PAGKILALA/TRIBUTE: ST. MARY'S ACADEMY OF HAGONOY: Punlaan ng mga Mangingisda ng Pananampalataya

     Makalipas ang isang daan at anim na taon, patuloy pa rin na naglilingkod ang sinasabing unang katolikong paaralan na naitatag sa ating lalawigan, dito sa ating minamahal na bayan ng Hagonoy. Ang St. Mary's Academy of Hagonoy (SMAH) na kilala natin sa dating pangalan nito na St. Anne's Academy ay nagpunla at umani ng mga bungang nag-ugat sa pagpupunyagi ng mga madre ng Religious of the Virgin Mary (RVM) na nangasiwa dito. Sumibol mula paaralang ito ang mga mananampalataya ng iba't ibang larangan: mga manggagamot, mga guro, mga abogado, atbp. Ngunit isa din sa mga hindi matatawarang ani sa punlaan na ito ay ang mga bokasyon sa pagpapari. Lingid sa kaalaman ng nakararami na tinawag ang bayan ng Hagonoy bilang “Bayang Levitico” o “Bayan ng mga Pari” ay bunga ng mga paring nagmula sa ating lugar na kinalakhan. Kung titignan natin ang Banal na Kasulatan, masasaksihan natin ang paghirang ng Panginoong Hesu-Kristo sa kanyang mga alagad bilang mga “mamamalakaya ng mga tao.” At gayundin naman kilala ang bayan ng Hagonoy sa mga “mamamalakaya ng yamang dagat” - ang mga mangingisda – at ma “mamamalakaya ng tao” - ang mga paring Katoliko. Sila ang mga sumunod sa tawag ng Panginoon at nakatutuwang malaman na marami sa mga ito ang nagmula sa paaralan ng St. Mary's.

     Narito ang ilan sa mga binhing tumubo at nagmahal sa bokasyon ng pagkapari mula noon hanggang ngayon at ang ilan sa kanila na nasa piling na ng Poong Maykapal:

Mga Paring Buhay:

Rdo. Msgr. Emmanuel Vengco Sunga, H.P.

Grade School, Batch 1956

Inordinahan: Disyembre 23, 1967

Mula sa nayon ng Sto. Niño, kasalukuyang Kura Paroko at Rektor ng Panarkidiyosesis na Dambana ng Nuestra Señora de Loreto sa Sampaloc, lungsod ng Maynila.

Rdo. P. Anacleto Clemente Ignacio

Inordinahan: Disyembre 1, 1973

Mula sa nayon ng Sta. Monica, kasalukuyang Kura Paroko ng Parokya ni San Pedro Apostol, Tungkong Mangga, lungsod ng San Jose del Monte sa Bulakan.

Rdo. P. Leon Gutierrez Coronel

Inordinahan: Mayo 30, 1979

Mula sa nayon ng San Agustin, kasalukuyang Paring Tagapamahala sa Malaparokya ng Birhen ng Inmaculada Concepcion sa Concepcion, Baliwag, Bulakan.

Rdo. Msgr. Andres Santos Valera, H.P.

Inordinahan: Marso 7, 1981

Mula sa nayon ng San Jose, kasalukuyang Bikaryo Heneral ng Diyosesis ng Malolos at Rektor ng Seminaryo Mayor ng Inmaculada Concepcion sa Tabe, Guiguinto, Bulakan.

Rdo. Msgr. Ranilo Santos Trillana

Inordinahan: Marso 7, 1985

Mula sa nayon ng Sta. Monica, kasalukuyang Bikaryo Episkiopal ng Katimugang Distrito ng Diyosesis ng Malolos at Kura Paroko ng Parokya ni Sto. Cristo, Marulas, lungsod ng Valenzuela.

Rdo. P. Godofredo Tamayo Atienza, SDB

Inordinahan: Enero 31, 1988

Mula sa nayon ng San Sebastian, kasalukuyang nakadestino sa Don Bosco Technical Institute sa Victorias, Negros Occidental.

Rdo. P. Vicente Burayag Lina, Jr.

Inordinahan: Disyembre 12, 1989.

Mula sa nayon ng Sto. Niño, kasalukuyang Tagapangulo ng Pandiyosesis na Lupon ng Pangangalaga ng Pamanang Kalinangan ng Simbahan (Church Cultural Heritage) at Kura Paroko at Rektor ng Pandiyosesis na Dambana ng Mahal na Puso ni Hesus sa Cruz na Daan, San Rafael, Bulakan.

Rdo. P. Virgilio Mangahas Cruz

Inordinahan: Hulyo 14, 1990

Mula sa nayon ng San Jose, kasalukuyang Kura Paroko ng Parokya ni Sta. Monica sa Angat, Bulakan.

Rdo. P. Rolando Reyes Atienza

Inordinahan: Disyembre 27, 1994

Mula sa nayon ng Sagrada Familia, kasalukuyang tagapamatnubay sa kabanalan ng Pandiyosesis na Lupon ng Kabataan at Kura Paroko ng Parokya ng Sto. Cristo, Sto. Cristo, Pulilan, Bulakan .

Rdo. P. Aldrin Tolentino Lopez

Inordinahan: Hunyo 17, 1995

Mula sa nayon ng Sto. Rosario, kasalukuyang Kura Paroko ng Parokya ng Banal na Sakramento, Talipapa, Novaliches sa lungsod ng Quezon.

Rdo. P. Joselito Robles Martin

Inordinahan: Hunyo 17, 1995

Grade School, Batch 1981

Mula sa nayon ng San Sebastian kasalukuyang taga-hubog sa Kagawaran ng Teolohiya ng Seminaryo ng san Carlos, Guadalupe, lungsod ng Makati.

Mga Paring Sumakabilang buhay:

Rdo. P. Juan Benedicto Rodriguez Santos

Inordinahan: Disyembre 4, 1973

Namayapa: Agosto 4, 1992

Mula sa nayon ng Sta. Monica,

Rdo. P. Fernando Villanueva Fernando

Inordinahan: Hunyo 27, 1987

Namayapa: Enero 11, 1990

     Kaya naman ikinararangal namin ang mga saserdoteng ito na ani ng punlaan ng St. Mary's Academy dahil sa inyong pagsunod sa yapak ng ating Panginoon bilang mga mamamalakaya o mangingisda ng ating pananampalataya. Kayo ang mga may dugong Ignacian-Marian ang patuloy na bumibigkas ng sabay-sabay ng mga pangungusap na “Purihin si Hesus at si Maria” at walang sawang sumasambit ng “Ngayon at Magpakailanman, Amen.” Kayo ang biyaya ng Diyos sa sambayanan - “Tu es Sacerdos in Aeternum” - “Ikaw ay pari magpakailanman.” Sila ang nagpapatunay na bumubuhos ang biyayang nagpapanibago at pananampalatayang di-nagmamaliw sa paaralang naging kanilang pangalawang tahanan. Dito sumibol ang kanilang bokasyon at nawa dumami pa ang mga kalalakihan na dugong Ignacian-Marian na tumugon sa tawag ng Panginoon sa bokasyon ng pagpapari.