PANITIKAN/LITERARY: Birhen ng Sto. Rosario

Mula sa Patnugot: Ukol ang tulang ito sa pagdiriwang ng taga-Hagonoy ang mga debosyon sa Mahal na Birheng Maria, lalo na sa debosyon at panata ng pagrorosaryo.

Birhen ng Santo Rosario

Hagonoy, Bayang Levitico

Iniirog si Maria ng totoo

Anuman ang kanyang titulo

Walang maliw ang pamimintuho.

Araw-araw, nagdarasal ng walang toto

Paggiliw sa dakilang Ina ni Hesukristo

Kay Santa Anang anak na solo.

Debosyon sa Sto. Rosario,

Nag-ugat nang Birhen Maria,  napakita

Sa tatlong kabataan

Lucia, Jacinta at Francisco ang ngalan

Duon sa Cova de Iria, Fatima,

Ika-labing siyam na dekada

Taong ika-labing pito

A-trese ng Mayo.

Duo'y inihayag

Mensahe ng Birheng pinakaliliyag -

"Idalangin mga makasalanan;

Mangagsisi sa sariling katampalasanan.

Magpakasakit man din

Upang kapayapaan sa mundong ibabaw, kamtin."

Sa buong sangka-kristiyanuhan

Abot hanggang Hagonoy na bayan

Bumantog, panawagan.

Pahayag at mabuting balita

Ipinalaganap sa tanang madla.

Aking natatandaan,

Sa alaala'y nasumpungan

Ang habili'y gayon din naman

Sa Lourdes, Pransiya kung saan

Birheng Ina'y napakita

Sa dalagitang si Bernardita.

Kapatiran ni Maria, 

Anak ni Anang patrona

Binuo, tinagubilinan

Palaganapin ang pamamanata

Tungkuling aariing gampanan.

Samahang matatag, matibay

Sa mananampalataya'y naging gabay

Kung paanong sa Mahal na Ina ay magpugay;

Manalangin  hindi lamang para sa sariling ikabubuhay

Bagkus, para sa kapuwang landas ay napapahiwalay.

Panata pang bilin at ginampanan

Unang Sabado ng bawa't buwan

Magsimba, magkomunyon, magsisi ng kasalanan

Upang magtamo ng indulhensiyang nakalaan.

Bawa't taon. Oktubreng buwan

Sadyang itinangi, inilaan

Sa matimtimang pagdarasal 

Ng Rosaryong Banal

Na kanyang laging taban

Sa tuwinang magpapakita

Sa Lourdes o Fatima man.

"Dasalin ito", ang himatong

Sa pagdiriwang ng Immaculada Concepcion;

Anunsyasyon,

Puripikasyon man, o Anunsyasyon.

Bawa't butil ay rosas na mahalimuyak

Alay sa paanan at trono ng Dakilang Maykapal

Nabubuong korona, hatid, ibayong ligaya

Sa Kabanal-banalang Puso ni Kristong Sinta

At sa Kalinis-linisang Puso ng Birheng Ina.

Banal na Misa

Lundo ng araw-araw na pamamanata

Prusisyon, mayroon pa rin naman

Pagsapit ng katapusan

Ritong ginaganap hanggang sa kasalukuyan.

Musikong pantawag-pansin sa hulihan

Awit at dalit, patungkol sa Poong Mahal

Tinutugtog nang may kalakasan 

Wari'y lahat tayo'y tinatawagan

Taos-pusong magsisi at magdasal.

Mabuting gawa

Sakripisyong pagbabawa

Pagdarasal,

Pangungumpisal,

Pagtanggap ng Dugo at Katawang Banal -

Ialay ng taimtim sa kalooban.

Upang sa Inang Mahal na pamamagitan

Samo't hinaing, magkaroon ng kasagutan.

Dasal na - kaluluwa't katawan

Sana'y mahugasan.

'Di man magtamo ng himala

Pagkalooban sana ng biyaya

Walang tamhing masakit ni malala

Na sukat ikabahala.

Buhay ma'y mautas

Kamtin, gantimpalang wagas

Sa piling ng Panginoong Tagapagligtas.

CTTF

11/27/12

Page 4 of 4

Please press Older Posts for  Vol. 1, Issue 3, September 2012 and other issues.