LITANYA NG MAHAL NA BIRHEN: VIRGO PRUDENTISSIMA (Birheng Kapahampahaman)

Virgo Prudentissima
G. Ranzil Cabigao

Virgo Prudentissima

Sa naputong na korona sa noo mong pinagpal,

Pagka-BIRHEN ninyo'y tampok at makislap ninyong tala;

Kayo'y Birheng ubod-paham at pantas na madakila,

matalinong sing-talino ng Langit na mahiwaga;

di tulad ng limang birhen na hangal ng “talinhaga,”

ni langis ay walang dala sa ilaw na inihanda;

BIRHENG KAPAHAM-PAHAM, idalangin kaming lubha,

sa Puso Mo'y kalingain at limusan nang andukha!

---o0o---

Ang Ina kong matalino'y Birheng Kapaham-paham,

inihain ang sariling parang “tanglaw na ilawan;”

Birhen siyang matalinong “sa Esposo'y naghihintay”

at ang langis niyang baon sa lahat ay nakalaan;

kaya siya'y kinalugdan nitong “ESPOSONG” Maykapal

at hinirang niyang “pugad” nang sa “tao'y napakasal;”

kapahaman Niyang iwi'y makalangit nama't banal,

sa trono ng kalangita'y patnubay na umaakay.

---o0o---

Ang “wagas na kapahaman” ay ang tumpak na pagawa

nang bagay na siyang angkop magkamit ng ating nasa;

kapahaman na binyagan ang dito sa aking paksa,

na “una sa kabaitang” napupuspos ng biyaya;

sa lahat ng kabanalang sa mundo ay nadambana,

ito'y laging kaakibat na tampok ng ating diwa;

kaya naman sa Birhen kong ubod-banal at dakila,

KAPAHAMA'Y nagni-ningning na animo'y isang tala.

---o0o---

Ang talino Niyang banal na “sulo ng karunungan”,

makikitang namumukod sa “hanap na huling pakay;”

ang wika ng Santong sulat “sa lahat ng gawa't bagay,

ang palaging gunitai'y “huling layon nitong buhay;”

kahangalan ang anumang balakid sa “huling pakay,”

na “atin pong kabanala't kaligtasang walang hanggan;”

KAHANGALAN ang ipalit sa Ligayang Walang-Hanggan

ang ligayang kisap-mata ng balighong kamunduhan!

---o0o---

…

Ang pag-ibig sa Maykapal at wagas na paglilingkod,

ang lihim ng kaligtasang dapat nating isaloob;

kaya lahat ng nilalang ay dapat na itaguyod

upang kamtan ang layuning bigay nitong Poong Diyos;

bawat bagay na kinapal ay gamitin sa pagsunod

sa Banal na kalooban, sa Banal na mga Utos;

sa lalang na mga bagay lalong kilalanin ang Diyos,

umibig na taus-puso at sa kanya ay maglingkod!

---o0o---

…

Itong Birheng Ina nati'y BIRHENG KAPAHAMPAHAMAN,

mangunyapit tayo ngayon at sa kanya'y manimbulan;

patulong na masawata ang baluktot na katwiran

at lunurin ang simbuyo ng hilig sa kasamaan;

tulad niya'y manalanging walang sawa't walang humpay,

tulad Niya'y magtiwala sa Banal na Kalooban

at ang TINIG NITONG BIRHEN lagi nating pakinggan!