KULTURA | CULTURE: "HINDI MO MATATANGGIHAN ANG MAHAL NA INA": Ang Natatangi at Nananatiling Debosyon sa Ina ng Laging Saklolo sa Parokya ni Sta. Elena Emperatriz

Kay Maria Inang tunay, 

isang pag-alala sa pagmmahal ng kanyang mga deboto.

Isang pagpapakita ng debosyon sa Masintahing Ina mula sa mga lingkod ng parokya sa Sambayanan ng Diyos sa Sta. Elena Emperatriz.

   Ang orthodox na larawan ng Ina ng walang-katapusan at walang-humpay na pagtulong o mas kilala nating mga mananampalataya sa tawag na Ina ng Laging Saklolo ay isa sa mga kilala at may malawak na debosyon ukol sa Mahal na Birhen sa Pilipinas. Ayon sa kasaysayan ang pangalan ng Ina ng Laging Saklolo ay nagmula sa Mahal na Ina sa isang aparisyon sa isang maliit na bata. Isang araw, habang ang maliit na bata na si Hesus ay naglalaro sa hardin nang magpakita ang dalawang arkanghel mula sa langit na dala ang mga kagamitan ng kanyang hinaharap na pagpapakasakit at kamatayan. Dala ng malaking pagkatakot sa nasabing pangitain, ang banal na bata ay tumakbo sa mga bisig ng kanyang ina para sa kanyang pangangalaga, kung saan naman ang Mahal na Ina, buong higpit na niyakap ang batang si Hesus, na dahil sa pagmamadali, isa sa kanyang panyapak ay halos mapigtal. Dahil sa mga bisig ng Mahal na Ina, ang banal na bata ay nakadama ng tunay na kaligtasan at kapayapaan, sapagkat siya ang ina na laging handang dumamay at sumaklolo.

   Sa Pilipinas, sa dambana ng Ina ng Laging Saklolo sa Baclaran, ang pamimintuho ay naging pambansang debosyon. Noong 1940, ang pagnonobena sa Mahal na Ina sa araw ng Miyerkules, ay umakit sa maraming tao at naging dahilan ng paglago ng kalakalan at negosyo. Ngayon, buong bansa ay itinalaga ang araw ng Miyerkules ay araw ng pagnonobena, kung saan sa bawat simbahan sa buong kapuluan ay nagiging dambana ng Ina ng Laging Saklolo.

SAMAHAN - Ang Samahan ng Ina ng Laging Saklolo ang siyang nagiging tanda ng nananatiling debosyon sa Ina ng Laging Saklolo sa barrio at parokya ng Sta. Elena, Hagonoy.

   Hanggang sa Parokya ni Sta. Elena ay nakarating ang lumalaganap na debosyon sa Mahal na Ina. Sa katunayan may mga Redemptorista o pangunahing tagapagtaguyod ng pamimintuho sa Mahal na Ina ng Laging Saklolo sa Parokya ni Sta. Elena na mas kilala sa tawag na Samahan ng Ina ng Laging Saklolo. Ang Parokya ni Sta. Elena ay may ilang dekada nang nagdiriwang ng kapistahan na ito ng Mahal na Ina. Ngayong taon ito ay ipinagdiwang noong ika-25 ng Hunyo taong kasalukuyan na taliwas sa nakagawian na tuwing ika-27 ng Hunyo sapagkat ang petsa na ito ay natapat ng Pagdiriwang ng Kapistahan ng Kamahal-mahalang Puso ni Hesus, na ipigdiriwang din ng buong mga Katoliko. Sa pangunguna ng samahan, naitaguyod ang siyam na araw ng nobena para sa kapistahan. Hanggang sa sumapit ang araw ng pista. Sa Pangunguna ni Rdo. P. Jaime Malanum, nagdiwang ang buong parokya ng pamarokyang kapistahan ng Mahal na Ina ng Laging Saklolo sa pangunguna ng Hermana Mayor na si Gng. Belen Ramos at ang kanyang pamilya. Nag-alay ang Sambayanan ng Diyos ng Misa sa pangungunan ng pamilya ng Hermana at ng samahan sa ganap na ika-9 ng umaga, araw ng Miyerkules. Ang imahen ay inensensuhan matapos ang Banal na Misa bilang parangal sa Mahal na Ina. Matapos ang Banal na Misa ay inilabas na ang Banal na Prusisyon sa pangunguna ng mga kasapi ng samahan, hermana at ang kanyang mga kaibigan at pamilya, banda ng mosiko at ang Mahal na Ina. Nagdaan ang prusisyon mula sa parokya hanggang sa tulay ng Kaysuka at pabalik muli sa parokya. Pagkatapos ng prusisyon dinasal ang Sto. Rosario, at nag-alay ng mataimtim na panalangin. Hindi matatawaran ang pananampalataya sa Mahal na Ina ng Laging Saklolo at ang sakripisyo bagkus kahit na malaki na ang tubig sa kalsada kanila parin itong ihinatid sa susunod na Hermana na inuna nila ito at nagging prayoridad kesa sa kanilang pagod na katawan. At natapos ang pagdiriwang sa isang payak at simpleng salo-salo sa tahanan ng Hermana.

   Ang Samahan ng Ina ng Laging Saklolo sa Parokya ni Sta. Elena ay isa sa matatag na samahan sa Parokya. Sila ay may taunang pagdiriwang ng kapistahan ng Mahal na Ina. Tuwing Miyerkules ay sama-sama silang nagnonobena at sa paglipas ng panahon sila ay dumarami pa. Ang paghehermano sa kapistahan para sa Ina ng Laging Saklolo sa Parokya ni Sta. Elena ay umiikot sa kanilang samahan.

Ayos sa Samahan “Hindi mo matatanggihan kung ang Mahal na Ina na ang tumatawag sa iyo “

MASINTAHING INA, TULUNGAN MO KAMI!

Photography Acknowledgement: Marvin M. Magbitang

                                                Parokya ni Sta. Elena Emperatriz

                                                Sta. Elena, Hagonoy, Bulakan