PAGTINGIN/OPINION: LINGGO NG PALASPAS SA PAGPAPAKASAKIT NG PANGINOONG HESUKRISTO, Rev. Msgr. Ranilo Santos Trillana, P.C.

Mula sa Patnugot: Kinuha ang nasabing homiliya mula sa librong Ang TAWAG: TAGUMPAY sa LIWANAG, Pagmumuni-muni tungkol sa Salita ng Diyos sa mga Araw ng Linggo (Taon A) nang may kapahintulutan ng may-akda.

Mula sa: Ang TAWAG: TAGUMPAY sa LIWANAG

Pagmumuni-muni tungkol sa Salita ng Diyos sa mga Araw ng Linggo 
(Taon A)

Rdo. Msgr. Ranilo Santos Trillana, P.C.

TAON A, Bilang 21

Unang Pagbasa: Isaias 60: 4-7

Ikalawang Pagbasa: Filipos 2: 6-11

Mabuting Balita: Mateo 27: 11-54

LINGGO NG PALASPAS

SA PAGPAPAKASAKIT NG

PANGINOONG HESUKRISTO

Tinalikuran ni Hesus ang pagka-Diyos,

at nagpakumbaba sa pagiging tao; animo'y alipin ang ayos,

hanggang sa kamatayan sa Krus.

( Filipos 2: 6-8 )

1. Ngayon ay simula ng mga Mahal na Araw o Semana Santa. Ito ang pinakamataas o pinakamahalaga sa lahat ng mga linggo sa buong taon - ang rurok ng mga pagdiriwang sa buong taon. Ito ang paggunita sa pinakamataas na sakripisyo na inialay ng Panginoon para sa kaligtasan ng tao; nag-umpisa sa pagpasok ng Panginoon sa Jerusalem, na hahantong sa Kanyang Pasyon o Pagpapakasakit, at pagkatapos, ay ang Kamatayan sa Krus na hahantong sa Kanyang Muling Pagkabuhay. Mga Mahal na Araw ang tawag dito - isang buong linggo na ang tanging laman ay ang pagpapamalas ng Dakilang Pag-ibig ng Diyos para sa tao.

2. Ang Linggo ng Palaspas ay ang pagwagayway ng mga sanga, upang ipamalas ang pagtanggap kay Kristo bilang Hari ng sanlibutan - ang dumating sa ngalan ng Panginoon. Sigaw ng mga tao: “Mabuhay ang Anak ni David! Pagpalain ang dumarating sa ngalan ng Panginoon! Purihin ang Diyos!” (Mateo 21: 9)

   At ngayon, sa paggunita natin sa tagpong ito, tayo naman ang nagtatanghal kay Kristo bilang Hari ng Sanlibutan - ang Hari ng ating buhay - ang ating Panginoon at Tagapagligtas. Subali't, alam din natin na ang pagtatanghal na ito kay Kristo ay nabago makalipas ang ilang araw. Sapagka't malaunan, ito ay nauwi sa pagpatay kay Kristo sa araw ng Biyernes Santo; sigaw ng mga tao - “Ipako sa Krus! Ipako Siya sa Krus!” ( Mateo 21: 23) May tawag tayo sa ganitong ugali ng tao - “balimbing” - na ang ibig sabihin, mapasa-mabuti o mapasa-masama, pareho lang. Wika nga, walang paninindigan: “sala sa init, sala sa lamig.”

3. Ito ang nilalaman ng Mabuting Balita para sa araw na ito. Sa unang bahagi, (Mateo 2:1-11), ipinamalas ang pagbubunyi ng tao sa pagtanggap kay Kristo sa pamamagitan ng pagwawagayway ng mga sanga ng olibo sa pagkilala sa Kanya bilang Hari ng mga Judio. At sa loob ng Banal na Misa, ang Mabuting Balita (Mateo 27: 11-54 ), ay sumasaklaw mula sa Huling Hapunan, na hahantong sa pagdakip at paglilitis sa Panginoon, hanggang sa kamatayan sa Krus, at maging hanggang sa paglilibing sa Kanya. Ito ay sapagka't ang bawa't araw sa buong linggong ito ay tungkol sa Pasyon ng Panginoon.

