KULTURA: Pasasalamat ng Birhen ng Barangay ng Mga Taga-Sitio Peralta (San Sebastian, Hagonoy)

     Noong ika-10 ng Abril, 1962 ipinagkaloob ng isang pari na naka-destino sa Parokya ni Sta.Ana ang isang kwadro na may imahe ng Mahal na Birhen ng Barangay kay Gng. Claudia Payongayong at napagkasunduan ng pamilya na ilibot sa bahay-bahay ng sitio Peralta sa San Sebastian ang imahen at dito nagsimula ang taunang pagbibigay-parangal at pasasalamat sa Mahal na Birhen ng Barangay sa mga biyaya na ipinagkakaloob nito sa kanila at naisip din nila na magpatayo ng isang maliit na kapilya. Kaagad naman itong natugunan ng Pamilya Perez na nagbigay ng donasyon ng isang maliit na lote para dito itayo ang kapilya at doon nagtulong-tulong ang mga taga-sitio Peralta na manghingi ng tulong o mangilak para maipatayo kaagad ang kapilyang ito. At hindi nagtagal, natapos ang kapilya at binasbasan noong 1990.

  Ngayong Abril 15, 2012 ang napili nilang araw para ipagdiwang ang pasasalamat sa Mahal na Birhen ng Barangay napaka-espesyal ang taon na ito dahil 50-taon na simula ng ibigay sa kanila ang imahe ng Mahal Birhen ng Barangay. Nagsimula ang pasasalamat sa isang banal na misa na pinangunahan ni Rdo. P. Rodrigo S. Samson, bisitang pari sa Parokya ni Sta. Ana sa ganap na ika-9 ng umaga at sinundan ng isang masayang prusisyon kung saan inilibot sa buong Sitio Peralta at mga kalapit na palaisdaan and imahen bilang pasasalamat din nila sa mga biyaya na dumarating sa kanila. Matapos ang prusisyon nagkaroon ng isang munting salo-salo sa tahanan ni Gng. Claudia Payongayong na gumanap bilang Hermana Mayor sa ika-50 taon na anibersaryo ng pagbibigay sa kanya ng imahe ng Mahal na Birhen ng Barangay.

Mga Larawan ng Pagdiriwang

(Mula kay: Christian C. Flores)

Ang kapilya ng Mahal na Ina ng Barangay, Sitio Peralta, San Sebastian, Hagonoy.

Ang mga imahen ng Virgen de Barangay ng mga mananampalataya na pinagsama-sama sa sanktuwaryo para 
sa pagdiriwang.

Pagdiriwang ng Banal na Misa sa pangungun ni Rdo. P. Rodrigo S. Samson, Bisitang Pari sa Parokya at Pambansang Dambana ni Sta. Ana.

Ang masayang pag-ikot ng prusisyon sa paligid ng Sitio Peralta kasama ng Hermana Mayor, Gng. Claudia Payongayong.