PAGKILALA/TRIBUTE: GAWAD PARANGAL PARA SA MGA KATEKISTA: Parangal ng Msgr. Jose B. Aguinaldo Foundation

Layon ng Msgr. Jose B. Aguinaldo Foundation

   Simula noong taong 2003, linayon ng Msgr. Jose B. Aguinaldo Foundation, Inc. na makapagdulot ng tulong pinansyal sa mga nangangailagan ayon na rin sa diwa ng pagiging mapagbigay ng tagapagtaguyod nito na si Msgr. Jose “Peping” Aguinaldo. Sinabi niya sa kanyang tula:

Sa harap ni Kristo Jesus sa Banal na Sakramento.

Walang gatol at malaya na nagpas'ya ang loob ko:

Tahasan kong itatayo FOUNDATION MONS. AGUINALDO.

Tanang bigay sa “ 'kin ng Diyos, ibabalik ko kay Kristo,”

NAKIKINA-KINITA KO na pag-alis ko't pagyao,

Ang konti kong maiiwa'y masayang kahit mumo!

…

Di dapat maghinanakit sinuman sa kamag-anak,

Kung ang kailanga'y tulong, FOUNDATION ko ang gaganap;

Tutuwang din sa pasani't dadamay sa paghihirap,

Maysakit ma't mag-aaral, kung di kaya at mabigat;

Foundation ko'y may gampaning magpagaan sa balikat,

Sa dalahing hindi kaya ay tutulong nang matapat.

(Aguinaldo, 2003, 108 - 109)

Ang Gawad Parangal para sa mga Katekista

   Mula dito binibigyang pansin ang mga naging gawain ng samahang ito sa panahong nagdaan. Sa pamamagitan ng samahang ito, nagkaroon ng tulong pinansyal para sa mga seminaristang pumapasok sa teolohiya upang matulungan sa kanilang mga pangangailangan. Bukod dito, mayroon ding mga gawain sa Pambansang Dambana at Parokya ni Sta. Ana at ng Bikarya ni Sta. Ana ng Hagonoy na kung saan tumulong at nanguna ang nasabing grupo. At sa pamumuno ng kasalukuyang nitong tagapamuno, Rdo. Msgr. Sabino A. Vengco, Jr. na pinagkatiwalaan ni Mons. Peping para foundation, muling nakaisip muli ng paraan ang samahan upang makatulong sa mga nangangailangan, lalo na sa mga bunying katekista ng bikarya.

   Dahilan ng pagmamahal ni Mons. Peping para sa tulong na ginagawa ng mga katekista, minarapat na gumawa ng paraan ng foundation upang makatulong sa kanila, lalo na sa mga nagtagal na sa paglilingkod. Kaya naman, ayon sa layon ng foundation inumpisahan ng Board of Trustees na magkaroon ng pagkilala sa “tatlong katekista ng Hagonoy bilang bahagi ng pagtataguyod sa napakahalagang gawain nitong mga katulong sa paghubog ng ating mga kabataan sa pananampalataya.” (Vengco, 2012, 1.) Mula dito namili ang samahan ng tatlong kababaihang beterana na noo'y nagtuturo bilang mga katekista upang bigyan sila nang natatanging parangal para sa kanilang paglilingkod. Minarapat itong gawin sa pagdiriwang ng anibersaryo ng kamatayan ng minamahal na si Mons. Peping tuwing ika-11 ng Mayo. Hindi lang ito naganap sa mismong araw ng pagdiriwang dahil sa nagdaang bagyo na nagresulta sa pagbaha sa Hagonoy. Kaya naman, noong ika-25 ng Agosto, araw ng Sabado inanyayahan ng foundation ang lahat ng mga katekista mula sa mga parokya ng Bikarya ni Sta. Ana ng Hagonoy upang alalahanin ang buhay ni Mons. Peping at upang parangalan ang mga nasabing katekista.

Makikita sa larawan ang mga nagrerehistrong mga katekista mula sa iba't ibang parokya sa Hagonoy. At sa kanilang pagrerehistro ipinamigay din ang bagong issue ng BATINGAW ng Msgr. Jose B. Aguinaldo Foundation. Kapansin-pansin din ang suot ng mga katekistang mga kamiseta na ibinigay ng foundation bilang paghahanda sa "Year of Faith."

   Nagsimula ang pagrerehistro ng mga dumalo noong alas tres y medya ng hapon sa Bulwagang Sta. Ana sa Pambansang Dambana ni Sta. Ana. Mula dito nagtipon-tipon ang mga dumalo sa Libingang Bantayog ng Kapatiran ng Kapariang Taga-Hagonoy (KAKATHA) kung saan nakahimlay ang mga labi ni Mons. Peping. Suot-suot ng mga sumama sa pagdiriwang ang mga kamiseta mula sa foundation bilang paghahanda sa “Taon ng Pananampalataya” o “Year of Faith” na bubuksan sa Oktubre ngayong taon ni Papa Benedikto XVI. (Ibid., 2.) Dito ginanap ang misa sa karangalan ng ika-9 na anibersaryo ng pagpanaw ni Mons. Peping na pinagunahan ni Rdo. Msgr. Sabino A. Vengco, Jr., tagapamuno ng MJBA Foundation at ni Rdo. Msgr. Luciano C. Balagtas, Kura Paroko at Rektor ng Pambansang Dambana ni Sta. Ana. Kasama dito sa pagdiriwang si Sem. Kendrick Ivan B. Panganiban, tagapangasiwa ng pahayagang ito at ilang kasapi ng Catholic Hagonoeño Vicarial Media Group.

