KULTURA: Maria- Ina ng hindi kumukupas na Pag-ibig: Ang Pagdiriwang ng Kapistahan ng Birhen ng Sto. Rosario sa Parokya ni San Juan Bautista

     Kamakailan lamang ay ginunita ng buong bayan ang buwan ng Banal na Rosaryo, ang panahon kung saan ipinagdiriwang ang mga biyayang dulot ng pagdarasal sa Mahal na Birhen ng Santissimo Rosario na sadyang nakapangingilabot ang debosyon na aking nasaksihan. Sa iba't-ibang bayan, sa Maynila man o sa mga barrio lamang, at lalo na sa aking mahal na bayan, ang bayan ng Hagonoy, tunay nga na napakaraming paghahanda at pagdarasal. At mula dito bigla kong naisip ang unang pagkakataon na ako ay namulat at nakilala ang rosaryo, naala-ala ko tuloy ng bata pa ako, palaging sinasabi sa akin ng aking ina, tuwing alas sais dapat ay nasa tahanan na ako at ang aking mga kapatid upang mgdasal ng sama-sama ng rosaryo. At bilang isang taga-Hagonoy, hindi naman ito dayuhan sa akin sapagkat namulat ako sa isang bayan na puno ng mga mapagdasal na mga tao. Ang aking lola ay tagapag-ingat ng isang bisita, na minana pa niya sa aking mga ninuno, at karaniwan sa aming pamilya ay tagapagtangkilik ng Simbahan. At dahil sa halimbawang ipinakita nila sa akin, napalapit ako ng higit sa Mahal na Birhen simula ng ako ay matutong mamuno sa pagdarasal ng rosaryo.

Pinamununan ng mga deboto sa Mahal na Ina ng Stmo. Rosario ang banal na rosaryo sa patio ng Simbahan ni San Juan Bautista.

     Napakagandang panimula ito ng aking pananampalataya, ang bawat pagbigkas ko ng mga kataga sa pagdarasal ay parang mga hakbang kasama si Ina patungo sa aking kapatid na si Hesus, na tila musika itong nagdadala sa akin sa kapatawaran, pagpapasalamat at pagpupuri sa Diyos, at naglaon nga ay lalo pang nagigting ang aking debosyon. Noon ay natuwa nga ako noong may lumapit pa sa akin upang matulungan ang aming bisita na makapagpagawa ng sariling imahen ng Mahal na Birhen ng Santo Rosario, ito ay dahil na rin sa kanilang pagmamahal kay Ina, at nito nga lamang ngang nakaraang ikalawang lingo ng Oktubre, taong kasalukuyan ay pinalad rin akong mabisita ang isang tanyag na simbahang nagtatampok sa Mahal na Ina, ang simbahan ng La Naval de Manila at iyon ang unang pagkakataong nakita ko siya ng personal, at nagdulot ito sa akin ng lubos na kasiyahan.

Nagkaroon ng pagsasadula ng mga naganap noong paglilihi ng Mahal na Birheng Maria na ginanap ng mga kabataan ng parokya.

     At nito ngang ika-31 ng Oktubre, taong kasalukuyan, ginanap rin sa aming parokya, ang Parokya ni San Juan Bautista ang pagtatapos ng Buwan ng Rosaryo at ito ay sinimulan pa noong unang araw ng buwan ng Oktubre kung kailan itinaguyod ito ng mga deboto ni Ina sa pangunguna ng mga samahang Daughters of Mary Immaculate at Catholic Womens' League, isang buwan ng taimtim na pagdarasal, araw-araw na misa sa umaga, pag-aalay ng korona, bulaklak at rosaryo sa imahen ng Mahal na Birhen, at iba pang gawain katulad ng Living Rosary na ginanap naman ng huling linggo ng Oktubre ang inilunsad ng parokya, Sinimulan ito sa ganap na alas sais ng umaga, dinaluhan ito ng ibat-ibang samahang pang Simbahan pati na rin mga batang nagmula sa paaralang nasasakupan ng parokya, ang mga bata ay binigyan ng pagkakataong mamuno at makilahok sa nasabing gawain, upang makita sa kanila ang dapat na debosyong kanilang dapat na gawin upang lumawak pa ang kanilang pananampalataya at mas mapalapit pa sa Mahal na Ina, tunay itong naging makabuluhan. Tinapos ang pagdiriwang sa isang prusisyon na sinundan naman ng isang banal na misa na pinangunahan ng aming Kura Paroko, Rdo. P. Candido D. Pobre, Jr. at sa pagtatapos ng paggugunita ng araw na iyon, sadyang pinukaw nito ang damdamin ng mga mananampalataya at nag-iwan ng mensahe. At ang mensaheng ito ay dapat hindi lamang tuwing Oktubre, ang buwan o panahon ng pagdarasal ng Banal na Rosaryo dinarasal ang nasabing panalangin, kundi dapat araw-araw, dahil araw-araw din nating kasama at katuwang ng kanyang Anak na si Hesus, ang Mahal na Birhen, ang Inang may pag-ibig na hindi kalian man ay hindi kumukupas.

Ang pagdiriwang ng banal na Misa sa karangalan ng Birheng Maria na pinamunuan ng Kura Paroko, Rdo. P. Candido D. Pobre, Jr. 

Photo Courtesy: Gabriel S. Sebastian (Parish of St. John the Baptist)