LITANYA NG MAHAL NA BIRHEN: REGINA MARTYRUM (Reyna ng mga Martir)

Regina Martyrum
G. J.V. at Gng. Jazz Lopez

Regina Martyrum

Sa  lupon  ng  mga   MARTIR  na  bayani  ng  Maykapal,

ang  Birhen  ay  isang  Reynang  "martiryo  ang  buong  buhay";

ang  Martir  ng  mga  martir,  kung  siya  ay  tagurian,

na  ang  puso  at  damdami'y  may  sundang  ng  kapaitan;

kaya  siya'y  Reynang  tangi  ng  Martir  na di-mabilang,

karamay  ng  kanyang  Anak  sa  Kurus  ng  katubusan;

sa  pag-ibig  kay  Bathala't  pagsakop  sa  Santinakpan,

siya'y  Reynang  ang  tiisin  ay  palaging  kaulayaw.

-----o-----

Ang  buhay  ay  inihain  at  ang  dugo'y  ibinuwis,

huwag  lamang  tumalikod  sa  kay  Jesus  na  inibig;

ang  libo  mang  kamataya'y  susuungin  niyang  labis,

huwag  lamang  na  magtaksil  kay  Bathalang  nilalangit;

kaya  merong  mga  martir  na  sa  leon  inihagis

at  may  ngiting  napalamon  sa  hayop  na  mababangis;

merong  mga  martir  na  binato,  pinalo  at  hinagupit,

may  pinana,  may  sinunog,  may  nilunod  pa  sa  tubig.

-----o-----

Iba't-ibang  kalupitan  sa  martir  ay  pinalasap,

na  di-kayang  ilarawang  maka-hayop  na   pahirap;

Poong  Birheng  Maria  natin,  hindi  ito  ang  dinanas,

nguni't  higit  pa  rin  dito  ang  natungga  niyang  saklap;

tunay  siyang  Haribini  ng  martir  na  nangag-hirap,

sa  laki  ng  pagmamahal  na  sa  puso'y  naglagablab;

buhay  niiya  ay  martiryong  ang  "tiisi'y  walang  kupas,

dahilan  sa  mutyang  Anak,  puso't  diwa  ay  nawasak.

-----o-----

Pagmamahal  ang  dahilan  ng  tiisin  ni  Mariya,

na   ang  puso'y  nadudurog  kung  ang "Pasyo'y  maalala";

sapul  siyang  magka-isip,  yaong  hula  ng  propeta

ay  ang  ditang  iinumin  ni  Jesus  na  Anak  niya;

ang  laman  ng  Santong  Sulat . . . nalalaman nitong Ina,

kaya't  yaong  pusong-ina'y  kumikirot  sa tuwina;

di-man  siya  ipinako  sa  ituktok  ng  Golgota,

makalibong  naipako  sa  hirap  ang  kaluluwa!

-----o-----

Samsamin  nating  lahat  ang hirap  ng  mga  martir,

anino  lang  na  maputla  ng  tiniis  nitong  Birhen;

paano'y  "Ka-mananakop"  ng  Anak  ang  Inang  giliw,

kaya't  siya'y  nasugatan,  nang  si  Jesus  ay  hampasin;

ang  sakit  at  dalamhating  naging  bunga  nitong  krimen,

sa  puso  ng  Inang  Birhen  ay  natipon  at  tumining;

sa  hangad  na  itong  tao  ay  iligtas  at  kupkupin,

maligayang . . . naki-ugnay,  sa   kay  Jesus  na  tiisin.

-----o-----

Ang  Martir  ay  mga  saksi  ng  pag-ibig  sa  Maykapal

at  saksi  ng  Poong  Jesus  na  tumubos  sa  kinapal;

dapat  tayong  maging  saksi  ni  Jesus  na  ating  Mahal,

sa  pagyakap  sa  kurus  ng  pagtitiis  nating  banal;

nasa  krus  ang  kabanalan  at  ang  krus  ang  karangalan,

sinasabit  nitong  Reyna  sa  Anak   na  minamahal;

dapat  tayong  maging  saksi  ni  Jesus  na  ating  hirang,

at  parisan  itong  Reyna  ng  martir  na  di-mabilang!

Page 7 of 9

Please press Older Posts for Page 8.