LITANYA NG MAHAL NA BIRHEN: SANCTA DEI GENETRIX (Santang Ina ng Diyos)

Nuestra Señora dela Leche y Buen Parto
G. Jorlie Villanueva

Sancta Dei Genetrix

Bukod-pinagpala sa babaeng lahat

ang Birhen Mariang nahirang na DILAG;

paano ay INA ang kanyang pamagat

at DIYOS ang bunsong naging kanyang Anak;

Ina ka ng Diyos, O, Inang Mapalad,

wala kang kaparis, wala kang katulaf;

inaawitan ka ng aking panulat,

dinadambana ka ng puso ng lahat.

---o0o---

Sa iyong pedestal ng puri at dangal

ito ang papuri na walang kapantay;

INA KA NG DIYOS, - diyan napalman

ang dilang hiwaga ng iyong kariktan;

ang VERBO NG DIYOS ay nuha ng laman,

nagkakatawang-tao sa kaniyang tiyan;

kaya nga't ang BATANG sa Belen sumilang

ay Diyos na Siyang sa mundo'y lumalang.

---o0o---

Ang SANGGOL na kanyang sintang inaruga

ay Diyos na walang Hanggan at Simula;

ALPHA AT OMEGA ng lahat sa lupa,

nalagak sa Birheng Inang pinagpala;

banal na simbahan ang kanyang kamukha

ng Santissima Trinidad na dakila

ito'y dogma... dapat tayong maniwala,

si MARIA'Y INA NG POONG BATHALA.

---o0o---

Ang Anak ng Diyos... huwag nga naman!

Naging TAO'T ULO ng sangkatauhan;

sa sang-mundong ay parang nakasal,

upang gawin silang anak ng Maykapal;

Siya ay bumaba't nagsa-taong-laman,

upang sa Dios-Ama ay magbigay dangal;

sa ngalan ng tao na makasalanan,

ang handog ng Ama'y dugo't katubusan.

---o0o---

Ang Anak ng Ama na walang simula

naging Anak niyang “aako sa lupa;”

nililiman siya nang Banal na DIWA,

naglihi na siya sa isang himala;

kung hindi pumayag ang Birheng dakila,

di sana natupad ang matandang hula;

ITO PO ANG VERBONG NASA KAY BATHALA,

at ang VERBONG ITO'Y DIYOS NA DAKILA.

---o0o---

Ang kisig at giting ng anak na tangi,

sa ina'y nagiging gintong palamuti;

ang dangal ni Kristong Bathala at Hari,

kay Maria'y saplot namang nagpa-bunyi;

KAYA, dumudulog ang mundong duhagi

sa INA NG DIYOS na Inang napili;

SANTANG INA NG DIYOS... kaming abang lipi,

idalangin Mo po, nang hindi masawi.

---o0o---

Higit ka sa Reyna'y mga Emperatris

na bantog sa yama't lakas ng daigdig;

sapagka't INA KA NG DIYOS SA LANGIT,

sa lakas Mo kami'y lubhang kumakapit;

sa Anak Mong Diyos ng aming pag-ibig,

gamitin ang lakas ng Iyong tangkilik;

wala nang lalampas sa dangal Mong labis,

ISA LAMANG IKAW NA INANG MARIKIT!

---o0o---

O INA NG DIYOS,... kabanal-banalan,

hayaang maglambing kami sa kandungan;

ibulong kay Jesus ang aming hinakdal

at pilit na ito ay malulunasan;

kami'y anak mo rin na nananambitan,

matimyas sa Iyong nakiki-ulayaw;

sa Anak na mutya ay ipamagitan

at Iyong lawitan ng tanging patnubay.