LITANYA NG MAHAL NA BIRHEN: MATER ADMIRABILIS (Inang Kataka-taka)

Nuestra Señora de Buen Hora
Gng. Sharon Cruz

Mater Admirabilis

Sa inyo po, Birheng Inang minamahal,

NAPIPIPI yaring makata Mong hirang;

sa laki ng tuwa puso'y sumasayaw

sa aking paghangang di ko mapigilan;

namamangha ako at natitigilan

sa hindi masayod Ninyong katangian;

Kataka-taka po, Ikaw Inang Mahal,

idalangin kaming ngayo'y nagsasakdal!

---o0o---

Paano'y ang kanyang Pagka-Inang mutya

ay bukod sa lahat... lubhang mabathala;

“inang-pari” Siya na kamangha-mangha

at Ina ng lahat ng tao sa lupa;

sa Kanya nabunton ang dilang hiwaga;

Siya'y Inang bunyi na kahanga-hanga,

putungan ng dangal ang Kanyang anghaya!

---o0o---

Ang ina ng taong karaniwang ina

ay isang misteryo na kataka-taka;

ang kamay ng Diyos... sa tiyan ng ina,

katawan ng anak... binubuong bunga;

hindi na sa putik na gaya nang una,

kung hindi sa dugo at laman ng ina;

sa bagsik ng batas ng naturalesa,

tao'y nabubuong hiwagang talaga.

---o0o---

Sa kapangyarihan ng Diyos na banal,

kaluluwang sangkap nama'y kinakapal;

datpwa't ang Birheng naging Inang tunay,

pagka-Ina'y lalong dapat na hangaan;

wala pong lalakeng dito'y namagitan,

lumukob sa Kanya'y ang Poong Maykapal;

kaluluwa ni Kristo't mahal na katawan,

binuo ng Diyos sa banal na tiyan.

---o0o---

Kaya ang katawan ni Jesus na giliw,

sa dugo at laman ng Birhen nanggaling;

ang Anak pong yao'y Verbong sakdal giting,

nagkatawang-tao... nag-anyong alipin;

Kataka-taka po ang Mesiyas natin,

kataka-taka rin ang Ina pong birhen;

Admirabilis ka sa taguring Latin,

kabigha-bighani ang inyo pong papel!

---o0o---

Ang Anak ni Maria ay Paring-Mataas,

kaya't Inang-Pari ang Inang Matimyas;

ang dugong sa Krus kay Jesus pumutak

ay dugo ng Inang sa Kanya'y nag-anak;

ang katawang yaong tinadtad ng sugat

ay laman ng Birheng kasamang naghirap;

kaya nga't sa Misa ng pari sa altar,

dugot' laman Niya'y alay ding ka-sangkap.

---o0o---

Ang ina ng tao'y ina lang ng ilan,

na sa mundong ito'y kanyang iniluwal;

datapwa't si Maria'y Ina nitong tanang

tinubos ni Kristong Anak Niyang mahal;

pagka-ina Niya'y habang merong buhay,

na kinakailangang walang kamatayan;

Ina mandin Siya ng makasalanan

na sa pagsisisi ay tinutulungan.

---o0o---

Ina mandin Siya ng mga pagano,

na tinatanglawan... na maging Kristiyano;

Ina ng binyagang banal na totoo;

na sa kanyang grasya'y tanging napanuto;

Ina siyang lalo na Santa at Santo,

na naghahari doon sa paraiso;

hindi Siya Ina ng nasa-impiyerno,

pagka't sila doo'y mga condenado.

---o0o---

Iyan ang hiwaga na kahanga-hanga

ng pagiging-Ina ng Ina kong mutya;

paghanga'y nagiging paggalang na lubha

sa Kanyang Uliran na tinatalima;

ang nagiging bunga'y pagsintang dakila

at sa kanyang palad ay pagtitiwala;

kaya akong aba't anak Mong makata,

nabahagan yaring pusong humahanga.

---o0o---

Sa panahong itong magulo't maulap,

ang kataka-takang Ina yaring lunas;

ang mundong sugatan sa luhang masaklap,

sa Inang pag-asa ay nakikiusap;

ang namimintuho niyang sintang Anak,

sa dagat ng dusa'y di mapapahamak;

O Admirabilis, Inang mapamihag,

kandilihin Mo po kaming sawing-palad!