MENSAHE MULA SA PATNUGOT/MESSAGE FROM THE EDITOR: Sem. Kendrick Ivan B. Panganiban

Ika-26 ng Marso

Dakilang Kapistahan ng Pagpapahayag ng Magandang

Balita tungkol sa Panginoon

Pag-aanunsyo: Layunin at Misyon

     Pag-aanunsyo – ito ang gawaing ipinapakita sa atin sa pagdiriwang ng pagpapahyag ng Anghel Gabriel kay Maria ukol sa kanyang katayuan: ang pagiging Ina ng Diyos. At lubos ko ring nakikita ang gawaing ito bilang misyon ng pahayagang ito: ang pag-aanunsyo. Sa loob po ng anim na buwan ng lathalaing ito simula pa po noong nakaraang taon, marami na itong naipakita. Ipinakilala nito ang Simbahang Katoliko sa bayan ng Hagonoy, Bulakan at ang maraming kayamanan nito. Dito nakatayo ang Pambansang Dambana ni Sta. Ana at marami pang mga tahanan ng Diyos sa katayuan ng marami pa nitong mga parokya.

     Ngunit bilang isang pahayagang pangkultura, mas pinapalalim pa ng mga manunulat at mga tumatangkilik ang halaga ng gawaing ito. Kaya naman, sa pasimula ng kasalukuyang taon sinubukang pag-isahin ng mga tagapangasiwa ang kaparian, mga relihiyoso at mga layko upang pagsumikapang ayusin at paunlarin ang gawaing ito. At nakatutuwang tignan ang bunga ng paghihirap ng ating mga tagapangasiwa.

     Sa pagkakataong ito hinati po namin ang paglalathala ng pahayagang ito sa apat na bahagi (4 quarters) at nagsisilbi ito bilang unang sangkapat para sa taong ito. Marami rin ang naidagdag na mga panibagong bahagi dito tulad na lamang ng Bayang Levitico. Ito ang bahagi para sa ating kaparian na miyembro ng Kapatiran ng Kapariang Taga-Hagonoy, Inc. (KAKATHA), ang samahan ng mga paring anak-Hagonoy. Lubos ang suportang ipinakita ng parehong mga pari, mga relihiyoso at mga layko sa gawaing ito, at nagpapasalamat  po ako para doon. Ang lahat ng ito ay isinkatuparan para sa ikadadakila ng Panginoong Jesukristo.

     Kaya naman inaanyayahan ko po kayo upang basahin, magnilay at mamangha sa mga makulay na tradisyon at turong Katoliko sa unang quarterly edition ng pahayagang ito: Catholic Hagonoeño: Looking into the Catholic Heritage of Hagonoy, Bulacan, Philippines.

Sem. Kendrick Ivan B. Panganiban

Administrator and Editor-in-Chief