LITANYA NG MAHAL NA BIRHEN: REGINA APOSTOLORUM (Reyna ng mga Apostol)

Dormicion dela Virgen
G. Ariel L. Tolentino

Regina Apostolorum

Ang  apostol  na  piniling  alagad  ng  Bagong  Tipan,

ay  ang  unang  mga  pari  at  obispo  ng  simbahan;

sila  yaong  Labing  Dal'wang  hinugot  sa  sambayanan,

at  naukol  sa  dakila't  mabathalang  katungkulan;

sila  yaong  humalili  sa  patriarkang  mga  banal

at  prinsipeng  napatanging  mga  sugo  ng  Maykapal;

sila  pa  rin  ang  apostol  ng  Guro  ng  santinakpan,

nagsabog  ng  Ebanghelyong  "kodigo  ng  kaligtasan".

-----o-----

Kasama  ng  Poong  Jesus  ang  masugid  na  Apostol,

na  luluklok  sa  trono  ng  mababait  namang  hukom;

sila  yaong  Labing  Dal'wa  na  mahigpit  na  hahatol

sa  labingdal'wang  tribu  ng  Israel  na  mayabong;

sila'y  liping  maharlika  na  dangal  ang  nakapatong,

pagka't  hirang  na   piniling  Alagad  ng  Panginoon;

datapwa't  Reyna  nilang  tatanghaling  mayamungmong

si  Mariyang  Birheng  Ina,  "Reyna  Apostolorum".

-----o-----

Ang  apostol  ay  tinawag  ni  Jesus  na  Mananakop

at  nagturo  ng  aral  na  aakay  sa  sansinukob;

bayan-baya'y  inaralan  na   kay  Jesus  pinasunod,

nagbinyag  sa  mga  tao  na  kusang  napahinuhod;

ang  misyon  ng  Birheng  Ina'y  lalo  namang  sakdal  tayog,

kaya't  siya'y  tinawag  di't  sinugo  ng  Poong  Irog;

nang  pumayag  sa  balitang  Diwang  Banal  ay  lulukob,

naging  Reyna  siya  noon  ng  Apostol  nitong  Jesus.

-----o------

Maliban  kay  Iskaryote,  ang  apostol  ay  butihin

na  may  pusong  ginintuan  at  may  banal  na  damdamin;

laman-lupa  palibhasa  ay  may  pintas  silang  angkin,

nguni't  sila'y  naging  banal,  nang  sa  grasya'y  pagtibayin;

sa  araw  ng  Pentekostes  "dilang  apoy  ay  dumating",

sila'y  naging  diwang-pantas  at  banal  na  magigiting;

ibang-iba  si  Mariyang  Reyna  Nilang  Ginigiliw,

mula't  sapul  ipaglihi  ay  banal  nang  walang  maliw.

-----o-----

Si  San  Pedro'y  napabantog  sa  matinding  paniwala

sa  kay  Jesus  na  inaring  Panginoon  at  Bathala;

si  San  Pablo'y  sa  maalab-na-maglingkod-niyang-nasa,

na  si  Kristo  sa  daigdig  maibig  na  walang  sawa;

si  San  Andres  sa  pag-ibig  naman  sa  krus  nabalita,

si  San  Juan  ay  nabukod  na  apostol  namang  mutya;

ang  Birhen  ay  Reyna  nila,  pagka't  gahis  silang  lubha

at  anumang  katangia'y  nagniningning  niyang  tala.

-----o-----

Ang  apostol  ang  kahati  ni  Jesus  sa  Pagtitiis,

kaya  sila'y  kahati  rin  sa  l'walhati  na  sasapit;

ang  buhay  ng  mga  tao  ay  hinubog  nilang  tikis

sang-ayon  sa  turo't  aral  ng  "Naputungan  ng  tinik";

nguni't  higit  sa  sinumang  Apostol  na  nagsumakit,

itong  Ina  ay  karamay  sa  hirap  at  pagsasakit;

siya  baga  ang  Uliran,  Reyna  nilang  mapang-akit,

na  ang  nais  bawa't  isa  ay  makapiling  sa  langit.

-----o-----

Ang  tungkulin  ng  apostol  ay  hawak  ng  mga  pari,

na  ang  nasa'y  lumaganap  ang  turo  ng  ating  Hari;

ang  lahat  ng  katoliko'y  nararapat  makihati

sa  paggawa  ng  apostol  na  banal  ang  minimithi;

kaya  tayo  ay  lumapit  sa  Reyna  ng  mga  pari,

sa  Reyna  ng  apostoles,  sa  Birhen  tang  makandili;

ang  bukirin  ay  malawak,  ang  pari  ay  kakaunti,

kaya  tayo  kay  Mariya'y  bokasyon  ang  hinging  lagi.