4. Sa Unang Pagbasa, matutunghayan natin ang awit ng abang Lingkod ng Panginoon (sa wikang Hebreo ay “Ebed Yahweh”). Dito ay ipinahahayag ang paghihirap at matinding sakripisyo ng Lingkod ng Panginoon. Lahat ay tinanggap Niya nang kusa at buong-loob, walang tanggi o reklamo o paghihimagsik. Sabi nga - “Hindi ako tumutol nang bugbugin nila ako... Pinabayaan ko silang bunutin ang buhok ko't balbas... Ang mga pagdustang ginawa nila ay hindi ko pinansin.” (Isaias 60: 4-7) At ang lahat ng ito ay pinagdaanan ng Panginoong Hesus para sa ating kaligtasan.

5. Sa Ikalawang Pagbasa ay matutunghayan naman natin ang pahayag ng Misteryo ng Tagapagligtas (“Soteriological Mystery”). At ang sabi – “Bagama't si Kristo ay Diyos, tinalikdan ang Kanyang pagka-Diyos nagpakababa sa pagiging tao, na naging masunurin sa Ama hanggang sa kamatayan sa 'Krus.'” At ito ang naging daan upang Siya ay kilalanin at sambahin bilang Panginoon sa ikararangal ng Diyos Ama. Sabi nga - “Anupa't lahat ng nilalang, na nasa langit, nasa lupa, at nasa ilalim ng lupa, ay maninikluhod at sasamba sa Kanya. At ipahahayag ng lahat, na si Hesukristo ang Panginoon, sa ikararangal ng Ama.” (Filipos 2:10-11)

6. Ang mga ito ay naglalarawan ng mga pinagdaanan ng Panginoon sa Kanyang pagpapakasakit na masidhing ipinahahayag sa atin sa pagbasa ng Mabuting Balita. Nandoon ang pagpasa-pasahan ang Panginoon sa paglilitis sa Kanya, at dito ay libakin Siya ng mga kawal. Nandoon ang pagpili ng mga tao kay Barabbas, upang palayain ni Pilato kaysa sa Kanya. Nandoon ang paghuhugas ng kamay ni Pilato; dahil imbis na ipagtanggol ang Panginoon dahil wala naman itong kasalanan, ay umiwas sa pananagutan sa kabila ng pakiusap ng asawang huwag siyang makialam dito. At ang hikbi ng panalanging nagsasaad - “Eli, Eli, lama Sabachthani” - ibig sabihin, “Diyos ko, Diyos ko, bakit Mo ako pinabayaan?” (Mateo 27:46)

7. Ngayong mga Mahal na Araw, sikapin nawa natin na maging lubos ang pakikiisa sa pagpapakasakit ni Kristo alang-alang sa ating kaligtasan. Huwag nating hayaang magdaan ang Linggo na ito, na hindi nakagagawa ng ano mang uri ng kabutihan para sa kapwa, na magpapatingkad sa pagdakila natin sa Diyos. Hanapin natin ang kilos at galaw ng Diyos sa ating buhay. Samantalahin natin ang pagpapadama ng Panginoon ng Kanyang dakilang pag-ibig at sumunod tayo sa Kanya. Tinatawagan tayo ng Panginoon para makabahagi sa Kanyang buhay. Ang buhay na ito ay ganap at kasiya-siya. Huwag sana nating sayangin ang magandang pagkakataon na ito upang palalimin ang ugnayan natin sa Diyos.

Photo Courtesy: Sem. Kendrick Ivan B. Panganiban (Parokya ng Ina ng Laging Saklolo)