LITANYA NG MAHAL NA BIRHEN: MATER INVIOLATA (Inang di Malapitan ng Masama)

Inmaculado Corazon sue Maria
G. Pedro Pablo G. Carson

Mater Inviolata

INA, MATER, O kay tamis na Pamagat,

walang dungis na Ina kong sakdal dilag!

INVIOLATA, di-nagmamaliwa, di-nawasak

ang yaman ng kalinisang ingat-ingat;

pagka-birhe'y di man lamang nagka-lamat,

kahit kanyang isinilang ang Diyos-Anak;

Ikaw yaring Tala na ang bawat sinag,

dapat aninuhin sa sang-maliwanag!

---o0o---

Nang mapansing... Birhe'y nagdadalang-tao,

nais na tumakas si Joseng esposo;

Isang anghel ang nagbunyag nang misteryo,

“lumilim kay Maria'y Espiritu Santo”;

kaya Inviolata ang Ina ni Kristo,

na hindi nagalaw ng sama ng tao;

kaya nga't sa kanya dapat manganino

ang lahat ng ina sa balat ng mundo.

---o0o---

Mayroong gawaing anay na mistula

na sa pagka-ina'y lubhang sumisira;

yao'y kalabagan sa Poong Bathala;

birth control, pagtunaw, at pangangalunya;

ito'y mga krimen na ubod ng sama,

na parurusahang walang pagka-awa;

INANG HINDI MALAPITAN NG MASAMA,

ipanalangin Mo ang mga kawawa!

---o0o---

Ang taong sumumpa sa Buklod ng Kasal

ay maging matapat sa kabyak ng buhay;

ang pakikialam sa ibang kandungan

ay pangangalunyang bawal ng Maykapa;

kalapastanganan sa bitling na banal

ni Kristo sa Kanyang mahal na Simbahan;

ang pagsulyap anding marumi't mahalay

sa hindi asawa ay kasuklam-suklam.

---o0o---

Ang Birth Control nama'y pagpigil sa bunga,

nakaririmarim na pagkakasala;

pagkat sa birth control sa gamot ma't iba,

bigo ang hangarin ng pagaasawa;

ito'y kaimbihan niyong mag-asawa,

pagyurak na pangit sa banal na pita;

yao'y pagsalansang sa Batas ng Ama,

“abuso sa anak at sa kanyang ina.”

---o0o---

Ang kasumpa-sumpa at kagulat-gulat,

sa tiyan ng ina... ay kitlin ang anak;

pag-tunaw sa binhing sa tiyan nalagak

ay krimeng sa sama ay kasindak-sindak;

batang walang malay... tutunawing anak,

kaya nga't kriminal silang mga tunggak;

yaon ay pagpatay nating matatawa

ng ina sa kanyang sarili ring anak.

---o0o---

Dito nag-uugat ang sama ng mundo,

sa salang panira sa 'ting Matrimonio;

ang nagpapahina sa angkan ng tao,

nagpaparupok din sa tatag sa mundo;

kaya, mga ina, manga-takot kayo

sa tuklaw ng ahas ng krimen pong ito;

birth control, pagtunaw, pakiki-agulo,

kamandag sa buhay na iwasan ninyo.

---o0o---

Ang lumbay ng ina ay magiging tuwa,

oras na isilang ang anak na mutya;

sa hirap at dusang akibat ng luha,

langit ang kapalit... galak na sang-yuta;

kaya magtitiis kayo sa dalita

at huwag sinisayin ang Poong Bathala;

hindi natutulog ang Ina ng awa,

sa tiisin ninyo Siya'y magpapala!