---

Ang buhay po ng binyagan ay sa Binyag nagmumula, na ang tao’y inaampong mutyang anak ni Bathala; doon tayo kay Satanas at sa kanayang madlang sama, sumusumpang tatalikod, . . . sa Diyos lamang tatalima; dapwa’t kapag itong tao sa sala ay nadarapa, ang pangakong sinumpaan sa Binyag ay sinisira; yao’y taksil na gawain ta pagyurak kay Bathala at kulang ng pagtatapat sa tungkuling itinakda.

---o0o---

Nang isagot ni Maria: “Narito po ang alipin,” tinanggap na buong buo ang inyatas na tungkulin; nuon Siya namanatang parang Binyag na susunduin at ang sumpa’y buong tapat na gagawing walang maliw; yaong ulo ni Satanas ay dinurog niyang tambing at sa buo niyang buhay walang batik na maitim; matapat na walang sawa hanggang Siya’y suma-libing, korona ng katapatan ang san noo ay nag-ningning.

---o0o---

Sa buhay na karaniwan, may asawa o wala man, may Estado Relihiyoso na banal na pamumuhay; ito’y tugon sa anyaya ni Jesus sa Poong mahal, na manata sa “Pagsunod, Karukhaa’t Kalinisan;” ito’y hindi iniyuutos, ngunit kapag pinasukan, may tungkuling itaguyod buong tapat hanggang hujay; ang sarili’y itatakwil alang-alang sa Maykapal bawat saglit ang pangarap para sa Dios lang mabuhay.

---o0o---

Sa kalooban ng Diyos ay dapat na pailalim itong tao kung lunggati’y isang banal na matuturing; kaya itong si Maria, pinanata’y pagka-Birhen, upang sa Dios ay maiyukol puso niyang gumugiliw; Siya’y kusang nagsa-dukha’t lagging nagging masunurin, kahit minsan kay Bathala sa munti ma’y di nagtaksil; kaya lahat ng Binyagan at Relihiyosong butihin, sa Birhen ko’y nararapat tumingala’t manalamin.

---o0o---

Tulad ng VIRGO FIDELIS, O Kristiano’t Relihiyoso, sa pangakong sinumpaa’y manuparan nang totoo: bawat isip, wika’t gawa at pagibig ng puso mo, sa Maykapal ay ibigay,. . . huwag naman sa demonyo; pailalim ka sa Utos, . . . huwag sana sa kapritso, buong tapat na maglingkod katulad ng Birheng ito; kalooban ng maykapal ang tuntunin nating tao at ditto ang katapata’y kaputol na paraiso.