LITANYA NG MAHAL NA BIRHEN: VAS INSIGNAE DEVOTIONIS (Sisidlan ng Bukod-tanging Malasakit)

Dormicion dela Virgen
G. Jhapette Raymundo
Vas Insignae Devotionis

Sisidlan ng kabanalan ang Birhen na sakdal-banal, na napuno ng biyaya’t pagpapala ng Maykapal; sisidlan ng karangalan na di-kayang mapantayan,nagdala sa Dugo’t Laman ng Korderong Walang-Hanggan; sa ganito ka-dakilang hawak Niyang katangian, kay Bathala ang sarili’y buong pusong ibinigay; upang lamang ay matubos ang sawing Sankatauhan, buong-buong inihandog ang sariling katauhan.

---o0o---

Ang lahat ng nasa-kanya’y ganap Niyang isinuko sa Maykapal na sininta’t pinintuhong buong suyo; lubos Siyang makusaing sumunod na buong amo sa atas ng kalangitang “hindi Niya mabibigo”; lugod Niya’t kaaliwang sa Diyos ay mamintuho at ang lahat ay iyukol na taimtim yaong puso; yao’y wagas na debosyon, tapat na pamimintuho, na sa Birhe’y gintong hiyas na wala ang balatkayo.

---o0o---

Ang matimyas na pagsunod ng Masaya nating Birhen ay bunga ng pagkilalang ang Diyos ay Ama natin; ang lahat ay ating utang sa Maygawa nating giliw, kaya dapat naming Siya’y kilalani’t walhatiin; laya naman ang kalis ng kaligtasang Inang Birhen, sa taimtim na pagsunod sa Golgota ay nahimpil; yaong Anak na sa dugo ay natigmak at nabitin, hindi niya iniwanan sa laot ng dusa’t lagim.

---o0o---

Hindi Siya natigatig sa pagsunod Niyang kusa sa nasa at kalooban ng Maykapal na Bathala: spupo ng pagdurusa’y sinundan ni Kristong mutya sa landas ng kapaitan, sa daan ng mga luha; mulang Belen hanggang doon sa Kalbaryo’y nagdalita,kahit minsa’y di nagsising sa hirap ay sumalunga; tapat siyang sa “tungkuling-pagka-Ina’y tumalima”, libong dusa’t pagtitiis matapang na sinagasa.

---o0o---

Di ba iyan ang “debosyo’t tapat na pamimintuho” na katumbas ng ginawa ng Mesiyas na maamo? Dugo’t buhay ni Jesus na Manunubos nating Guro, pagtubos sa ating Birheng buong pusong namintuho sa dambana ng pagibig handog Niya’y BUHAY, DUGO: alang-alang sa kay Jesus na dugo ng Kanyang dugo, sumunod ang Inang Birhen na matapat sa pagsuyo!

---o0o---

Sa pamimintulong tapat ang Birhen ay nanaimtim, pagkat lagging nasa-isip ay ang Diyos na butuhin; mapagnilay Siyang lagi kahit doon pa sa Belen, hiwaga ng Kanyang Jesus sa tuwina’y nililining; sa kanyang pag-dili-dili’y lalo naming lumalalim ang pagsintang nagaalab na sa puso’y inaangkin: papaano’y lalo Niyang natatalos nang taimtim ang banal na kalooban na tungkuling talimahin.