LITANYA NG MAHAL NA BIRHEN: MATER PURISSIMA (Inang Kasakdal-sakdalan)

La Purissima Concepcion
G. El Gideon G. Raymundo

Mater Purissima

INANG SAKDAL LINIS... kalinis-linisan,

tulad Mo'y bulaklak na liryo sa parang;

maputing sampaga sa hardin ng buhay,

humahalimuyak... bangong-kalinisan;

sing-linis ng tubig na animo'y kristal

na lumalagaslas sa mga batisan;

anaki'y silahis ng bukang-liwayway

na namamanaag sa madaling-araw.

Kalinisan

Itong mundo nati'y dagat na marumi,

tanghalan ng samang ipinagbibibli;

kahit babasahin, libangan at sine,

damit saka moda'y... nakapandidiri;

sa baha pong ito ng laswang kay dami

ang PUSO NG INA'Y kanlungan ng puri;

salbabida natin... sandatang parati

ang PUSONG MALINIS ng INANG kay buti.

---o0o---

Ang unang sasagi sa ating gunita,

si Maria'y INANG banal na mistula;

wala siyang salang bumatik sa diwa

at wala munti mang pintas itong madla;

walang-dungis siyang salaming nagawa

ng Kadakilaan ng Poong Bathala;

siya ang larawan na nagbabandila

nang BANAL NA PUSO ng Diyos ng awa.

---o0o---

Dalisay na Pagiging-Ina

Munti pang dalaga ang Inang magiliw,

ang naging panata'y magpapakabirhen;

“Ina ng Mesiyas”... nang Siya'y hirangin,

… kaya lang pumayag... panata'y susundin;

kaya nabulalas,... “heto ang alipin,

na handa... ang lahat sa Poo'y ihain!”

kaya naging INA ng nakop sa atin,

kalinis-linisang Inang walang maliw.

Pagka-Inang Kristiyano

Ang pagiging-ina'y butihi't dalisay,

kung salig sa utos ng Poong Maykapal;

itong matrimonyo'y bendisyon sa buhay,

upang lumaganap ang Sangkatauhan;

ang anak sa ina ay isinisilang,

upang maging banal silang mamamayan;

“... maging tagasamba ng Diyos na tunay,

at maging kaanib ng ating Simbahan.”

---o0o---

Sa panahong ito ng materyalismo,

ang pagaasawa'y biro lang sa mundo;

kaya naglalaro ang maraming tao,

hinahalakhakan itong matrimonyo;

kahit hindi kasal sasama sa nobyo,

… sa tabing bakod ma'y lalagda sa “trato”;

O, ito'y masama sa isang kristiyano,

kasalanan nitong mga Katoliko!

---o0o---

Matapos ikasal sa isang simbahan,

ang ama at ina'y may tungkuling banal;

ang misyon ng ina... anak ay turuang

suminta't maglingkod sa Poong Maylalang;

ito ang tungkulin ng mga magulang,

“hubugin ang anak sa pagpapabanal;

kung merong bokasyong “paru o madre man”

tungkulin ng Inang... anak ay tulutan.

---o0o---

Ang Birhen ay Inang Birheng sakdal linis,

Uliran ng dilang ina sa daigdig;

kalinisa'y dapat pagyamaning labis

ng inang Kristiyano sa “estadong nais”;

O Birheng ang Puso'y arka ng pagibig,

ang lahat ng ina'y bigyan ng tangkilik;

kaligtasan ikaw ng buong daigdig,

ipagdasal kami, Inang sakdal linis!