KULTURA: Ang Kapistahan ng Pagiging Martir ni Apostol San Pablo: Ang Pista Minor ng San Pablo, Hagonoy

     Tuwing buwan ng Hunyo, isa sa mga ipinagdiriwang sa ating Simbahang Katoliko ay ang Kapistahan ng pagiging martir ng magkaibigang apostol na sina San Pablo at San Pedro. Sa nayon ng San Pablo, Hagonoy, na sakop ng Parokya ng Ina ng Laging Saklolo lubos na ipinagdiriwang ang lahat ng kapistahan na may kinalaman kay Apostol San Pablo kasama na rin ang Kapistahan ng Pagbabalik-loob ni San Pablo sa Damasco.

Bilang paghahanda para sa pagdiriwang, nagkaroon ng tinatawag na Triduo o tatlong araw na misa para sa mga mananampalataya ng bisita ng San Pablo na pinanguhana ng Kura Paroko ng Parokya ng Ina ng Laging Saklolo, Rdo. P. Paul Samuel M. Suñga. Ang kapistahan naman ay naganap sa pangunguna ng Hermano Mayor noon na si G. Felipe Sarmiento. Sa tatlong araw na paghahanda ay nagkaroon din ng pagtuturo tungkol sa buhay ni San Pablo bago ang banal na misa para sa kaliwangan ng mga mananampalataya.

   Noong ika-29 ng Hunyo, sinimulan ang kapistahan sa pamamagitan ng pagdarasal ng rosaryo bago ang pagdiriwang ng Banal na Misa. Si P. Suñga din ang nanguna sa pagdiriwang bilang pasasalamat ng buong parokya sa pagdiriwang ng barrio ng San Pablo. Sinundan ang misa ng prusisyon ng imahen ng Apostol San Pablo na nagmula sa bisita ng San Pablo patungo sa sitio na tinatawag na Balakbak, ang palalim na pagpasok mula sa San Pedro tungo sa San Pablo. At mula dito, umakyat ito patungo sa Halang na bahagi ng barrio ng San Pedro hanggang sa ibinalik muli ito sa tahanan nito sa bisita. Matapos ang pagdiriwang nagkaroon ng isang sa munting salu-salo para sa lahat ng mga nagsipagdalo.

  Dahil sa hindi ito ang ipinagdiriwang na malaking kapistahan o pista mayor ni San Pablo, wala na itong misa at prusisyon sa gabi. Hindi na rin nagkakaroon ng pagpapalitan ng hermano. Bagkus, ito ay ginaganap tuwing Kapistahan ng Pagbabalik-loob ni San Pablo, na siyang Pista Mayor na ipinagdiriwang tuwing ika-25 ng Enero. 

Mga Larawan ng Pagdiriwang:

(Mula kay Sem. Kendrick Ivan B. Panganiban)

Ang kapilya ni San Pablo sa Hagonoy ay isa sa mga lumang simbahan sa bayan. Dati itong bahagi ng Parokya ni Sta. Elena Emperatris bago ito ibinigay sa Parokya ng Ina ng Laging Saklolo bilang nasasakupan nito.