LITANYA NG MAHAL NA BIRHEN: REGINA PATRIARCHARUM (Reyna ng mga Patriarka)

Nuestra Señora delos Dolores de Turumba
G. Benjie Guevarra

Regina Patriarcharum

Ang  matandang  mga  Santong  nauna  sa  kalangitan,

ay  ang  banal  na  Patriarkang  nuno  ng  sangkatauhan;

sa  lahat  ng  mga  ito  ay  REYNA  ang  Birheng  mahal,

ang  Regina  Patriarcharum,  na  Reyna  ng  kalinisan;

higit  siyang  madakila't  lalong  higit  na  marangal,

sa  lahat  ng  mga  Santo't  Patriarka  ng  santinakpan;

Reyna  siya  ng  Patriarkang  Adan,  Noe  at  Abraham,

ni  Jacob  at  dilang  Banal  ng  yumaong  Lumang  Tipan.

-----o-----

Ang  lahat  ng  katangian  ng  buhay  ng  mga  ito,

natupad  sa  Birheng-Ina,  na  Ina  ng  buong  mundo;

kaya't  lubhang  na-aangkop  ang  pamagat  niyang  ito,

na  Regina  Patriarcharum,  ng  Patriarkang  mga  santo;

si  Adan  ang  unang  taong  nilagak  sa  "paraiso",

na  dahil  sa  kasalanan  ay  "binawi, . . .at nanglumo;

nguni't  sa  Dios  ay  namahal  ang  "salaring  mga  tao",

kaya't  Siya  ay  nangakong  "Mesiyas  ay  paparito".

-----o-----

Si  Adan  ay  ama  nitong  nagkasala  nating  lipi,

na  nahubdan  sa  biyaya  at  nawalan  ng l'walhati;

si  Mariya  nama'y  Ina  ng  Mesiyas  nating  Hari,

na  tumubos  at  nagligtas  sa  nasawi  nating  lahi;

ibinangon  itong  tao  sa  putikan  at  lugami,

sa  buhay  na  marangal  pa  sa  buhay  na  unang-yari;

tayo'y  anak  na  inampon  ni  Mariyang  Inang  tangi,

naging  bagong-silang  tayong  lahing-banal,  bagong  lipi.

-----o-----

Sa  paglakad  ng  panahon,  itong  mundo  ay  sumama,

sinamba  ang  diyos-diyosan  at  sinuway  si  Bathala;

kaya  ang  Diyos  ay  nagsisi't  ginunaw  ang  ating  lupa,

nunong  Noe  at  mag-anak  ang  naligtas  lang  sa  baha;

nang  sa  Arka'y  nagsilunsad  ang  "pamilyang  pinagpala",

pasalamat  sa  dambana'y  inihain  kay  Bathala;

nuon  ang  Diyos  ay  nangakong  "itong  mundong  madalita,

di  na  Niya  gugunawin  sa bagsik  ng  gayong  baha".

-----o-----

Si  Noe  ay  isang  banal,  kaya  siya  ay  naligtas,

si  Mariya'y  lalong  banal,  wala  kahit  munting  pintas;

sa  baha  ng  kasalanan  na  namana'y  nakaiwas,

sapul  siyang  ipaglihi,  sa  biyaya'y  nabatbat;

si  Bathala  ay  nangako  sa  kay Noe  at  mag-anak,

nangako  rin  kay  Mariya  ang  Bathalang  Diyos-Anak;

ang  alay  ng  Nunong  Noe  na  "hain  ng pasalamat",

ay gahis  ng  sakripisyo  na  Misa  ng  Kanyang  Anak.  

-----o-----

Si  Abraham  ay  ang  ama  at  NUNO  ng  bayang  hirang,

na  ang  pagsampalataya'y  buong-buo  at  matibay;

lalong  higit  si  Mariyang  sa  Mesiyas  ay  nagluwal,

na  sa  lahat  ng  natubos  naging  Inang  espiritwal;

dahilan  sa   kay  Isaac naging  ama  si  Abraham

ng  malaking  kalahiang  sa  Mesiyas  ay  nagbigay;

si  Mariya  nama'y  ina  sa  anak  na  minamahal

at  lahat  ng  mga  bansa'y  magkakamit-kaligtasan.

-----o-----

Si  Jacob  ang  nanaginip  "ng  hagdan  ng  lupa't  langit",

na  larawan  ni  Mariyang  hagdanan  ng  san-daigdig;

ang  Dios-Anak  ay  sa  kanya  nanaog  na  buong-linis,

at  kasama'y  libong  banal  nang  sa  Langit  ay  nagbalik;

sa  Birhen  nga  natupad  ang  hagdan  ng  panaginip,

pagpapala  ng  Maykapal  sa  tao  ay  nilalawit;

and  dasal  at  kabutihan  nitong  tao  sa  daigdig,

inyaakyat  kay  Bathala  nitong  Inang  sakdal-linis.

-----o-----

Sa  Haring  di-mamamatay,  si  Mariya'y  Inang  mutya,

sa  tuktok  ng  karangala'y  Reyna  siyang  pinagpala;

sa  ibabaw  ng  lahat  ng  Patriarka  mang  madakila,

Reyna  siyang  Pintakasi  na  may  trono  at  dambana;

ang  Patriarkang  mga  banal  na  sa  Langit  ay  magara,

kasama  ng  mga  anghel  na  kay   Maria'y  humahanga;

sa  paligid  nitong  Reyna  nagpupuring  walang-sawa,

ang  Patriarkang  nuno  nating  lahi  nitong  taong  aba.