LITANYA NG MAHAL NA BIRHEN: REGINA ANGELORUM (Reyna ng mga Anghel)

Nuestra Señora de Arabia
G. Derick L. Fabian

Regina Angelorum

Ang  Birhen  ay  isang  Reyna  na  sa  Langit  pinutungan

at  ang  AMA  ang  nagputong,  na  sa  lahat  ay  Maylalang;

si  Jesus  na  Kanyang  Anak, ay  Hari  ng  santinakpan,

kaya  Siya'y  Haribini  ng  lahat  ng  sangkinapal;

mayroon  po  siyang  TRONO  sa  rurok  ng  kalangitan,

libong  anghel  ang  sa  kanya'y  mapitagang  nagbabantay;

O,  Reyna  ng  mga anghel,  mutyang  Birheng  Inang  mahal,

ang  hukbo  ng  mga  anghel  ay  hukbo  mong  nagdarangal! 

-----o-----

Si  Jesus  ay  isang  Hari,  at  Hari  ng  mga  anghel,

kaya'y  Reyna  manding  ganap  ng  anghel  ang  Inang  giliw;

ang  lahat  ng  katungkulang  sa  anghel  ay  nahabilin,

ay  gawaing  lalong  wagas  na  sa  Birhe'y  nagniningning;

ang  anghel  ay  "espiritung  sugo  ng  Dios  na  butihin,

at  lingkod  ng  mga  taong  dapat  nilang  tangkilikin";

siam  na  koro  silang  lahat  na  may  banal  na  tungkulin,

na  maglingkod  at  tumulong  sa  ilalim  nitong  Birhen. 

-----0-----

Ang  anghel  ay  mensahero  ni  Bathala  sa daigdig,

ang  arkanghel  ay  dakilang  embahador  nitong  Langit; 

taga-gawa  ng  himala  ay  ang  Koro  ng  Virtudes,

pumipigil  sa  demonyo'y  ito  namang  Potestades;

sa  anghel  ang  nangunguna'y  Principadong  ubod  ng  dikit,

Dominacion  ang  sa  kanila'y  may  lakas  na  umuugit;

sa  paghukom  ni  Bathala,  ang  Tronos  ay  ginagamit,

karamay  sa  pag-gagawad  ng  hatol  na  ubod-higpit.

-----o-----

Sa  dunong  at  kaalaman,  ang  Kerubin  ay  balita,

ang  Serapin  nama'y  bantog  sa  pagsintang  madakila;

ang  tungkulin  nilang  ito'y  sa  Birhen  tang  masanghaya,

at  lalunang  maka-reyna,  maringal  at  mapagpala;

si  Mariya  ang  dinalhan  ni  San  Gabriel  "ng  hiwaga",

at  siya  ang  Birheng-Inang  punong-puno  ng  himala;

ang  Mag-ina  ang  dumurog  kay  Satanas  na  kuhila,

at  humawi  sa  karimlang  bumalot  sa  ating  lupa.

-----o-----

Si  Mariya,  bilang  Ina . . .  si  Jesus  ay  inutusan,

ang  Dios-Tao'y  tumalima  sa  nasa  ng  Birheng  mahal;

bawa't  nais  niya'y  batas  sa  Anak  ng  Walang-Hanggan,

gasino  pa  sa  anghel  na  utusan  lang  ng  Maykapal;

ang  dunong  man  ni  Mariya  sa  Kerubin  ay  lampasan,

at  sa  apoy  ng  pagsinta,  Serapin  ma'y  nalaluan;

kaya  siya  yaong  Reyna  ng  anghel  na  mga  banal

na  sa  lahat  ng  sandali'y  laan  nilang  paglingkuran!

-----o-----

Nang  subukin  ni  Bathala  sa  Langit  ang  mga  anghel,

nagawa  ang  pagbabaka,  naghimagsik  itong  Lusbel;

nagbangon  at  sumalasa  si  San  Miguel  na  Magiting,

at  hinyulog  sa  impyerno  ang  hukbo  ng  mga  taksil;

nuon  daw  ay  ipinakita  ang  misteryo  niyong  Belen,

si  Jesus  na  naging  Tao  sa  piling  ng  Inang  Birhen;

hindi  nais  na  sumamba  ang  palalong  si  Lusiper,

samantala,  nagsi-samba  ang  mabuting  mga  anghel.

-----o-----

Ang  "koro"  ng  mga  Virtud . . . gumagawa  ng  mga  himala,

ang  Potestad  ay  pumigil  kay  Satanas  na  kuhila;

Principado  ay  sa  anghel  nangungulong  walang  sawa,

Dominacion  ang  sa  kanila'y  may  poder  ng  pangasiwa;  

ang  Trono  ay  tumutulong  sa  paghukom  ni  Bathala,

ang  Kerubin  ay  sa  dunong  natanghal  at  nadakila;

ang  Serapin . . . nag-aalab  sa  pag-ibig  mabathala,

silang  lahat  ay  may  REYNA,  si  Mariyang  pinagpala!

-----o-----

Ang  anghel  ay  taga-ingat,  patnubay  ng  mga  tao,

siyang  naging  tagatanggol  sa  simbaha't  mga  templo;

nangulo  sa  piling  bayan  at  "lumupig  sa  demonyo",

nang  sa  Langit  ay  subukin  silang  lahat  sa  "misteryo";

yao'y  unang  pagbabaka,  nang  si  Lusbel  ay  nagbago

at  ayaw  na  pailalim  sa  Maykapal  na  totoo;

si  San  Miguel  at  ang  lahat  ng  tapat  na  espiritu,

naghandog  ng  paglilingkod  sa  Birhen  at  Diyos-Tao!

-----o-----

Nuon  pa  ma'y  nakita  na't  namasdan  ang  bunying  Reyna,

ng  mabuting  mga  anghel,  na  nuon  pa'y  humanga  na;

paglupig  sa  kasamaan  sa  mundo  ng  pagbabaka,

ang  Birhen  ay  di-titigil  na  magpuno  at  manguna;

kaya  itong  mga  anghel  ay  patnubay  sa  tuwina,

sa  ilalim  ng  mabait  at  butihing  Birhen  Maria;

lingkod  sila  at  alipin  ng  mapalad  nating  Ina,

sa  Langit  man  at  sa   lupa,  sa  buti  ng  kaluluwa.

-----o-----

Itaas  ang  mga  mata  at  masdan  ang  Birheng  mahal,

sa  pilling  ng  kanyang  Anak  sa  trono  ng  kalangitan;

sa  paligid  ay  naroon  ang  anghel  na  di-mabilang,

umaawit,  nagpupuri,  nagdiriwang,  nagdarasal;

ang  kanilang  mga  sigaw  sa  tuwa  ay  di-magmayaw'

MABUHAY  ANG  AMING  REYNA,

MABUHAY  ANG  BIRHENG  MAHAL;

O,  Regina  Angelorum,  O  Reyna  ng  kabanalan,

hindi  kami  magsasawang  magpuri  sa  iyong  ngalan!