LITANYA NG MAHAL NA BIRHEN: REFUGIUM PECCATORUM (Pagsasakdalan ng mga Taong Makasalanan)

Nuestra Señora de Soledad
G. Bong Morales

Refugium Peccatorum

Kaawa-awa itong taong nagumon sa kasalanan

na higit pa sa maysakit na dapat ay pandirihan;

tinalikdan niya'y Diyos at sinamba'y “likhang-bagay,”

kaya siya sa biyaya ay nauhbdan, naging hangal”;

patay siya sa biyaya, nabalot ng kasamaan

na di-kayang makabangon sa lusak ng kasawian;

datapuwa't merong INA na Ina ng kaawaan,

takbuhan ng nagkasala ang mutya kong Birheng mahal!

---o0o---

Ang salari'y may pag-asa sa Mahal na Birheng Ina

na ang tuwa ay tumulong sa nasawing kaluluwa;

ang pangarap niyang lagi'y iligtas ang nagkasala

at sa “apoy na kilabot” ng parusa ay iadya;

kaya tayong nahandusay sa lusak ng mga sala,

magtiwala at dumulog sa Ina ng mga Ina;

ang katulad niya'y JESUS na ang hanap Niya'y TUPA,

na naligaw sa bakurang “laglag na kaluluwa.”

---o0o---

Takbuhan ng nagkasala ang mabait nating Birhen

na katulad na katulad ni Jesus na Poon natin;

mulang Belen hanggang sa Krus bawat hakbang Niyang gawin

ay pagsuyo sa maysala, pagka-hakbang na damdamin;

sa lunsod man at sa nayon, hanap Niya'y ang salarin

na masayang pinapasan pagbabalik sa landasin;

“nakisalo sa masama, nakaiumpok na magiliw,

sa hangad na sa mabuti ang masama'y hikayatin.”

---o0o---

Pinabanal ang masamang Magdalenang makalupa,

tinitigang buong awa si San Pedrong tumatuwa;

iniligtas sa paratang ang babaeng nangangalunya,

sa nagnakaw pinangako'y ang langit ng madlangtuwa;

sa Puso ng ating Jesus ang “suwail na kawawa,”

may pag-asa at patawad at pagsintang walang sawa;

ganyan din ang BIRHENG MARIA na Ina ng madlang-awa,

kinukupkop ang maysalang humihingi ng kalinga.

---o0o---

Ang isipan ni Maria'y isipan ng kanyang Anak

at iisa ang damdamin ng mag-inang lumiliyag;

nagdaramdaman silang tunay sa salaring talipandas,

na ayaw magbalik-loob sa banal na diwa't landas;

natutuwa naman sila pag ang tupang naglaglag

ay nakita't naibalik sa iniwan nilang pugad;

magkaisa ang isipan at damdaming nag-aalab

sa Mag-Inang ang hangarin ang masama ay iligtas.

---o0o---

Sa buhay ng mga tao na puno ng mga tukso,

walang tigil ang pagumang ng patibong ng demonyo;

nalalaman ni Maria ang dupok ng mga tao,

na madaling marahuyo sa daya at mga hibo;

kaya itong Birheng Maria na sakdalan natin dito,

nakalaang sa balana'y tumulong at sumaklolo;

alam mo ba? Ang sinumang sa Birhen ay mag-deboto,

ililiho nang palagi sa panganib at siphayo.

---o0o---

Ang tigas ng mga puso ng pusakal ng masama,

lumalambot sa patnubay ng Ina kong mapagpala;

ang masama'y nagsisi't mataos na nagtika,

dahilan sa mga dasal sa Birhen tang minumutya;

ang dasal sa araw-araw ng debotong yuta-yuta,

patungkol sa nagkasala, ay didinggin ni Bathala;

kaya yaong masasama'y kailangang magtiwala,

mamintuho at dumulog sa BIRHEN TANG MASANGHAYA!