PANITIKAN/LITERARY: Sa Iyong Pagsilang, Inang Maria

Mula sa Patnugot: Ukol ang tulang ito sa pagdiriwang ng Kapistahan ng Kapanganakan ng Birheng Maria mula sa sinapupunan ni Sta. Ana sa barrio ng San Jose, Hagonoy, Bulakan.

Sa Iyong Pagsilang, Inang Maria

Simula pa’y

Turo ng aming magulang,

Birhen Maria’y

Mahalin, tularan.

Nagsilbing palaisipan

Sino kaya itong si Maria,

Bukang-bibig ng balana?

(Sa aming paaralan –

Nuo’y St. Anne’s

Ngayo’y SMAH

Mga madre’y matiyagang isinasaysay

Palad ng Inang Mahal.

Pinili at sadyang nilalang

Sa milyong babae’y itinaan

Maging Ina ng Tagapagligtas

Ng santinakpan.

Kaming lahat, pawang namaang

Si Maria nga pala’y

Kahanga-hangang tunay.

“Di man dapat,

Marami sa amin ang nainggit

Sabay nulas – “Sana, ako na ‘lang.”

Kung aalagatain

Sino’ng hindi mananaghili?

Kayo na ang tumugon,

Kayo na ang magdalit;

Si Maria ngayon

Katawan at kaluluwa, nasa langit!)

Sa tipan, ang kuwento,

Kukulangin, hindi hihigit, ay ganito:

Si Eba’t si Adan

Nagkasala, utos ng Diyos ay sinuway.

Tuos, sa kanilang ginawa’y

Tinakdaan ng kaparusahan.

-1-

Sa Eden na halamanan

Wala na silang karapatan.

“Di na maaaring mabuhay nang masagana

Ano man sa hardin, nawala na sa kanila.

Maghihirap, lupa’y bubungkalin

Upang bukas, mayroong makain.

Palibhasa’y mahal ng Panginoon,

Hindi natiis, binigyan ng pagkakataon.

Ipinangakong susuguin,

Kalugurang Bunso

Ang misyon- “Tubusin ang madlang-tao

Sa kinasadlakang siphayo

Upang sa wakas, makabalik sa paraiso.”

Kasaysayan ang naglahad –

Ana at Joaquin

Mag-asawang mataimtim

Wari’y sinubok, tapat na damdamin.

Sa tinagal-tagal ng pagsusuyuan

Mandi’y hindi magkakasupling.

Subali’t plano ng Diyos

Walang makatatalos

Pag-iibigan ng mag-asawa

Nang lumaon ay nagbunga

Kahit si Ana

Bukod, baog na,

Ay matanda pa.

At si Maria nga

Ipinaglihing walang sala.

Inmaculada Concepcion, taguri sa kanya.

Sa langit man o sa lupa

Walang sinlinis, walang singganda.

Upang sa Anak ng Lumikha

Siya’ng magdadala

Magsisilang, iibig at mag-aaruga.

Birhen, Inang dakila

Sadyang pinagpala

Maningning, walang kapara

Malinis, dalisay; sapul, walang sala.

-2-

Kanyang sinapupunan,

Laang Templo ng Panginoon

Wangis ay lantay ng gintong tahanan

Nararapat sa Haring doon ay sisimpan.

Sa pagdatal sa aming buhay,Birhen Maria,

Pasasalamat, hindi masusukat.

Sa pagiging tunay naming Ina

Isa kang biyaya.

Sa aming nangangailangan ng awa

Nagmamahal, nagpapala.

Pagsapit ng iyong kaarawan

Pagbubunyi, kulang at kulang man,

Kahit na pa, Inang kalinis-linisan

“Happy Birthday” na marangal,

Karapat-dapat kang itanghal!

Sa araw na ito

May Banal na Misa

Parangal sa iyo

Buhay mo’t sakit, inaalalang totoo.

Tampok, bilang Ina

Ng Dakilang Manunubos, si Hesukristo.

Matapos ang Banal na Eukaristiya

Babae’t lalaking legionario,

At lahat ng mananampalatayang nagmamahal sa iyo –

Sa patio

May pinalilipad na lobo.

Kulay puti

Pinagtali-tali

Animo’y Mahal na Rosaryo.

Upang sa langit, sumapit

Dalanging – “Dito sa mundo,

Huwag itulot gutom at dusa;

Sa hilahil at pangamba,

Madlang-tao’y ipag-adya.”

Kung sa akala ng iba

Pagdiriwang nagwakas na,

Huwag ka!

May malaking “birthday cake” pa

Nakahain sa mesa.

Handog ng “Caroline’s Bake Shop” sa Mahal na Ina

Pagsasaluhan, ng sa araw na ito, ay nakiisa.

-3-

Balintuna man

Sa kaugalian,

Sa pagdiriwang,

Nitong iyong pagsilang

Kaming iyong mga anak

Ang sa iyo’y lumalapit.

Dinggin mo sana ang aming panambit.

Dasal, inaawit

Awit, dinarasal.

Naninikluhod, namamanhik.

Huwag pababayaan,

Bayang humihibik

O, Birhen Maria,

Inang walang kasing-rikit!

MALIGAYANG KAARAWAN, INANG MAHAL!

cttf

8/29/12

Photo Courtesy: Arvin Kim M. Lopez (National Shrine of St. Anne)

Page 6

Please press Older Posts for the 2nd Quarter.