PAGTINGIN/OPINION: LUIS ANTONIO CARDINAL TAGLE: Inspirasyon Para sa Mga Pilipino

    Mabilis na Taon sa Pilipinas - Sa loob ng isang taon, napakaraming bagay ang nangyari sa Pilipinas at napakaraming biyaya ang ibinigay ng Diyos sa ating bansa. Ilan na ang pagdiriwang ng ginituang Jubileo ng ating Diyosesis kasama ang kanyang kapatid na diyosesis, ang Diyosesis ng Imus; ang pagbibigay ng kanonikal na korona sa dalawang imahen ng Mahal na Birhen sa Malolos at Imus; ang pagkakahirang kay San Padre Calungsod.

     Ilan araw lang ang nakalipas nang hirangin ni Papa Benedicto ang pitong Episcopos mula sa iba’t ibang panig ng mundo upang maging kasapi ng College of Cardinals, isa na sa kanila ang Arsobispo ng Maynila na si Lub. Kgg. Luis Antonio G. Tagle. Ang naturang college ay ang kaagapay ng Santo Papa sa pagpapayabong ng pananampalataya ng mga Katoliko sa buong mundo at may tungkuling pumili ng susunod na mamumuno sa Simbahang Katolika alinsunod sa sinaunang kleriko ng Roma.

     Isang napakalaking karangalan para sa Simbahang Lokal ng Pilipinas ang pagkahirang ni Tagle bilang isang Kardinal, ika-pitong Pilipinong Kardinal. Tila naglumiwanag muli ang Pilipinas sa buong mundo, isang bituing nagsisimulang magbigay ng kaningningan. Ang lahat ng Pilipinong Katoliko, nasa Pilipinas man o sa ibang panig ng mundo, ay nakiisa sa pagsasaya dahil sa pagkahirang niya. Samu’t saring mga gawain ang pinasimulan at mga selebrasyon na ginawa, subalit mas pinili ng bagong hirang na Kardinal na maging payak lamang ang mga ito.

Marami ang nagsasabi na mayroon posibilidad na maging susunod na Santo Papa Si Tagle. Marahil nakatutuwang isipin ang posibilidad na ito, kung magkakataon man ay magiging unang Santo Papang Pilipino ang Arsobispo ng Maynila. Walang masama sa paghahangad nito pero dapat hindi ito ang pagtuunan natin ng atensyon sa panahong ito. Hindi naman mahalaga kung magiging Santo Papa man siya o hindi, ang mahalaga ay kung paano natin nakikita na nananahan si Hesus sa kanyang salita at gawa na nagbibigay ng inspirasyon sa ating lahat. Kinakailangan lamang na huwag tayo magbulag-bulagan at huwag lamang tayo tumingin sa mga bagay na nakikita lamang n gating mga mata, mas mahalaga pa nga ang mga bagay na nakikita ng ating mga puso.

Mabilis ang mga pangyayari sa kanyang buhay at ang mga ito ay hindi niya inaasahan. Subalit tulad niya, lagi lamang tayo tumugon sa tinig ng Diyos at tingnan lamang natin ang Kanyang maamong mukha upang tayo ay hindi maligaw sa landas na ating tinatahak kahit ito ay taliwas sa ating inaasahan.

Mas mahalaga na makita natin kung paano nabubuhay si Kristo sa kanyang persona at kung paano niya isinasabuhay ang Mabuting Balita ng Panginoon sa pamamagitan ng kanyang payak na pamamaraan. Mula dito ay humugot din tayo ng pamamaran kung paano magiging banal na sumusunod kay Hesus Kristo dahil ito ang kinakailangan nating mga Pilipino sa mga panahong ito kung kalian unti-unti nang bumababa ang moralidad ng mga tao. Sa kabila, ng naglulumiwanag na biyaya ng Diyos sa ating bansa, sa anong paraan tayo tumugon dito? 

News on Cardinal Tagle's Elevation to the College of Cardinals

Ukol sa Manunulat: Si Sem. Samuel Aldaba Estrope, II ay miyembro ng Hagonoy Seminarians' Association (HASA) na kinabibilangan ng mga seminaristang may lahi at mga lumaki sa Hagonoy. Lahi siya ng pamilya Aldaba ng Sta. Monica at Santos ng San Jose, Hagonoy. Siya ay parokyano ng Parokya ng Inmaculada Concepcion - Katedral at Basilika Minore. Naglilingkod siya bilang Section Editor for Kultura|Cultura ng pahayagang ito.