Itaas: Ang mga katekistang nagbabasa ng bagong issue ng BATINGAW bago ang pagdiriwang ng Banal na Misa.
Ibaba: Si Msgr. Vengco at Sem. Panganiban na nag-uusap bago ang Banal na Misa. Kapansin-pansin din dito ang mga imahen ni Sta. Ana at ng Mahal na Birhen sa harap ng altar na siyang mga parangal para sa mga katekista.

Sa pagdaloy ng pagdiriwang naganap ang paglabas ng ika-walong bilang ng BATINGAW: Lathalaing Opisyal ng MJBA Foundation na may online version sa pahayagang ito. At mula dito, binasa ang mga pangalan ng mga beteranang katekista upang sila'y bigyang parangal. Ayon kay Msgr. Vengco, isa na lamang ang buhay sa tatlong paparangalan at sa mga anak naman ng mga pinarangalan ipakakaloob ang Gawad Parangal. Ang mga pinarangalang mga katekista noong pagdiriwang ay ang mga sumusunod: 1.) Bb. Victoria Saguinsin Torres (+), 2.) Bb. Genoveva Sangalang Sunpayco (+) at 3.) Bb. Julita de Leon Rubio (1923 - ). (Makikita ang kanilang mga talambuhay sa BATINGAW ONLINE page ng pahayagang ito.)

Makikita sa mga larawan ang mga sumusunod: 1.) si Gng. Consolacion T. Faundo, Literary Editor and Contributor sa pahayagang ito at pangulo ng samahan ng mga Lektor at Commentator sa Parokya ni Sta. Ana; 2.) si Msgr. Luciano C. Balagtas, Kura Paroko at Rektor ng NSSA na sumama sa pagdiriwang, at 3.) si Msgr. Sabino A. Vengco, Jr., pangulo ng MJBA Foundation at nanguna sa pagdiriwang.

   Pinagkalooban si Bb. Rubio at ang mga kaanak nina Bb. Torres at Bb. Sunpayco ang imahen ni Apo Ana at Niña Maria na patrona ng Bikarya ng Hagonoy na siyang naging parangal para sa kanilang naging paglilingkod. Para sa natirang pinarangalan na nabubuhay pa, binigyan naman siya ng foundation ng isang sobreng may halagang maaari niyang gamitin para sa kanyang mga pangangailangang pankalusugan. Ayon kay Msgr. Vengco, sisimulang gawin ang pagbibigay na ito para sa mga matatanda nating mga katekista upang sila'y mabawian natin kahit konti sa kanilang naging pag-aalay para sa Simbahan. Matapos ang pagidirwang nagkaroon ng isang munting salu-salo na handa ng foundation.

Patuloy na Paglilingkod

At sa huli, isa muling pagtutulong ang naganap sa pamamagitan ng mga kawanggawa na inumpisahan ni Mons. Peping para sa mga nangangailangan. Isa lamang itong pagpapatuloy sa gawaing naumpisahan na at nagmimistulang pamana para sa lahat ng mga Katolikong bukas ang loob para sa iba. At dito iniiwanan tayo ni Mons. Peping ng kanyang pagbatid para sa kawanggawa:

Ang FOUNDATION ay ako rin, pumanaw ma'y parang buhay,

Kawanggawa at pag-ibig sa kapuwa ang sandigan;

Di naman makasarili, kundi pawang kabutihan,

Ang layon ko na isabog na binhi ng kaligtasan;

Ito yaong iiwan kong pamana sa KAPARIAN,

Ang lahat ay para sa Diyos, sa kapuwa'y pagmamahal!

(Aguinaldo, Ibid., 109.)

Mga Sanggunian:

Aguinaldo, Msgr. Jose B. “Msgr. Jose B, Aguinaldo Foundation” in Takip-Silim: Mga Tula ni Rt. Rev. Msgr. Jose B. Aguinaldo, P.A. Hagonoy, Bulacan: Msgr. Jose B. Aguinaldo Foundation, Inc., 2003.

Vengco, Msgr. Sabino A., Jr. “Tatlong Katangi-tanging Katekista ng Hagonoy” Batingaw: Lathalaing Opisyal ng MJBA Foundation, Bilang 8 (2012).

Photo Courtesy: Sem. Gio Carlo B. Almirañez and Sem. Justine Cedric C. Espinosa (Administrative Team)