LITANYA NG MAHAL NA BIRHEN: REGINA PROPHETARUM (Reyna ng mga Propeta)

Ina ng Laging Saklolo

Regina Prophetarum

Ang  propetang  isinugo  na  humula  sa  darating,

ay  may  Reynang  kinilala  sa  Babaeng  Inang-Birhen;

bawa't  hula  na  sinulat  na  kay  Jesus  ay  nahinggil,

ay  kaugnay  ni  Mariyang  Ina  Niyang  masintahin,

nang  tukuyin  ni  Isayas  yaong  Sanggol  sa  Betlehem,

hindi  niya  maaaring  itong  Ina  ay  itakwil;

siya'y  Reyna  ng  propetang  sinugo  ng  Poong  giliw,

na  nagpuri  kay  Mariyang  pagka-ina't  pagka-birhen!

-----o-----

Si  Isayas,  sa  dahon  ng  Lumang  Tipan nating  aklat,

"pagka-birhen  ni  Mariya'y  malinaw  na  inilahad";

sa  lahi  ng  haring  David,  may  Birhen  daw  na  sisikat,

maglilihi't  isisilang  ang  "Emmanuel"  sa  liwanag;

ang  binnaggit  sa  Israel  ng  propetang  Heremiyas,

meron (anyang)  sa  daigdig  ay  lilitaw  na  Mesiyas";

at  sa  hula  ni  Esekyel  "santwaryo  ang  Inang  wagas,

na  pinid  ang  kanyang  pintong  sa  prinsipe  lang  bubukas".

-----o-----

Ang  lahat  ng  manghuhula'y  walang  palad  na  makita

ang  l'wahati't  kabunyian  ng  Mesiyas  na  sininta;

malabo  at  bahagya  lang  ang  namasid  ng  propeta,

samantalang  ang  Apostol,  ito'y  lubos  na  nadama;

nguni't  higit  kaninuma'y  nasaksihan  ni  Mariya,

ang  lahat  ng  inihula  at  kay  Jesus  ay  nakita;

siya'y  Reyna't  isang  Inang  naging  bunying  propetisa,

na  ang  hula'y  "Magnificat"  na  awit  na  katha  niya.

-----o-----

Namalas  sa  kanyang  diwa  ang  lahat  ng  mga  bayan,

tatawagin  siyang  laging  "mapalad  sa  santinakpan";

nakita  ang  awa  ng  Diyos  na  sa  tao'y  mag-aakay,

at  ang  lakas  na  dudurog  sa  palalong  mga  hunghang;

babagsak  ang  mayayabang  sa  trono  ng  karangalan,

ang  mababa'y  itataas  sa  dakilang  kabunyian;

ang  gutom  ay  bubusugin  sa  banal  na  mga  aral,

-- ito'y  hula  ni  Mariya  na  Reyna  ng  mga  paham.

-----o-----

Ang  bibig  ng  nagsihula  ay  banal  na  mga  labi,

at  ang  buhay  ay  malinis  na  may  banal  na  ugali;

kaya  sila  sa  marami  ay  pinili't  itinangi,

at  nabantog  na  propetang  si  Bathala  ang  nagbunyi;

nguni't  higit  sa  kanila  itong  Reynang  bukod-tangi,

walang  bahid-kasalanan,  walang  batik  kahit  munti;

siya'y  birheng  nagniningning  na  banal  ang  iwing  budhi,

at  reyna  ng  manghuhulang  sumikat  na  bunying  lipi..

-----o-----

Ang  darating  ay  lihim  na  hindi  natin  nababatid,

pagka't  tayo'y  tao  lamang  na  mahina  ang  isip;

sa  hula  ng  mga  bagay  na  sa  Langit  makakamit,

lumalaki  ang  pag-asa't  ang  lakas  ng  pananalig;

ang  Reyna  ang  manghuhula,  si  Mariyang  sakdal-bait,

tayo  nawa  ay  akayin  sa  pangarap  nating  Langit;

doo'y  ating  madadama  ang  Maykapal  na  pag-ibig

at  ligayang  inihulang  walang  sawa't  kahulilip.