KULTURA | CULTURE: Pagdiriwang ng Rosaryong Pampurok sa Karangalan ng Ina ng Laging Saklolo sa Parokya ng N.S. del Santissimo Rosario

Gawaing pangmatagalan, 

mga debotong nagbabahay-bahay sa barrio upang manalangin, mamintuho kay Maria.

Tignan ang debosyon ng Block Rosary 

na nagpapamalas ng pagmamahal ng mga  laykong deboto sa Ina ng Laging Saklolo sa Sto. Rosario.

Kasaysayan

Ayon sa tala, taong 1950, sa kapahintulutan ng Kura Paroko ng Parokya ni Sta. Ana na si Rdo. P. Celestino Rodriguez, nagsimulang ipalaganap ang debosyon sa Mahal na Ina ng Laging Saklolo. Limang katao na kinilala sa mga pangalang Euporio, Teresita, Antonio, Macario at Victor ang sinasabing nagdala ng mga imahen ng ating Mahal na Ina sa noo’y inihahanda pa lamang na Parokya ng Nuestra Señora del Santissimo Rosario. Sila rin ang nagturo ng mga panalangin at awit para sa debosyon ni Maria.

Limang barrio na sakop ng naturang parokya ang napagdalhan ng debosyon. Tig-dadalawang imahen ang dinala sa San Pascual, Sto. Rosario at Mercado, samantalang isa naman sa San Roque, Sta. Cruz at sa tinatawag ngayong Villa Socorro. Upang maituro at mapalaganap ang debosyon sa Mahal na Ina, pinangasiwaan ng mga pinagdalhan ng mga imahen ang pagdadala nito sa bawat tahanan. Tatlong araw itong mananatili sa isang bahay at dito ay darasalan ng santo rosaryo. Matapos ang tatlong araw ay ililipat ito sa iba pang tahanan.

Lumipas ang panahon na wari’y lumago ang naturang debosyon at dumami nang dumami ang mga samahan na nagsasagawa nito. Dahil dito ay tinawag na itong mga Rosaryong Pampurok o mas kilala sa tawag na Block Rosary. At upang magkaroon ng pagkakakilanlan ay binigyan ang bawat isang Block Rosary ng kaakibat na numero bilang pamagat.

KASAPIAN - Ang isa sa mga grupo ng Block Rosary Movement sa Parokya ng N.S. del Santissimo Rosario kasama ang Hermana Mayor ng pagdiriwang.

Villa Socorro

Marahil ang maituturing na matagumpay na debosyon sa Mahal na Ina ay ang mga taga-Alanganin Sta. Cruz-Sto. Rosario, sapagkat sa lahat ng pinagdalhan ng imahen ay sila lamang ang nakapagpatayo ng munting bisita para sa Mahal na Birhen. Sinasabing nagsimula ang lahat nang tanggapin ng isang nagngangalang Apo Celina ang imahen ng Ina ng Laging Saklolo. Sa katunayan ay binuksan pa ni Apo Celina ang kanyang tahanan upang doon ganapin ang pagdarasal ng rosaryo, kasama ang mga kabataan ng nayon.

Ayon pa sa mga kwento, kasabay ng paglago ng pananampalataya ng mga taga-Villa Socorro ay ang paggaan ng buhay at pagdami ng hanapbuhay ng mga taga-roon. Dahil dito ay napagdesisyunan na ipagpagawa ng maliit na bisitang pawid at istik ang Mahal na Ina. Ang ikalawang taon nga ng pagdiriwang ng anibersaryo ng pagdating ng imahen ay sa itinayong bisita ginanap.

Hanggang sa kasalukuyan ay makikita pa ring nakatayo ang munting bisita na ngayon ay bato na sa hangganan ng mga barangay ng Sta. Cruz at Sto. Rosario. Patuloy pa rin ang pagpapalipat-lipat ng imahen ng Mahal na Ina ng Laging Saklolo sa bawat tahanan na nasasakupan ng lugar.

AKTIBO - Kasama sa pag-unlad ng mga Block Rosary movement sa Parokya ng N.S. del Santissimo Rosario ang paglahok ng mga laykong lingkod lalo na ng mga kabataan.

Kapistahan

    Naging tradisyon na ng mga samahan ng bawat Block Rosary na ipagdiwang ang Kapistahan ng kanilang anibersaryo taun-taon. Bawat isa ay may sari-sariling petsa ng kapistahan na isinasabay sa buwan at araw ng pagdating sa kanilang grupo ng imahen ng Mahal na Ina ng Laging Saklolo. Tunay na pinaghahandaan ng bawat samahan ang kanilang kapistahan. Tulad ng ibang pista ay nagsisimula ang pagdiriwang sa pamamagitan ng Banal na Misa na sinusundan ng prusisyon. Sa prusisyon ay may tinatawag na abayan o ang pag-iimbita sa mga Block Rosary ng mga karatig-nayon. Bago matapos ang prusisyon ay ginaganap rin ang “aloante’ o alay. Dito ay umaawit o tumutula ang mga batang babae habang sinasabayan ng pagsasaboy ng mga bulaklak na wari ay inaaliw at hinaharana ang Mahal na Ina.

   Bilang tanda ng lalo pang paglago ng debosyon sa Mahal na Ina, noon lamang isang taon ay pinasimulan ni Rdo. P. Quirico L. Cruz ng Parokya ng Nuestra Señora Del Santissimo Rosario ang sama-samang pagdiriwang ng Kapistahan ng Ina ng Laging Saklolo na ginaganap tuwing ika-27 ng Hunyo taun-taon. Dito ay pinagsasama-sama ang lahat ng Block Rosary na nasasakupan ng parokya upang ipagdiwang ang Kapistahan ng Ina ng Laging Saklolo. Mula sa siyam na samahan na binigyan ng imahen at nagpalaganap ng debosyon sa Mahal na Ina ay labing-dalawa na ang mga ito sa kasalukuyan. Ito ay ang Block Rosary Nos. 1, 2, 5, 6, 7, 8, 11, 12, 13, 15, 17 at 23. Bawat samahang ito ay lubos na nakikiisa sa mga gawain ng parokya na may kinalaman sa pagpapalaganap pang lalo ng debosyon sa Ina ng Laging Saklolo.

PARANGAL - Binigyang parangal sa pagkakataong ito sa Parokya ng N.S. del Santissimo Rosario ang iba't ibang laykong lingkod mula sa mga Block Rosary Unit na nagtaguyod sa kapistahan. Kapansin-pansin ang imahe ng Ina ng Laging Saklolo na hawak-hawak ng mga hermana.

   Tunay na malayo na ang nararating ng debosyon para sa Mahal na Ina ng Laging Saklolo sa Parokya ng Sto. Rosario. Lumipas man ang higit sa 60 taon ay hindi pa din ito nalilimutan bagkus ay patuloy pang lumalago. Nararapat lamang na bigyan natin ng karampatang pagkilala at pintakasi ang Mahal na Ina, ang ating tulay tungo sa Panginoong Hesus.

Photography Acknowledgement: Elena V. Macapagal
                                                Parokya ng N.S. del Santissimo Rosario
                                                Sto. Rosario, Hagonoy, Bulakan