LITANYA NG MAHAL NA BIRHEN: MATER CASTISSIMA (Inang Walang Malay sa Kahalayan)

La Virgencita
Rdo. P. Vicente Burayag Lina, Jr. sa pangangalaga ni
G. Ronald M. Santos

Mater Castissima

Inspirasyon Ikaw, Mater Castissima,

ng lahat ng tao't ng lahat ng Ina;

kaya sa larangan nitong pagbabaka,

busilak mong puso ang aming sandata;

kaya ang daing mo doon sa Fatima,

itigil ang laswa't mahalay na sala;

dumudulog kami sa Puso mong Ina

nang hindi mahawa sa pagkakasala.

---o0o---

Ang pagaasawa'y utos sa may-nasa

upang lumaganap ang tao sa lupa;

ang anak na bunga, - ayon kay Bathala,

ay templo ng Diyos na binigyang-diwa;

kaya bawat tao'y simbahang magara

na dapat igalang ng ating kapuwa;

katulad ay basong di dapat masira

at dapat ingatang malinis na lubha.

---o0o---

Ang katawan natin na templo ng Diyos,

huwag dudungisan ng salang marupok;

huwag hahayaang gawing “maitim na salot”;

aliw man at saya o sandaling lugod,

huwag maging lason sa banal na Utos;

sa salang mahalay... tayo ay matakot,

mayroong parusang kakila-kilabot.

---o0o---

Ang katawang lupa, dahilan sa kasal,

ay alay sa Diyos ng mag-kasing mahal;

ang handog na ito'y mabisa at banal,

kung may iwin sangla ng pagmamahalan;

pag-ibig sa Diyos ang tanigng batayan,

na sa pagsasama'y dapat na igalang;

pag-ibig sa anak... pag-ibig sa hirang,

ang buklod na ginto ng mabuting angkan.

---o0o---

Dahilan sa rupok nitong taong lupa,

madaling mahulog sa gawaing lisya;

kaya magsumikap magkamit-biyaya,

nang hindi mauyot sa tuksong masama;

ang parisan nati'y ang Birhen ng awa,

na hubad sa malay ng gawang malaswa;

paano'y sa puso at banal na diwa,

pag-ibig sa Diyos ang haring mistula.

---o0o---

Kaya bawa't ina sa pagiging ina,

may iwing tungkuling “banal na panata”;

sagrado ang papel na parang artista,

na para sa langit mag-anak siya;

kaya itong bunsong bunga ng pagsinta

ay handog ding alay sa Diyos na Ama;

kaya itong buhay nitong mag-asawa

ay isang alay din nitong pagsasama.

---o0o---

Upang ang masama ay huwag manaig,

debosyon ang dapat iwihin sa dibdib,

sa panalanging taimtim ang labis,

magasawa'y dapat mawiling malimit;

sila ay duduog kay Hesus na ibig,

sa pakikinabang na handa ng Langit;

ang butihing ina'y magiging malinis

sa grasya ng Diyos na tumatangkilik.

---o0o---

Sa mabunying Birheng Mater Castissima,

hilingin po ninyo'y kalasag na dala;

ang kristal na linis nitong Mutyang Ina

ay timbulang lagi nitong magasawa;

maging pari't madre, binata't dalaga

ay magiging casto sa tulong ng grasya;

kaya manalanging lagi at tuwina

sa ating Uliran at Huwarang Ina.